യു.എസ് ഓപ്പൺ – കൂട്ടുകാരനെ വീഴ്ത്തി നിക്, തീമിനെ വീഴ്ത്തി ബുസ്റ്റ, ഫെലിക്‌സും മുന്നോട്ട്, സിറ്റിപാസിന് പിറകെ ഫ്രിറ്റ്സും പുറത്ത്

വമ്പൻ അട്ടിമറി കണ്ടു യു.എസ് ഓപ്പൺ ആദ്യ ദിനം

യു.എസ് ഓപ്പൺ പുരുഷ വിഭാഗം സിംഗിൾസിൽ വമ്പൻ അട്ടിമറിയാണ് ഇന്ന് കണ്ടത്. നാലാം സീഡ് സ്റ്റെഫനോസ് സിറ്റിപാസിനെ സീഡ് ചെയ്യാത്ത ചിലിയൻ താരം ഡാനിയേൽ ഗാലൻ നാലു സെറ്റ് പോരാട്ടത്തിൽ 6-0, 6-1 3-6, 7-5 എന്ന സ്കോറിന് ആണ് അട്ടിമറിച്ചത്. ആദ്യ രണ്ട് സെറ്റിൽ തകർന്നടിഞ്ഞ സിറ്റിപാസിന്റെ തിരിച്ചു വരാനുള്ള ശ്രമങ്ങൾ വിജയിച്ചില്ല. അതേസമയം അമേരിക്കൻ പോരാട്ടത്തിൽ പത്താം സീഡ് ടെയിലർ ഫ്രിറ്റ്സും ആദ്യ റൗണ്ടിൽ പുറത്തായി. ബ്രാണ്ടൻ ഹോൾട്ടിനോട് ആദ്യ സെറ്റ് 7-6 നു നേടിയ ശേഷം ബാക്കി സെറ്റുകൾ 7-6, 6-3, 6-4 എന്ന സ്കോറിന് കൈവിട്ടാണ് ഫ്രിറ്റ്സ് പരാജയം വഴങ്ങിയത്.

തന്റെ ഡബിൾസ് പങ്കാളിയും ബാല്യകാല സുഹൃത്തും ആയ തനാസി കോക്കിനാക്കിസിനെ നേരിട്ടുള്ള സെറ്റുകൾക്ക് 23 സീഡ് നിക് കിർഗിയോസ് വീഴ്ത്തി. ഇടക്ക് തന്റെ ദേഷ്യം സ്വന്തം ടീമിനോട് തീർത്ത നിക് 6-3, 6-4, 7-6 എന്ന സ്കോറിന് ആണ് നാട്ടുകാരനെ വീഴ്ത്തിയത്. യു.എസ് ഓപ്പണിലേക്കുള്ള മടങ്ങി വരവിൽ മുൻ ചാമ്പ്യൻ ഡൊമനിക് തീം ആദ്യ റൗണ്ടിൽ തന്നെ പുറത്തായി. പന്ത്രണ്ടാം സീഡ് സ്പാനിഷ് താരം പാബ്ലോ കരേനോ ബുസ്റ്റയോട് 7-5, 6-1, 5-7, 6-3 എന്ന സ്കോറിന് ആണ് ഓസ്ട്രിയൻ താരം പരാജയപ്പെട്ടത്. മത്സരത്തിൽ മികവിലേക്കുള്ള മടങ്ങി വരവിന്റെ ലക്ഷണങ്ങൾ തീം കാണിച്ചു എങ്കിലും അത് വിജയിക്കാൻ മതിയായിരുന്നില്ല.

സ്വിസ് താരം അലക്സാണ്ടർ റിറ്റ്സ്ചാർഡിനെ 6-3, 6-4, 3-6, 6-3 എന്ന സ്കോറിന് മറികടന്നു കനേഡിയൻ താരവും ആറാം സീഡും ആയ ഫെലിക്‌സ് ആഗർ അലിയാസമെ രണ്ടാം റൗണ്ടിൽ എത്തി. 13 ഏസുകൾ മത്സരത്തിൽ ഉതിർത്ത ഫെലിക്‌സ് 4 തവണ എതിരാളിയുടെ സർവീസ് ബ്രൈക്ക് ചെയ്യുകയും ചെയ്തു. സെർബിയൻ താരം ഫിലിപ് ക്രാചിനോവിചിനെ 7-5, 6-2, 6-3 എന്ന സ്കോറിന് വീഴ്ത്തിയ ഓസ്‌ട്രേലിയൻ താരവും 18 സീഡുമായ അലക്‌സ് ഡിമിനോറും രണ്ടാം റൗണ്ടിലേക്ക് മുന്നേറി. ആദ്യ ദിനം തന്നെ സിറ്റിപാസിന്റെ പുറത്താകൽ ന്യൂയോർക്കിൽ വരും ദിനങ്ങൾ ആവേശത്തിലാക്കുന്നുണ്ട്.

US Open : Tsitsipas out, first day round up.