Tag: West Indies

സൗത്താംപ്ടണ്‍ ടെസ്റ്റിന്റെ മൂന്നാം ദിവസം തങ്ങളുടെ രണ്ടാം ഇന്നിംഗ്സില്‍ വിക്കറ്റ് നഷ്ടമില്ലാതെ 15 റണ്‍സ് നേടി ഇംഗ്ലണ്ട്. റോറി ബേണ്‍സ് പത്ത് റണ്‍സും ഡൊമിനിക് സിബ്ലേ 5 റണ്‍സും നേടിയാണ് 10 ഓവറുകളെ അതിജീവിച്ചത്. 318 റണ്‍സ് നേടി 114 റണ്‍സിന്റെ ഒന്നാം ഇന്നിംഗ്സ് ലീഡ് നേടുവാന്‍ വിന്‍ഡീസിന് സാധിച്ചിരുന്നു.

ഇംഗ്ലണ്ട് 99 റണ്‍സ് പിന്നിലായാണ് സ്ഥിതി ചെയ്യുന്നത്. ആദ്യ ഇന്നിംഗ്സില്‍ ഇംഗ്ലണ്ട് 204 റണ്‍സിന് ഓള്‍ഔട്ട് ആകുകയായിരുന്നു.

ഇംഗ്ലണ്ടിനെതിരെ സൗത്താംപ്ടണ്‍ ടെസ്റ്റില്‍ വിന്‍ഡീസ് 318 റണ്‍സിന് ഓള്‍ഔട്ട്. 204 റണ്‍സിന് ഇംഗ്ലണ്ടിനെ പുറത്താക്കിയ വിന്‍ഡീസ് തങ്ങളുടെ ഒന്നാം ഇന്നിംഗ്സില്‍ 318 റണ്‍സ് നേടിയിട്ടുണ്ട്. മത്സരത്തില്‍ 114 റണ്‍സ് ലീഡ് ടീം നേടിയിട്ടുണ്ട്.

ക്രെയിഗ് ബ്രാത്ത്‍വൈറ്റിന്റെയും(65) ഷെയിന്‍ ഡോവ്റിച്ചിന്റെയും അര്‍ദ്ധ ശതകങ്ങള്‍ക്കൊപ്പം റോഷ്ടണ്‍ ചേസ്(47), ഷമാര്‍ ബ്രൂക്ക്സ്(39) എന്നിവരുടെ പ്രകടനങ്ങളാണ് വിന്‍ഡീസിന് കരുത്ത് പകര്‍ന്നത്. ഷെയിന്‍ ഡോവ്റിച്ച് 61 റണ്‍സ് നേടി ഇന്നിംഗ്സിലെ ഒമ്പതാം വിക്കറ്റായി വീണു.

ഇംഗ്ലണ്ടിനായി ബെന്‍ സ്റ്റോക്സ് നാലും ജെയിംസ് ആന്‍ഡേഴ്സണ്‍ 3 വിക്കറ്റും ഡൊമിനിക് ബെസ്സ് 2 വിക്കറ്റും നേടി. മാര്‍ക്ക് വുഡിന് ഒരു വിക്കറ്റ് ലഭിച്ചു.

സൗത്താംപ്ടണ്‍ ടെസ്റ്റില്‍ മൂന്നാം ദിവസം ഉച്ച ഭക്ഷണത്തിനായി ടീമുകള്‍ പിരിയുമ്പോള്‍ മികച്ച നിലയില്‍ വിന്‍ഡീസ്. 57/1 എന്ന നിലയില്‍ ബാറ്റിംഗ് പുനരാരംഭിച്ച വെസ്റ്റിന്‍ഡീസിന് സ്കോര്‍ 102 റണ്‍സില്‍ നില്‍ക്കവെ ഷായി ഹോപിനെ(16) നഷ്ടമായി. സ്പിന്നര്‍ ഡൊമിനിക്ക് ബെസ്സിനാണ് വിക്കറ്റ് ലഭിച്ചത്.

അതിന് ശേഷം ക്രെയിഗ് ബ്രാത്‍വൈറ്റ് തന്റെ അര്‍ദ്ധ ശതകം തികച്ചുവെങ്കിലും ബെന്‍ സ്റ്റോക്സിന് വിക്കറ്റ് നല്‍കി മടങ്ങി. ഉച്ച ഭക്ഷണത്തിനി പിരിയുമ്പോള്‍ വിന്‍ഡീസ് 159/3 എന്ന നിലയിലാണ്. ഇംഗ്ലണ്ടിന്റെ സ്കോര്‍ മറികടക്കുവാന്‍ 45 റണ്‍സ് കൂടിയാണ് ടീം നേടേണ്ടത്.

