ഗോവ: എഐഎഫ്എഫ് സൂപ്പർ കപ്പ് 2025-26 ടൂർണമെന്റിന് ജിഎംസി സ്റ്റേഡിയത്തിൽ മഴയുടെ അകമ്പടിയോടെ നാടകീയ തുടക്കം. ഉദ്ഘാടന മത്സരത്തിൽ ഇന്റർ കാശി എഫ്‌സി നോർത്ത് ഈസ്റ്റ് യുണൈറ്റഡ് എഫ്‌സിയെ 2-2 എന്ന നിലയിൽ സമനിലയിൽ തളർത്തി. സാഹചര്യങ് ദുഷ്‌കരമായിരുന്നിട്ടും ഇരു ടീമുകളും പൊരുതി കളിച്ചു.

പുതുതായി ഐ-ലീഗിലേക്ക് സ്ഥാനക്കയറ്റം ലഭിച്ച ഇന്റർ കാശി, ഡ്യൂറൻഡ് കപ്പ് ജേതാക്കളെ തുടക്കത്തിൽ തന്നെ ഇന്ന് ഞെട്ടിച്ചു. നോർത്ത് ഈസ്റ്റ് പ്രതിരോധത്തിലെ പിഴവ് മുതലെടുത്ത് അഞ്ചാം മിനിറ്റിൽ ഹർമൻപ്രീത് സിംഗ് ഗോൾ നേടി. എന്നാൽ, നോർത്ത് ഈസ്റ്റ് യുണൈറ്റഡ് പെട്ടെന്ന് തിരിച്ചടിച്ചു. മൊറോക്കൻ സ്‌ട്രൈക്കർ അലാഎദ്ദീൻ അജറായി 18-ാം മിനിറ്റിൽ സമനില ഗോൾ കണ്ടെത്തി. ആദ്യ പകുതി അവസാനിക്കുന്നതിന് തൊട്ടുമുമ്പ്, 40-ാം മിനിറ്റിൽ മിഗുവേൽ സബാക്കോയുടെ ശക്തമായ ഹെഡ്ഡറിലൂടെ ഹൈലാൻഡേഴ്‌സ് ലീഡ് നേടി.

ഇന്റർ കാശിയുടെ യുവ ഇന്ത്യൻ താരങ്ങൾ പിന്നോട്ട് പോകാൻ തയ്യാറായില്ല. രണ്ടാം പകുതിയിലുടനീളം ആത്മവിശ്വാസം വർദ്ധിപ്പിച്ച അവർ ഉയർന്ന രീതിയിൽ പ്രസ് ചെയ്തു കളിച്ചു. അവരുടെ പരിശ്രമങ്ങൾ 74-ാം മിനിറ്റിൽ ഫലം കണ്ടു. കാർത്തിക് അനായാസം പന്ത് വലയിലെത്തിച്ച് സമനില പുനഃസ്ഥാപിച്ചു. അവസാന നിമിഷങ്ങളിൽ റീഡീം ലാങും തോയ് സിംഗും അടക്കമുള്ള നോർത്ത് ഈസ്റ്റ് താരങ്ങൾ വിജയത്തിനായി കഠിനമായി ശ്രമിച്ചെങ്കിലും ഇന്റർ കാശിയുടെ പ്രതിരോധം ഉറച്ചുനിന്നു, ഒരു നിർണ്ണായക പോയിന്റ് അവർ സ്വന്തമാക്കി.

ഡയമണ്ട് ഹാർബർ എഫ്‌സിയെ ഒന്നിനെതിരെ ആറ് ഗോളുകൾക്ക് തകർത്ത് നോർത്ത് ഈസ്റ്റ് യുണൈറ്റഡ് എഫ്‌സിക്ക് അവരുടെ ചരിത്രത്തിലെ രണ്ടാം ഡ്യൂറന്റ് കപ്പ് കിരീടം. ഏഷ്യയിലെ ഏറ്റവും പഴക്കമുള്ള ഫുട്ബോൾ ടൂർണമെന്റിന്റെ 134-ാം പതിപ്പിലാണ് നോർത്ത് ഈസ്റ്റ് ഈ സ്വപ്ന നേട്ടം കൈവരിച്ചത്. കഴിഞ്ഞ സീസണിലും നോർത്ത് ഈസ്റ്റ് ആയിരുന്നു ഡ്യൂറണ്ട് കപ്പ് നേടിയത്.

