Tag: Punjab FC

ഇന്ത്യൻ സൂപ്പർ ലീഗിൽ പഞ്ചാബ് എഫ് സിയെ നേരിട്ട കേരള ബ്ലാസ്റ്റേഴ്സിന് പരാജയം. കൊച്ചിയിൽ ഒന്നിനെതിരെ മൂന്നു ഗോളുകൾക്ക് ആണ് കേരള ബ്ലാസ്റ്റേഴ്സ് പരാജയപ്പെട്ടത്. കൊച്ചിയിൽ അവരുടെ സീസണിലെ ആദ്യ പരാജയമാണിത്.

ഇന്ന് കരുതലോടെ തുടങ്ങിയ ബ്ലാസ്റ്റേഴ്സിന് രാഹുൽ കെ പിയുടെ ഒരു ഹെഡറിലൂടെ ആദ്യ ഒരു ഗോളിന് അടുത്ത് എത്തി. കുറച്ച് കഴിഞ്ഞ് മൊഹമ്മദ് സലായുടെ ഒരു ഗോൾ ലൈൻ ക്ലിയറൻസും പഞ്ചാബിനെ ഗോൾ വഴങ്ങുന്നതിൽ നിന്ന് രക്ഷിച്ചു. എന്നാൽ അവരുടെ ചെറുത്ത് നിൽപ്പ് അധികം നീണ്ടു നിന്നില്ല.

39ആം മിനുട്ടിൽ മിലോസ് ഡ്രിഞ്ചിചിലൂടെ കേരളം ലീഡ് നേടി. ഒരു കോർണറിൽ നിന്നുള്ള ഡ്രിഞ്ചിചിന്റെ സ്ട്രൈക്ക് പോസ്റ്റിൽ തട്ടി ഗോൾ വല കടന്നു തിരികെ വന്നു. ലൈൻ റഫറിയുടെ മികച്ച തീരുമാനം ആ ഗോൾ കേരളത്തിന് ലഭിക്കാൻ കാരണമായി. സ്കോർ 1-0.

ആ ഗോൾ വന്ന് നാലു മിനുട്ടുകൾക്ക് അകം പഞ്ചാബ് സമനില നേടി. ജോർദാൻ ഗില്ലിന്റെ സ്ട്രൈക്ക് ഒരു ഡിഫ്ലക്ഷനോടെ ആണ് വലയിലേക്ക് പോയത്. സ്കോർ 1-1. ആദ്യ പകുതി സമനിലയിൽ അവസാനിച്ചിരുന്നു. രണ്ടാം പകുതിയിൽ കേരളം ഡിഫൻസിൽ പതറുന്നത് കാണാൻ ആയി.

61ആം മിനുട്ടിൽ ജോർദനിലൂടെ വീണ്ടും പഞ്ചാബ് എഫ് സി വല കുലുക്കി. സ്കോർ 1-2. ഇതിനു പിന്നാലെ ലൂകയിലൂടെ പഞ്ചാബ് മൂന്നാം ഗോളിനടുത്ത് എത്തി. സച്ചിന്റെ സേവാണ് കേരളത്തെ രക്ഷിച്ചത്.

കേരള ബ്ലാസ്റ്റേഴ്സ് ചില മാറ്റങ്ങൾ വരുത്തി നോക്കിയെങ്കിലും ഫലമുണ്ടായില്ല. 88ആം മിനുട്ടിൽ ഒരു പെനാൾട്ടിയിലൂടെ ലൂക കൂടെ ഗോൾ കണ്ടെത്തിയതോടെ പഞ്ചാബ് വിജയം ഉറപ്പിച്ചു.

ഈ വിജയത്തോടെ പഞ്ചാബ് 14 പോയിന്റുമായി ഒമ്പതാം സ്ഥാനത്ത് നിൽക്കുന്നു‌. കേരള ബ്ലാസ്റ്റേഴ്സ് 26 പോയിന്റുമായി മൂന്നാമതും നിൽക്കുന്നു

വിജയ വഴിയിലേക്ക് തിരികെ വരാൻ ശ്രമിക്കുന്ന കേരള ബ്ലാസ്റ്റേഴ്സ് ഇന്ന് പഞ്ചാബ് എഫ് സിയെ നേരിടും. 2024ലെ കേരള ബ്ലാസ്റ്റേഴ്സിന്റെ ആദ്യ ഹോം മത്സരമാകും ഇത്. കൊച്ചിയിലേക്കുള്ള വരവ് കേരള ബ്ലാസ്റ്റേഴ്സിന് വിജയവും തിരികെ നൽകും എന്ന് പ്രതീക്ഷിക്കാം. അവസാന മത്സരത്തിൽ ബ്ലാസ്റ്റേഴ്സ് ഒഡീഷയോട് പരാജയപ്പെട്ടിരുന്നു.