27 റണ്‍സുമായി ഷമാര്‍ ബ്രൂക്ക്സും 13 റണ്‍സ് നേടിയ റോഷ്ടണ്‍ ചേസുമാണ് സന്ദര്‍ശകര്‍ക്കായി ക്രീസില്‍ നില്‍ക്കുന്നത്. 65 റണ്‍സ് നേടിയ ക്രെയിഗ് ബ്രാത്‍വൈറ്റാണ് ടീമിന്റെ ഇതുവരെയുള്ള ടോപ് സ്കോറര്‍.

ഇംഗ്ലണ്ടിനെതിരെ സൗത്താംപ്ടണ്‍ ടെസ്റ്റില്‍ തങ്ങളുടെ ബാറ്റിംഗ് ആരംഭിച്ച വെസ്റ്റ് ഇന്‍ഡീസ് ഭേദപ്പെട്ട നിലയില്‍. ഇംഗ്ലണ്ടിനെ 204 റണ്‍സിന് പുറത്താക്കിയ ശേഷം ബാറ്റിംഗ് ആരംഭിച്ച വിന്‍ഡീസിന് ഓപ്പണ്‍ ജോണ്‍ കാംപെല്ലിനെ നഷ്ടമായെങ്കിലും കൂടുതല്‍ വിക്കറ്റ് നഷ്ടമില്ലാതെ ദിവസം അവസാനിപ്പിക്കുവാന്‍ സന്ദര്‍ശകര്‍ക്കായി.

ഒന്നാം വിക്കറ്റില്‍ ക്രെയിഗ് ബ്രാത്‍വൈറ്റും ജോണ്‍ കാംപെല്ലും ചേര്‍ന്ന് 43 റണ്‍സ് നേടി വിന്‍ഡീസിന് മികച്ച തുടക്കം നല്‍കിയെങ്കിലും 28 റണ്‍സ് നേടിയ കാംപെല്ലിനെ ജെയിംസ് ആന്‍ഡേഴ്സണ്‍ പുറത്താക്കുകയായിരുന്നു. തുടര്‍ന്ന് കൂടുതല്‍ നഷ്ടമില്ലാതെ രണ്ടാം ദിവസം 57 റണ്‍സില്‍ അവസാനിപ്പിക്കുവാന്‍ വെസ്റ്റിന്‍ഡീസിന് സാധിച്ചു.

20 റണ്‍സുമായി ക്രെയിഗ് ബ്രാത്‍വൈറ്റും 3 റണ്‍സ് നേടി ഷായി ഹോപുമാണ് സന്ദര്‍ശകര്‍ക്കായി ക്രീസിലുള്ളത്. 26.3 ഓവറുകള്‍ അവശേഷിക്കെ വെളിച്ചക്കുറവ് മൂലമാണ് രണ്ടാം ദിവസത്തെ കളി നേരത്തെ നിര്‍ത്തിയത്. 14 റണ്‍സാണ് രണ്ടാം വിക്കറ്റില്‍ കരീബിയന്‍ കൂട്ടുകെട്ട് നേടിയിട്ടുള്ളത്. ഇംഗ്ലണ്ടിന്റെ സ്കോര്‍ മറികടക്കുവാന്‍ വിന്‍ഡീസ് 147 റണ്‍സ് കൂടി നേടേണ്ടതുണ്ട്.

ഇംഗ്ലണ്ടും വിന്‍ഡീസും തമ്മിലുള്ള മൂന്ന് മത്സരങ്ങളുടെ ടെസ്റ്റ് പരമ്പരയെ വിളിക്കുക #raisethebat ടെസ്റ്റ് സീരീസ് എന്നായിരിക്കുമെന്ന് അറിയിച്ച് ബോര്‍ഡ്. കോവിഡിനെതിരെയുള്ള പോരാട്ടത്തില്‍ അണി ചേര്‍ന്ന മുന്‍ നിര പോരാളികള്‍ക്കുള്ള ഐക്യദാര്‍ഢ്യമെന്ന നിലയിലാണ് ഈ നീക്കം. ജൂലൈ എട്ടിന് ഏജീസ് ബൗളിലാണ് ആദ്യ മത്സരം അരങ്ങേറുന്നത്.

