തുടർച്ചയായ മോശം പ്രകടനങ്ങൾക്ക് പിറകെ പരിശീലകൻ ജെർമെയ്ൻ ജെങ്കിൻസുമായി പിരിഞ്ഞ് മുൻ ലോക ഒന്നാം നമ്പർ താരം നയോമി ഒസാക്ക. കഴിഞ്ഞ ഫെബ്രുവരിയിൽ ആണ് 34 കാരനായ മുൻ അമേരിക്കൻ വനിത ടെന്നീസ് പരിശീലകൻ കൂടിയായ ജെങ്കിൻസ് 21 കാരിയായ ജപ്പാൻ താരത്തിന്റെ പരിശീലകൻ ആവുന്നത്. എന്നാൽ ഈ കാലഘട്ടത്തിൽ ഫ്രഞ്ച് ഓപ്പൺ, വിംബിൾഡൺ, യു.എസ് ഓപ്പൺ എന്നിവയിലൊക്കെ നേരത്തെ പുറത്തായ ഒസാക്കക്ക് ഇതിനിടയിൽ ആദ്യ 20 റാങ്കിൽ ഉള്ള ഒരു താരത്തോട് പോലും ജയം കാണാൻ സാധിച്ചിരുന്നില്ല.
അതിനാൽ തന്നെയാണ് ഇത്തരം കടുത്ത തീരുമാനം എടുക്കാൻ ഒസാക്ക നിർബന്ധിത ആയത്. 2018 ൽ യു.എസ് ഓപ്പണും 2019 ൽ ഓസ്‌ട്രേലിയൻ ഓപ്പണും നേടിയ ശേഷം പരിശീലകൻ സാഷ ബാജിനുമായി പിരിഞ്ഞ ശേഷമാണ് ഒസാക്ക ജെങ്കിൻസിനെ പരിശീലകൻ ആക്കുന്നത്. എന്നാൽ ഈ തീരുമാനം തികച്ചും പരാജയം ആവുകയായിരുന്നു. പുതിയ പരിശീലകനെ കണ്ടത്തും വരെ പിതാവ് ലെനാർഡ് ഫ്രാൻകോസ് ആവും ഒസാക്കയെ പരിശീലിപ്പിക്കുക.