പരിക്ക് കാരണം ഏറെ ബുദ്ധിമുട്ടുകയാണ് കേരള ബ്ലാസ്റ്റേഴ്സ്. ലൂണ, പെപ്ര എന്നിവർ അവർക്ക് ഒപ്പം ഇല്ല. പരിക്ക് ഭേദമായ ജീക്സൺ ഇന്ന് കളിക്കും എന്ന് ഇവാൻ വുകമാനോവിച് പറഞ്ഞു. ഇപ്പോൾ മൂന്നാം സ്ഥാനത്ത് നിൽക്കുന്ന ബ്ലാസ്റ്റേഴ്സിന് വിജയം അത്യാവശ്യമാണ്. അല്ലായെങ്കിൽ മുംബൈ സിറ്റി, മോഹൻ ബഗാൻ എന്നിവർ ബ്ലാസ്റ്റേഴ്സിനെ മറികടന്നേക്കും.

പഞ്ചാബ് എഫ് സി ഇപ്പോൾ പതിനൊന്നാം സ്ഥാനത്താണ്. എങ്കിലും കഴിഞ്ഞ മത്സരത്തിൽ പഞ്ചാബ് എഫ് സിയെ തോല്പ്പിച്ച പഞ്ചാബ് നല്ല ഫോമിലാണ്. ഇന്ന് രാത്രി 7.30ന് നടക്കുന്ന മത്സരം ജിയോ സിനിമയിൽ തത്സമയം കാണാം.

പഞ്ചാബ് സിയോടും തോറ്റു ബെംഗളൂരു എഫ് സി. ഇന്ന് ഐഎസ്എല്ലിൽ ഡൽഹിയിൽ വച്ച് നടന്ന മത്സരത്തിൽ ബംഗളൂരു എഫ്സിയെ ഒന്നിനെതിരെ 3 ഗോളുകൾക്കാണ് പഞ്ചാബ് സി പരാജയപ്പെടുത്തിയത്‌. തുടക്കത്തിൽ ചേത്രിയിലൂടെ ഒരു ഗോളിന് മുന്നിലെത്തിയ ബംഗളൂരു എഫ്സി പിന്നീട് 3-1ന്റെ പരാജയത്തിലേക്ക് കൂപ്പുകുത്തുകയായിരുന്നു.

ഇന്ന് പതിനഞ്ചാം മിനിട്ടിലായിരുന്നു സുനിൽ ഛേത്രിയുടെ ഗോൾ‌ അതിനുശേഷം ഉണർന്നു കളിച്ച പഞ്ചാബ് 23ആം മിനിട്ടിൽ ജോർദാനിലൂടെ സമനില ഗോൾ നേടി. രണ്ടാം പകുതിയിൽ 71ആം മിനുട്ടിൽ ലൂക്കയിലൂടെ പഞ്ചാബ് ലീഡും എടുത്തു. അവസാനം മധി തലാൽ കൂടെ ഗോൾ നേടിയതോടെ പഞ്ചാബ് വിജയമുറപ്പിച്ചു

അവരുടെ ഈ സീസണിലെ രണ്ടാം വിജയം മാത്രമാണിത്. ബംഗളൂരു ആവട്ടെ ഇതോടെ പത്താം സ്ഥാനത്തേക്ക് താഴ്ന്നു. 11 പോയിന്റുമായി പഞ്ചാബ് ഒമ്പതാം സ്ഥാനത്തും അത്രതന്നെ പോയിന്റുള്ള ബംഗളൂരു പത്താം സ്ഥാനത്തുമാണ്. ബംഗളൂരു എഫ് സി 2 മത്സരങ്ങൾ മാത്രമേ ഈ സീസണിൽ വിജയിച്ചിട്ടുള്ളൂ.

