Tag: Liverpool FC

പ്രിമിയർ ലീഗിൽ ഇന്ന് പുലർച്ചെ നടന്ന മത്സരത്തിൽ വിജയവുമായി ലിവർപൂൾ. വിർജിൽ വാൻ ഡൈക്ക്, സോബോസ്ലായി എന്നിവർ ഗോൾ കണ്ടെത്തിയപ്പോൾ എതിരില്ലാത്ത രണ്ടു ഗോളിനായിരുന്നു ഷെഫീൽഡ് യുണൈറ്റഡിനെതിരെ ക്ലോപ്പിന്റെയും സംഘത്തിന്റെയും വിജയം. ഇതോടെ പോയിന്റ് പട്ടികയിൽ രണ്ടാം സ്ഥാനത്ത് തുടരുകയാണ് ലിവർപൂൾ. ഒന്നാം സ്ഥാനത്തുള്ള ആഴ്‌സനലുമായി രണ്ടു പോയിന്റ് മാത്രമാണ് വ്യത്യാസം ഉള്ളത്.

തോൽവി അറിയാതെ എട്ടാം മത്സരമാണ് ലിവർപൂൾ ഇന്ന് പൂർത്തിയാക്കിയത്. 77ആ ശതമാനം പന്ത് കൈവശം വെച്ച് സന്ദർശകർ മേൽകൈ നേടിയപ്പോൾ ഷെഫീൽഡ് യുനൈറ്റഡിന് കാര്യമായി ഒന്നും ചെയ്യാൻ ഉണ്ടായിരുന്നില്ല. ലക്ഷ്യത്തിന് നേരെ ഒരേയൊരു ഷോട്ട് ആണ് അവർ ഉതിർത്തത്. 12ആം മിനിറ്റിൽ ഒരു കൗണ്ടർ നീക്കത്തിലൂടെ ബോക്സിനുള്ളിൽ നിന്നും മാക് അറ്റിക്ക് മികച്ചൊരു അവസരം ലഭിച്ചെങ്കിലും കീപ്പർ രക്ഷകനായി. കൊനാറ്റെടെ ഹെഡർ ശ്രമം കീപ്പർ തടഞ്ഞു. 36ആം മിനിറ്റിൽ വാൻ ഡൈക്ക് സീസണിലെ തന്റെ ആദ്യ ഗോൾ നേടി. കോർണറിൽ നിന്നും എത്തിയ പന്ത് മാർക്ക് ചെയ്യപ്പെടാതെ നിന്ന താരം വലയിലേക്ക് തിരിച്ചു വിട്ടു. താരത്തിന്റെ മറ്റൊരു ഹെഡർ ശ്രമം പോസ്റ്റിന് മുകളിലൂടെ കടന്ന് പോയി.

54ആം മിനിറ്റിൽ കോർണറിൽ നിന്നും ലഭിച്ച അവസരത്തിൽ സലയുടെ കരുത്തുറ്റ ഷോട്ട് കീപ്പർ തട്ടിയകറ്റി. ന്യൂനസിന്റെ ഷോട്ട് കീപ്പർ തടുത്തു. മത്സരം ഇഞ്ചുറി സമയത്തിലേക്ക് കടന്നപ്പോൾ ലിവർപൂളിന് ലീഡ് ഉയർത്താൻ സാധിച്ചു. വലത് വിങ്ങിൽ നിന്നും ബോക്സിൽ ഒഴിഞ്ഞു നിന്ന സോബോസ്ലായിയിലേക്ക് ഡാർവിൻ ന്യൂനസ് പന്തെത്തിച്ചപ്പോൾ താരം അനായാസം കീപ്പറേ മറികടന്ന് വല കുലുക്കുകയായിരുന്നു.

പോരാട്ടങ്ങൾ ഏറെ കണ്ട ആൻഫീൽഡിന്റെ തട്ടകത്തിൽ മറ്റൊരു ഗംഭീര തിരിച്ചു വരവിൽ ജയം കുറിച്ച് ലിവർപൂൾ. അവസാന നിമിഷം വരെ പൊരുതിയ ഫുൾഹാമിനെ മൂന്നിനെതിരെ നാലു ഗോളുകൾക്ക് കീഴടക്കി ലിവർപൂൾ മൂന്ന് പോയിന്റ് കരസ്ഥമാക്കി. ആർനോൾഡ്, എൻഡോ, മാക് ആലിസ്റ്റർ എന്നിവർ ജേതാക്കൾക്കായി വല കുലുക്കിയപ്പോൾ മറ്റൊരു ഗോൾ സെൽഫ് ഗോളായി രേഖപ്പെടുത്തി. ഇതോടെ താൽക്കാലികമായെങ്കിലും രണ്ടാം സ്ഥാനത്തേക്ക് എത്തിയിരിക്കുകയാണ് ക്ളോപ്പും സംഘവും.

