സീസണിലെ മൂന്നാം ഗ്രാന്റ് സ്ലാം കിരീടത്തിൽ മുത്തമിട്ടു നൊവാക് ജ്യോക്കോവിച്ച്. കരിയറിലെ 24 മത്തെ ഗ്രാന്റ് സ്ലാം കിരീടം ആണ് നൊവാകിന് ഇത്. ഓപ്പൺ യുഗത്തിൽ 24 ഗ്രാന്റ് സ്ലാം കിരീടങ്ങൾ നേടുന്ന ആദ്യ പുരുഷ/വനിത താരമായും നൊവാക് മാറി. യു.എസ് ഓപ്പണിൽ താരത്തിന്റെ നാലാം കിരീടം കൂടിയായി ഇത്. കളിച്ച 72 സ്ലാമുകളിൽ 24 മത്തെ കിരീട നേട്ടം കൂടിയാണ് താരത്തിന് ഇത്. ജയത്തോടെ ലോക ഒന്നാം റാങ്കിലേക്കും 36 കാരനായ നൊവാക് തിരിച്ചെത്തും. തന്റെ സുഹൃത്തും ഇതിഹാസ ബാസ്‌കറ്റ്‌ ബോൾ താരവും ആയ കോബി ബ്രയാന്റിന് ആണ് നൊവാക് ജയം സമർപ്പിച്ചത്, കോബിയുടെ നമ്പർ കൂടിയാണ് 24.
ഫൈനലിൽ നേരിട്ടുള്ള സെറ്റുകൾക്ക് ആണ് രണ്ടാം സീഡ് ആയ നൊവാക് മൂന്നാം സീഡ് ആയ റഷ്യൻ താരം ഡാനിൽ മെദ്വദേവിനെ തോൽപ്പിച്ചത്. മുമ്പ് തന്നെ ഫൈനലിൽ തോൽപ്പിച്ച റഷ്യൻ താരത്തോട് സെർബിയൻ താരത്തിന്റെ പ്രതികാരം കൂടിയായി ഇത്. ആദ്യ സെറ്റ് 6-3 നു ജയിച്ച നൊവാക് രണ്ടാം സെറ്റ് ടൈബ്രേക്കറിൽ 1 മണിക്കൂർ 45 മിനിറ്റ് പോരാട്ടത്തിന് ഒടുവിൽ 7-6(7-5) നു നേടി. തുടർന്ന് മൂന്നാം സെറ്റ് 6-3 നു നേടി കിരീടം ഉറപ്പിക്കുക ആയിരുന്നു. മത്സരത്തിൽ 1 തവണ ബ്രേക്ക് വഴങ്ങിയെങ്കിലും 3 തവണ എതിരാളിയെ നൊവാക് ബ്രേക്ക് ചെയ്തു.
കോബി ബ്രയാന്റിന്റെ ആദരവ് പ്രകാരം ‘ബ്ലാക്ക് മാമ്പ’ എന്നെഴുതിയ ജേഴ്‌സി അണിഞ്ഞു ആണ് നൊവാക് തന്റെ കിരീട നേട്ടം ആഘോഷിച്ചത്. സീസണിൽ ഇത് നാലാം തവണയാണ് നാലു ഗ്രാന്റ് സ്ലാം ഫൈനലുകളിലും നൊവാക് കളിക്കുന്നത്. ഇതിൽ വിംബിൾഡണിൽ പരാജയപ്പെട്ടത് ഒഴിച്ചാൽ മൂന്നിലും കിരീടം നേടാനും സെർബിയൻ താരത്തിന് ആയി. ചരിത്രത്തിലെ ഏറ്റവും മഹാനായ താരം താൻ ആണ് എന്ന കാര്യം ഒരിക്കൽ കൂടി ഉറപ്പിച്ച പ്രകടനം ആണ് നൊവാക് പുറത്ത് എടുത്തത്. അതേസമയം യു.എസ് ഓപ്പൺ വനിത ഡബിൾസ് കിരീടം ഓസ്‌ട്രേലിയൻ, കനേഡിയൻ സഖ്യം ആയ എറിൻ റൗട്ലിഫ്, ഗബ്രിയേല ഡാബ്റോവ്സ്കി സഖ്യം നേടി.