ഇന്ത്യൻ സൂപ്പർ ലീഗിൽ ഇന്ന് പഞ്ചാബ് എഫ് സിയെ നേരിട്ട കേരള ബ്ലാസ്റ്റേഴ്സ് എതിരില്ലാത്ത ഒരു ഗോളിന് വിജയിച്ചു. പരിക്ക് കാരണം അദ്രിയാൻ ലൂണയും സസ്പെൻഷൻ കാരണം ഇവാൻ ടച്ച് ലൈനിലും ഇല്ലാതിരുന്നിട്ടും അനായാസം വിജയിക്കാൻ കേരള ബ്ലാസ്റ്റേഴ്സിനായി. ഇന്ന് ആദ്യ പകുതിയിൽ അധികം അവസരങ്ങൾ കേരള ബ്ലാസ്റ്റേഴ്സ് സൃഷ്ടിച്ചിരുന്നില്ല.

രണ്ടാം പകുതിയുടെ തുടക്കത്തിൽ ഐമനെ വീഴ്ത്തിയതിന് ലഭിച്ച ഒരു പെനാൾട്ടിയിലൂടെ കേരള ബ്ലാസ്റ്റേഴ്സ് ലീഡ് എടുത്തു. ദിമി എടുത്ത പെനാൾട്ടി ലക്ഷ്യത്തിൽ തന്നെ പതിച്ചു. ദിമിയുടെ സീസണിലെ അഞ്ചാം ഗോളായിരുന്നു ഇത്‌. ഇതിനു ശേഷം കൂടുതൽ ആക്രമിച്ചു കളിച്ചു എങ്കിലും ബ്ലാസ്റ്റേഴ്സിന് രണ്ടാം ഗോൾ നേടാൻ ആയില്ല. പ്രിതത്തിന് ഒരു നല്ല അവസരം ലഭിച്ചെങ്കിലും ഷോട്ട് ഗോൾ കീപ്പർ സേവും ചെയ്തു. പോസ്റ്റും ബ്ലാസ്റ്റേഴ്സിനെ ഗോളിൽ നിന്ന് തടഞ്ഞു.

ഈ വിജയത്തോടെ കേരള ബ്ലാസ്റ്റേഴ്സ് 10 മത്സരങ്ങളിൽ നിന്ന് 20 പോയിന്റുമായി ലീഗിൽ രണ്ടാമത് നിൽക്കുകയാണ്. പഞ്ചാബ് 5 പോയിന്റുമായി 11ആം സ്ഥാനത്താണ്‌.

കേരള ബ്ലാസ്റ്റേഴ്സ് ഇന്ന് നടന്ന പ്രീസീസൺ മത്സരത്തിൽ പരാജയപ്പെട്ടു. ഐ എസ് എല്ലിലേക്ക് പ്രൊമോഷൻ നേടി എത്തുന്ന പഞ്ചാബ് എഫ് സിയെ ആണ് ഇന്ന് കൊൽക്കത്തയിൽ വെച്ച് കേരള ബ്ലാസ്റ്റേഴ്സ് നേരിട്ടത്. രണ്ടിനെതിരെ മൂന്നു ഗോളുകൾക്ക് ആയിരുന്നു കേരള ബ്ലാസ്റ്റേഴ്സിന്റെ പരാജയം. കേരള ബ്ലാസ്റ്റേഴ്സിനായി ബിദ്യാസാഗറും മിലോസും ഇന്ന് ഗോൾ നേടി. എന്നിട്ടും പരാജയം ഒഴിവാക്കാൻ ബ്ലാസ്റ്റേഴ്സിനായില്ല.

കൊൽക്കത്തയിൽ ഒരു പ്രീസീസൺ മത്സരം കൂടെ കേരള ബ്ലാസ്റ്റേഴ്സ് കളിക്കാൻ സാധ്യതയുണ്ട്. അതു കഴിഞ്ഞ് കേരള ബ്ലാസ്റ്റേഴ്സ് യു എ ഇയിലേക്ക് പ്രീസീസൺ ടൂറിനായി പോകും. കേരള ബ്ലാസ്റ്റേഴ്സ് രണ്ടാഴ്ച മുമ്പ് ഡ്യൂറണ്ട് കപ്പ് കളിക്കാനായിരുന്നു കൊൽക്കത്തയിൽ എത്തിയത്. ഡ്യൂറണ്ട് കപ്പിൽ കേരള ബ്ലാസ്റ്റേഴ്സ് ഗ്രൂപ്പ് ഘട്ടത്തിൽ പുറത്തായിരുന്നു.