ആദ്യ പകുതിയിൽ തന്നെ നാലു ഗോളുകൾ പിറന്ന ആവേശകരമായ തുടക്കമാണ് മത്സരത്തിന് ലഭിച്ചത്. എതിർ തട്ടകത്തിൽ മുഴുവൻ ഊർജവും പുറത്തെടുത്ത് ഫുൾഹാം പൊരുതി. 20 ആം മിനിറ്റിൽ ട്രെന്റ് അലക്‌സാണ്ടർ ആർനോൾഡിന്റെ എണ്ണം പറഞ്ഞ ഫ്രീകിക്കിലൂടെയാണ് ലിവർപൂൾ ആദ്യം ലീഡ് എടുത്തത്. 25 വാര അകലെ നിന്നും താരം തൊടുത്ത ഷോട്ട് വലയിലേക്ക് പതിക്കുമ്പോൾ കീപ്പറും നിസ്സഹായനായി. പിന്നീട് ഇത് കീപ്പർ ലെനോയുടെ സെൽഫ് ഗോളായി രേഖപ്പെടുത്തി. വെറും അഞ്ചു മിനിറ്റിനു ശേഷം വിൽസണിലൂടെ ഫുൾഹാം സമനില ഗോൾ കണ്ടെത്തി. ഇടത് വിങ്ങിലൂടെ എത്തിയ മുന്നേറ്റം ആന്റോണി റോബിൻസൻ പോസിറ്റിന് മുന്നിലേക്കായി നൽകിയപ്പോൾ താരത്തിന്റെ ഷോട്ട് തടയാനുള്ള കീപ്പറുടെ ശ്രമം വിഫലമായി. പിന്നീട് ഫുൾഹാമീന് ആയിരുന്നു ചെറിയ മുൻതൂക്കം എങ്കിലും 39ആം മിനിറ്റിൽ ലിവർപൂൾ ലീഡ് തിരിച്ചു പിടിച്ചു. എതിർ താരത്തിന്റെ ക്ലിയറൻസ് കാലുകളിൽ ലഭിച്ച മാക് അലിസ്റ്റർ, ബോക്സിന് വാരകൾ അകലെ നിന്നും തൊടുത്ത ഒന്നാന്തരം ഒരു ഷോട്ട് വലയിൽ പതിക്കുകയായിരുന്നു. ആദ്യ പകുതി ഇഞ്ചുറി ടൈമിലേക്ക് കടന്നപ്പോൾ ഫുൾഹാം വീണ്ടും വല കുലുക്കി. കോർണറിലൂടെ എത്തിയ പന്ത് ടെറ്റെ വലയിൽ എത്തിക്കുകയായിരുന്നു. വാർ പരിശോധനക്ക് ശേഷം ഗോൾ അനുവദിക്കുകയായിരുന്നു.

രണ്ടാം പകുതിയിലും മത്സരം ആവേശകരമായി തുടർന്നു. 60ആം മിനിറ്റിൽ പോസ്റ്റിന് തൊട്ടു മുൻപിൽ വെച്ച് ന്യൂനസിന്റെ ഷോട്ട് പോസിറ്റിലിടിച്ചു മടങ്ങി. 78ആം മിനിറ്റിൽ റെയ്ഡ് ഫുൾഹാമിനായി വല കുലുക്കി. കാർനെയുടെ ക്രോസിൽ പൊസിറ്റിന് തൊട്ടു മുൻപിൽ വെച്ച് ഹെഡർ ഉതിർക്കുകയായിരുന്നു താരം. എന്നാൽ ലിവർപൂളിന്റെ അതിഗഭീരമായ തിരിച്ചു വരവിനാണ് ആൻസ്ഫീൽഡ് പിന്നീട് സാക്ഷിയായത്. 85ആം മിനിറ്റിൽ പകരക്കാനായി എത്തിയ എൻഡോയുടെ ഒന്നാന്തരമൊരു ഷോട്ടിലൂടെ സമനില നേടിയ ആതിഥേയർ, വെറും രണ്ടു മിനിറ്റിനു ശേഷം ആർനോൾഡിലൂടെ വിജയ ഗോളും കണ്ടെത്തി. ബോക്സിനുള്ളിൽ നിന്നും താരത്തിന്റെ ഷോട്ട് ആൾക്കൂട്ടത്തിനിടയിലൂടെ വലയിