ഓസ്‌ട്രേലിയൻ ഓപ്പൺ നേട്ടത്തിൽ റോജർ ഫെഡററേയും, റോയ് എമേഴ്‌സണേയും, ഗ്രാൻഡ്സ്ലാം നേട്ടങ്ങളിൽ പീറ്റ് സംപ്രാസിനേയും ഓസ്‌ട്രേലിയൻ ഓപ്പൺ നേട്ടത്തോടെ ജോക്കോവിച്ച് മറികടന്നു. ഇന്നലത്തെ ഫൈനലിൽ നദാലിനെ 6-3,6-3,6-3 എന്ന ഏകപക്ഷീയമായ സ്കോറിന് നിലം പരിശാക്കിയായിരുന്നു നോവാക്കിന്റെ കിരീട നേട്ടം. കഴിഞ്ഞ 3 സ്ലാമുകളും നേടി എതിരാളികൾ ഇല്ലാതെയാണ് ജോക്കോവിച്ച് മുന്നേറുന്നത്.
കടുത്ത മത്സരം പ്രതീക്ഷിച്ച സകലരേയും നിരാശരാക്കുന്ന വിധത്തിലായിരുന്നു നോവാക്കിന്റെ പ്രകടനം. ഗ്രൗണ്ട് സ്ട്രോക്കുകളിലും സർവ്വുകളിലും മികച്ച് നിന്ന ജോക്കോവിച്ച് നദാലിന് മേലെ ആദ്യ ഗെയിം മുതലേ കരുത്ത് കാട്ടി. എതിരാളിക്ക് ഒരു സെറ്റ് പോലും നൽകാതെ ഫൈനൽ വരെ എത്തിയ നദാലിനെ തുടർച്ചയായി വേണ്ട സമയങ്ങളിലെല്ലാം ബ്രേക്ക് ചെയ്ത് തുടക്കം മുതലേ മത്സരത്തിന്റെ ഗതി നിശ്ചയിക്കാൻ ജോക്കോവിച്ചന്റെ ഗെയിം പ്ലാനിന് കഴിഞ്ഞു എന്നുവേണം പറയാൻ.
ഇതുപോലെ നദാൽ അടുത്ത കാലത്തൊന്നും തോറ്റിട്ടില്ലെന്നത് എത്രമാത്രം ആധിപത്യത്തോടെയാണ് നൊവാക്ക് കളിച്ചതെന്ന് വ്യക്തമാക്കും. ഈയൊരു ലെവലിൽ കളിക്കാൻ മറ്റെന്തെങ്കിലും കണ്ടെത്തണം എന്നാണ് നദാൽ മത്സരശേഷം പ്രതികരിച്ചത്.
