ഓസ്‌ട്രേലിയൻ ഓപ്പണിൽ നിന്ന് മുൻ ലോക ഒന്നാം നമ്പർ താരവും ഗ്രാന്റ് സ്‌ലാം ജേതാവും ആയ മരിയ ഷറപ്പോവ പുറത്ത്. സമീപകാലത്ത് മോശം ഫോമിൽ തുടരുന്ന റഷ്യൻ താരത്തെ 19 സീഡായ ക്രൊയേഷ്യൻ താരം ഡോണ വെകിച്ച് ആണ് പരാജയപ്പെടുത്തിയത്. ആദ്യ സെറ്റിൽ വെകിച്ച് ആധിപത്യം പുലർത്തിയപ്പോൾ 6-3 നു സെറ്റ് ക്രൊയേഷ്യൻ താരത്തിന് സ്വന്തം. രണ്ടാം സെറ്റിൽ പക്ഷെ നന്നായി പൊരുതുന്ന ഷറപ്പോവയെ ആണ് കണ്ടത്. വെകിച്ചിന്റെ സർവീസ് ഭേദിച്ച് മുന്നിലെത്തിയ ഷറപ്പോവക്ക് എതിരെ പക്ഷെ തിരിച്ചടിച്ച ക്രൊയേഷ്യൻ താരം തുടർച്ചയായ നാല് ഗെയിമുകൾ സ്വന്തമാക്കി 6-4 നു രണ്ടാം സെറ്റും മത്സരവും സ്വന്തമാക്കി രണ്ടാം റൗണ്ടിലേക്ക് മാർച്ച് ചെയ്തു.
ഫ്രഞ്ച് താരം ക്രിസ്റ്റീനക്ക് എതിരെ നേരിട്ടുള്ള സെറ്റുകൾക്ക് ആണ് രണ്ടാം സീഡ് ചെക് താരം കരോളിന പ്ലിസ്കോവ ജയം കണ്ടത്. ആദ്യ സെറ്റ് 6-1 നു സ്വന്തമാക്കിയ ചെക് താരം രണ്ടാം സെറ്റിൽ കുറച്ച് കൂടി വിയർക്കേണ്ടി വന്നു. എന്നാൽ 7-5 നു രണ്ടാം സെറ്റും മത്സരവും സ്വന്തമാക്കിയ ചെക് താരം ഫ്രഞ്ച് താരത്തിന്റെ പോരാട്ടത്തിന് ചെക് പറഞ്ഞു. അതേസമയം ക്രൊയേഷ്യൻ താരം അന്ന കരോളിനയെ നേരിട്ടുള്ള സെറ്റുകൾക്ക് മറികടന്ന് സ്വിസ് താരവും ആറാം സീഡുമായ ബെലിന്ത ബെനിച്ചും രണ്ടാം റൗണ്ടിലേക്ക് മുന്നേറി. 6-3, 7-5 എന്ന സ്കോറിന് ആയിരുന്നു സ്വിസ് താരത്തിന്റെ ജയം.