മത്സരത്തിന്റെ 30-ാം മിനിറ്റിൽ അഷീർ അക്തർ നേടിയ ഗോളിലൂടെ നോർത്ത് ഈസ്റ്റ് ലീഡ് നേടി. ആദ്യ പകുതി അവസാനിക്കുന്നതിന് തൊട്ടുമുമ്പ് പ്രതിഭ ഗോപിയിലൂടെ നോർത്ത് ഈസ്റ്റ് രണ്ടാം ഗോളും നേടി. രണ്ടാം പകുതിയുടെ തുടക്കത്തിൽ തന്നെ തോയ് സിംഗ് മൂന്നാമത്തെ ഗോൾ നേടിയതോടെ നോർത്ത് ഈസ്റ്റ് കളി വരുതിയിലാക്കി. 68-ാം മിനിറ്റിൽ ഒരു ഗോൾ തിരിച്ചടിച്ച് ഡയമണ്ട് ഹാർബർ പ്രതീക്ഷ നൽകിയെങ്കിലും പിന്നീട് നോർത്ത് ഈസ്റ്റ് കൂടുതൽ ശക്തമായി തിരിച്ചടിച്ചു. ജയ്റോ, ആൻഡി റോഡ്രിഗസ്, അലാദൈൻ അജറൈ എന്നിവരുടെ ഗോളുകളോടെ നോർത്ത് ഈസ്റ്റ് തകർപ്പൻ വിജയം നേടി.

ഡയമണ്ട് ഹാർബർ എഫ്‌സിക്ക് ഫൈനലിൽ എത്തിയത് ഒരു സ്വപ്ന നേട്ടമായിരുന്നെങ്കിലും, കിരീടപ്പോരാട്ടത്തിൽ ഇരുടീമുകളും തമ്മിലുള്ള നിലവാരവ്യത്യാസം പ്രകടമായിരുന്നു.

വരാനിരിക്കുന്ന ഇന്ത്യൻ സൂപ്പർ ലീഗ് (ISL) സീസണുമായി ബന്ധപ്പെട്ട അനിശ്ചിതത്വങ്ങൾക്കിടയിലും, 2025-26 സീസണിലേക്കുള്ള തങ്ങളുടെ വിദേശ കളിക്കാരുടെ ക്വാട്ട പൂർത്തിയാക്കി നോർത്ത് ഈസ്റ്റ് യുണൈറ്റഡ് എഫ്‌സി. നിലവിലെ ഡ്യൂറൻഡ് കപ്പ് ചാമ്പ്യന്മാരായ അവർ സ്പാനിഷ് മധ്യനിര വെറ്ററൻ ആൻഡി റോഡ്രിഗസിനെയും ഡൈനാമിക് വിംഗർ ജെയ്‌റോ സാംപെരിയോയെയും തങ്ങളുടെ ടീമിൽ ഉൾപ്പെടുത്തിയതായി KhelNow റിപ്പോർട്ട് ചെയ്യുന്നു.

ഐ എസ് എൽ നടക്കുമോ ഇല്ലയോ എന്ന ആശയക്കുഴപ്പങ്ങൾക്കിടയിലും നോർത്ത് ഈസ്റ്റ് യുണൈറ്റഡ് തങ്ങളുടെ പ്രീസീസൺ ഒരുക്കങ്ങളുമായി മുന്നോട്ട് പോവുകയാണ്. മിച്ചൽ സബക്കോ, അലാഡ്ദീൻ അജറേ, പുതുതായി കരാർ ഒപ്പിട്ട ചെമ നുനെസ് തുടങ്ങിയ പ്രധാന കളിക്കാരെ നിലനിർത്തുന്നതിനൊപ്പം ആണ് ഇപ്പോൾ റോഡ്രിഗസിനെയും സാംപെരിയോയും നോർത്ത് ഈസ്റ്റ് സ്വന്തമാക്കുന്നത്.