ചില പ്രാദേശിക ക്ലബ്ബുകള്‍ നിര്‍ദ്ദേശിച്ച ടീച്ചര്‍മാര്‍, ഡോക്ടര്‍മാര്‍, നഴ്സുമാര്‍, സാമൂഹിക പ്രവര്‍ത്തകര്‍ എന്നിങ്ങനെ കോവിഡിനെതിരെയുള്ള പോരാട്ടത്തില്‍ അണിനിരന്ന ചില ആളുകളുടെ പേരുകള്‍ ഇംഗ്ലണ്ട് തങ്ങളുടെ പരിശീലക ഷര്‍ട്ടുകളില്‍ ആലേഖനം ചെയ്യുമെന്നും അറിയിച്ചിട്ടുണ്ട്. ഇത്തരം പോരാളികള്‍ക്ക് വേണ്ടി തങ്ങളാല്‍ ചെയ്യാവുന്ന ഒരു കാര്യമെന്ന നിലയിലാണ് പരമ്പരയ്ക്ക് ഈ നാം നല്‍കിയതെന്ന് “റെയിസ് ദി ബാറ്റ് ” പരമ്പരയെക്കുറിച്ച് ഇംഗ്ലണ്ട് ചീഫ് ടോം ഹാരിസണ്‍ വ്യക്തമാക്കി.

അഭിമാനത്തോടെയാവും തങ്ങള്‍ അവരുടെ പേര് അണിയുക എന്ന് ഇംഗ്ലണ്ട് നായകന്‍ ജോ റൂട്ടും വ്യക്തമാക്കി. രാജ്യത്തിന് വേണ്ടി കഷ്ടസമയത്ത് ഒരുമിച്ച് നിന്ന ഇവരുടെ സേവനങ്ങളെ ബഹുമാനിക്കുവാനുള്ള അവസരമാണിതെന്നും ഏവരും അത് വിനിയോഗിക്കുമെന്നും ജോ റൂട്ട് വ്യക്തമാക്കി.

ഇംഗ്ലണ്ടിനെ സമ്മര്‍ദ്ദത്തിലാക്കുവാന്‍ വിന്‍ഡീസ് ആദ്യം ചെയ്യേണ്ടത് റണ്‍സ് സ്കോര്‍ ചെയ്യുകയാണെന്ന് പറഞ്ഞ് ഓപ്പണിംഗ് താരം ക്രെയിഗ് ബ്രാത്‍വൈറ്റ്. ഇംഗ്ലണ്ടില്‍ കഴിഞ്ഞ തവണ 134, 95 എന്നിങ്ങനെയുള്ള സ്കോറുകള്‍ നേടിയ ക്രെയിഗ് ബ്രാത്‍വൈറ്റ് ടീമിനെ ലീഡ്സില്‍ വിജയത്തിലേക്ക് നയിച്ചിരുന്നു. എന്നാല്‍ അതെല്ലാം ചരിത്രമാണെന്നും അത് മൂന്ന് വര്‍ഷം മുമ്പ് നടന്നതാണെന്നും ഇത്തവണ സമ്മര്‍ദ്ദത്തിലാക്കുവാന്‍ ടീം റണ്‍സ് സ്കോര്‍ ചെയ്യണമെന്നും ബ്രാത്‍വൈറ്റ് വ്യക്തമാക്കി.

തന്റെ ഫോം അടുത്തിടെ മോശമായിട്ടുണ്ടെങ്കിലും ഇംഗ്ലണ്ടില്‍ മികച്ച പ്രകടനം പുറത്തെടുക്കുവാന്‍ കഴിയുമെന്നും താരം വ്യക്തമാക്കി. ഇത്തവണ ഡാരെന്‍ ബ്രാവോ, ഷിമ്രണ്‍ ഹെറ്റ്മ്യര്‍ എന്നിവര്‍ ടീമില്‍ ഇല്ലാത്തതിനാല്‍ തന്നെ തന്നില്‍ കൂടുതല്‍ ഉത്തരവാദിത്വം ഉണ്ടെന്നും ബ്രാത്‍വൈറ്റ് വ്യക്തമാക്കി.

ടീം റണ്‍സ് സ്കോര്‍ ചെയ്യുകയാണെങ്കില്‍ ഇംഗ്ലണ്ടിനെ സമ്മര്‍ദ്ദത്തിലാക്കുവാനുള്ള ബൗളിംഗ് നിര തങ്ങള്‍ക്കുണ്ടെന്നും ബ്രാത്‍വൈറ്റ് വ്യക്തമാക്കി. അച്ചടക്കത്തോടെ ബാറ്റിംഗ് നിര മത്സരത്തെ സമീപിക്കണമെന്നും ബ്രാത്‍വൈറ്റ് സൂചിപ്പിച്ചു.