തമിഴ്നാട് പ്രീമിയർ ലീഗിൽ വിജയക്കുതിപ്പുമായി കാഞ്ചി വീരൻസ്. ടുട്ടി പാട്രിയറ്റ്സിനെ 58 റൺസിനാണ് കാഞ്ചി വീരൻസ് പരാജയപ്പെടുത്തിയത്. ആദ്യം ബാറ്റ് ചെയ്ത കാഞ്ചി വീരൻസ് മൂന്ന് വിക്കറ്റ് നഷ്ടത്തിൽ 193 റൺസെടുത്തു. മറുപടി ബാറ്റിംഗിനിറങ്ങിയ ടുട്ടി പാട്രിയറ്റ്സിന് 8 വിക്കറ്റ് നഷ്ടത്തിൽ 135 റൺസെടുക്കാനേ സാധിച്ചുള്ളൂ.
ആദ്യം ബാറ്റ് ചെയ്ത കാഞ്ചി വീരൻസിന് തുടക്കത്തിൽ തന്നെ വിശാൽ വൈദ്യയെ (2) നഷ്ടമായെങ്കിലും സിദ്ധാർത്ഥും (50) അപരജിതും (76*) മികച്ച നിലയിലെത്തിച്ചു. സഞ്ജയ് 4 റൺസെടുത്തപ്പോൾ സതീഷ് 47 റൺസെടുത്ത് പുറത്താവാതെ നിന്നു. വെങ്കടേഷ് 2ഉം തമിൾകുമരൻ ഒരു വിക്കറ്റും നേടി. മറുപടി ബാറ്റിംഗിനിറങ്ങിയ ടുട്ടി പാട്രിയറ്റ്സ് താമരൈക്കണന്റെ ബൗളിംഗിന് മുന്നിൽ പതറി. താമരൈക്കണ്ണൻ 3 വിക്കറ്റ് നേടി. സുതേഷ് 2ഉം ഹരീഷ്, സിലമ്പരശൻ,സതീഷ് എന്നിവർ ഓരോ വിക്കറ്റും നേടി. ടുട്ടി പാട്രിയറ്റ്സിന്റെ നിരയിൽ അക്ഷയ് ശ്രീനിവാസനും(22) സെന്തിൽനാഥനും മാത്രമാണ് (25) പൊരുതി നോക്കിയത്. നാഥൻ (19) ഉം വിക്കറ്റ്കീപ്പർ കമലേഷുമാണ്(16) രണ്ടക്കം കടന്നത്.