35 വയസ്സുകാരനായ ആൻഡി റോഡ്രിഗസ് മുൻ റയൽ മാഡ്രിഡ് യുവതാരമാണ്. സ്പെയിനിലെ ലാ ലിഗ 2-ൽ 200-ൽ അധികം മത്സരങ്ങളിൽ അദ്ദേഹം കളിച്ചിട്ടുണ്ട്. മൊറോക്കൻ ഇന്റർനാഷണൽ താരം മുഹമ്മദ് അലി ബെമാമറിന് പകരക്കാരനായി വരുന്ന റോഡ്രിഗസ് മധ്യനിരയിൽ സ്ഥിരതയും നേതൃത്വവും ഗോളുകളും നൽകുമെന്ന് പ്രതീക്ഷിക്കുന്നു. കഴിഞ്ഞ സീസണിൽ എഫ്‌സി കാർട്ടാജീനയ്ക്കും ബർഗോസ് സിഎഫിനും വേണ്ടി 36 മത്സരങ്ങളിൽ കളിച്ച അദ്ദേഹം നാല് ഗോളുകളും ഒരു അസിസ്റ്റും സംഭാവന ചെയ്തു.

31 വയസ്സുകാരനായ ജെയ്‌റോ സാംപെരിയോ ലാ ലിഗ, ബുണ്ടസ്ലിഗ, യൂറോപ്പ ലീഗ് എന്നിവയിൽ നിന്നുള്ള മികച്ച അനുഭവസമ്പത്തുമായാണ് എത്തുന്നത്. കരിയറിൽ 305 മത്സരങ്ങളിൽ നിന്ന് 71 ഗോളുകളിൽ പങ്കുവഹിച്ച അദ്ദേഹത്തിന്റെ ഏറ്റവും ശ്രദ്ധേയമായ പ്രകടനം മെയിൻസ് 05-ൽ ആയിരുന്നു. മുൻ സെവിയ്യ താരം നോർത്ത് ഈസ്റ്റിന്റെ ആക്രമണത്തെ ശക്തിപ്പെടുത്തും,

2024-25 ഇന്ത്യൻ സൂപ്പർ ലീഗിലെ (ഐഎസ്എൽ) ഗോൾഡൻ ബൂട്ട്, ഗോൾഡൻ ബോൾ ജേതാവായ അലാഎദ്ദീൻ അജാറൈ 2025-26 സീസണിലും നോർത്ത് ഈസ്റ്റ് യുണൈറ്റഡ് എഫ്‌സിയിൽ തുടരുമെന്ന് ക്ലബ്ബ് സ്ഥിരീകരിച്ചു.

ഈ സീസണിൽ തകർപ്പൻ പ്രകടനം കാഴ്ചവെച്ച അജാറൈ 25 മത്സരങ്ങളിൽ നിന്ന് 23 ഗോളുകൾ നേടുകയും 7 അസിസ്റ്റുകൾ നൽകുകയും ചെയ്തിരുന്നു. നോർത്ത് ഈസ്റ്റ് യുണൈറ്റഡ് എഫ്‌സി ലീഗ് ഘട്ടത്തിൽ നേടിയ 46 ഗോളുകളിൽ 30 എണ്ണത്തിലും അദ്ദേഹത്തിന് പങ്കുണ്ടായിരുന്നു. ഇത് അദ്ദേഹത്തെ ലീഗിലെ ടോപ് സ്കോറർ ആക്കുകയും ഒരു ഐഎസ്എൽ സീസണിൽ ഏറ്റവും കൂടുതൽ ഗോൾ സംഭാവനകൾ നൽകിയ കളിക്കാരനാക്കുകയും ചെയ്തു.

ജുവാൻ പെഡ്രോ ബെനാലിയുടെ കീഴിൽ നോർത്ത് ഈസ്റ്റ് യുണൈറ്റഡ് ലീഗ് ഘട്ടത്തിൽ ഏറ്റവും കൂടുതൽ ഗോൾ നേടിയ രണ്ടാമത്തെ ടീമായി ഫിനിഷ് ചെയ്യാൻ അജാറൈയുടെ പ്രകടനം നിർണായകമായി. നാല് വർഷത്തിന് ശേഷം ടീമിനെ പ്ലേ ഓഫിൽ എത്തിക്കുന്നതിലും അദ്ദേഹം പ്രധാന പങ്കുവഹിച്ചു.

കലിംഗ സൂപ്പർ കപ്പ് റൗണ്ട് ഓഫ് 16ൽ മിന്നുന്ന പ്രകടനവുമായി നോർത്ത് ഈസ്റ്റ് യുണൈറ്റഡ് എഫ്‌സി. ഇന്ന് അവർ എതിരില്ലാത്ത ആറ് ഗോളുകൾക്ക് മുഹമ്മദൻ സ്പോർട്ടിംഗ് ക്ലബ്ബിനെ തകർത്ത് ക്വാർട്ടർ ഫൈനലിൽ പ്രവേശിച്ചു. മൊറോക്കൻ സ്ട്രൈക്കർ അലാവുദ്ദീൻ അജറായ് ആണ് കളിയിലെ താരം. തകർപ്പൻ ഹാട്രിക്കും ഒരു അസിസ്റ്റുമായി അജറായ് ടീമിന്റെ വിജയത്തിൽ നിർണായക പങ്കുവഹിച്ചു.

മത്സരം തുടങ്ങിയപ്പോൾ തന്നെ നോർത്ത് ഈസ്റ്റ് ആക്രമിച്ചു കളിച്ചു. മൂന്നാം മിനിറ്റിൽ ജിതിൻ എംഎസ് ഒരു മികച്ച വോളിയിലൂടെ ഗോൾ നേടി. പ്രതിരോധത്തിലെ പിഴവ് മുതലെടുത്തായിരുന്നു ഈ ഗോൾ. തുടർന്ന് 18, 57, 90+2 മിനിറ്റുകളിൽ അജറായ് ഗോൾ നേടി ഹാട്രിക്ക് പൂർത്തിയാക്കി. ഇതിൽ അവസാന ഗോൾ ഒരു പെനാൽറ്റി കിക്ക് ആയിരുന്നു. സ്പാനിഷ് താരങ്ങളായ നെസ്റ്റർ അൽബിയാച്ച് (42’), ഗില്ലെർമോ ഫെർണാണ്ടസ് ഹൈറോ (66’) എന്നിവരും നോർത്ത് ഈസ്റ്റിനായി ഗോൾ കണ്ടെത്തി.

വരാനിരിക്കുന്ന ക്വാർട്ടർ ഫൈനൽ മത്സരങ്ങൾ – ഏപ്രിൽ 26, 2025:
കേരള ബ്ലാസ്റ്റേഴ്സ് vs മോഹൻ ബഗാൻ എസ്ജി – വൈകുന്നേരം 4:30 IST
എഫ്‌സി ഗോവ vs പഞ്ചാബ് എഫ്‌സി – രാത്രി 8:00 IST
തത്സമയം ജിയോ സിനിമയിലും സ്റ്റാർ സ്പോർട്സ് 3യിലും കാണാം.

ചെന്നൈയിലെ ജവഹർലാൽ നെഹ്‌റു സ്റ്റേഡിയത്തിൽ നടന്ന മത്സരത്തിൽ ചെന്നൈയിൻ എഫ്‌സിയെ തോൽപ്പിച്ച് നോർത്ത് ഈസ്റ്റ് യുണൈറ്റഡ് പ്ലേ ഓഫ് സ്ഥാനം ഉറപ്പിച്ചു. 3-0 എന്ന സ്കോറിനായിരുന്നു ജയം. 2020-21 സീസണിന് ശേഷം ആദ്യമായാണ് അവർ ഇന്ത്യൻ സൂപ്പർ ലീഗിൽ (ഐഎസ്എൽ) പ്ലേഓഫിൽ ഇടം നേടുന്നത്.

നെസ്റ്റർ ആൽബിയച്ച്, ജിതിൻ എംഎസ്, അലാഇദ്ദീൻ അജറൈ എന്നിവർ ആണ് ഇന്ന് നോർത്ത് ഈസ്റ്റ് യുണൈറ്റഡിനായി ഗോൾ നേടിയത്.

രണ്ടാം പകുതിയിൽ തിരിച്ചടിക്കാൻ ചെന്നൈയിൻ ശ്രമിച്ചെങ്കിലും ഗോൾ കണ്ടെത്താനായില്ല. റയാൻ എഡ്വേർഡ്സ് രണ്ടാം മഞ്ഞക്കാർഡ് വാങ്ങി പുറത്തായതോടെ അവരുടെ പോരാട്ടം അവസാനിച്ചു. ഈ വിജയത്തോടെ, നോർത്ത് ഈസ്റ്റ് യുണൈറ്റഡ് എഫ്‌സി 23 മത്സരങ്ങളിൽ നിന്ന് 35 പോയിൻ്റിലെത്തി, ഈ സീസണിൽ ഏഴാം തവണയും ക്ലീൻ ഷീറ്റ് നിലനിർത്തുകയും അർഹമായ പ്ലേ ഓഫ് സ്ഥാനം ഉറപ്പാക്കുകയും ചെയ്തു.

ഇന്ന് ഇന്ത്യൻ സൂപ്പർ ലീഗിൽ നോർത്ത് ഈസ്റ്റ് യുണൈറ്റഡിനെ നേരിട്ട കേരള ബ്ലാസ്റ്റേഴ്സ് പത്തു പേരുമായി സമനില നേടി. ചുവപ്പ് കാർഡ് കാരണം 60 മിനുറ്റിൽ അധികം 10 പേരുമായി കളിച്ച ബ്ലാസ്റ്റേഴ്സ് 0-0 എന്ന സമനിലയാണ് സ്വന്തമാക്കിയത്‌

ആദ്യ പകുതിയിൽ മികച്ച രീതിയിൽ തുടങ്ങാൻ ബ്ലാസ്റ്റേഴ്സിന് ആയിരുന്നു. നല്ല രീതിയിൽ കളിക്കവെ ആണ് ഒരു അനാവശ്യ ഫൗൾ ഐബാന് ചുവപ്പ് കാർഡ് നൽകിയത്. നോർത്ത് ഈസ്റ്റ് താരം അജാരെയെ ഹെഡ് ബട്ട് ചെയ്തതിന് ആണ് 30ആം മിനുറ്റിൽ ഐബാന് ചുവപ്പ് കാർഡ് ലഭിച്ചത്.

ഇതിനു ശേഷം 10 പേരുമായി കളിക്കേണ്ടി വന്ന ബ്ലാസ്റ്റേഴ്സ് ഡിഫൻസിലേക്ക് ഊന്നി കളിക്കേണ്ടി വന്നു. സച്ചിൻ സുരേഷിന്റെ ഒരു മികച്ച സേവ് ആദ്യ പകുതിയിൽ കളി ഗോൾ രഹിതമായി നിർത്തി.

10 പേരുമാത്രമെ ഉള്ളൂ എങ്കിലും കേരള ബ്ലാസ്റ്റേഴ്സ് രണ്ടാം പകുതിയിൽ പൊരുതി. കൗണ്ടർ അറ്റാക്കുകളിൽ ശ്രദ്ധ കൊടുത്തായിരുന്നു ബ്ലാസ്റ്റേഴ്സിന്റെ രണ്ടാം പകുതിയിലെ കളി. കേരള ബ്ലാസ്റ്റേഴ്സ് ഡിഫൻസും സച്ചിൻ സുരേഷും ഉറച്ചു നിന്നത് നോർത്ത് ഈസ്റ്റിന് കാര്യങ്ങൾ പ്രയാസകരമാക്കി.

കേരള ബ്ലാസ്റ്റേഴ്സ് പുതിയ സൈനിംഗ് ലഗാറ്റോറിനെ കളത്തിൽ ഇറക്കി. നന്നായി ഡിഫൻഡ് ചെയ്ത് കേരളം അർഹിച്ച സമനില നേടി‌.

ഈ സമനിലയോടെ കേരള ബ്ലാസ്റ്റേഴ്സ് 21 പോയിന്റുമായി എട്ടാം സ്ഥാനത്ത് നിൽക്കുകയാണ്‌. നോർത്ത് ഈസ്റ്റ് 25 പോയിന്റുമായി അഞ്ചാം സ്ഥാനത്തും നിൽക്കുന്നു.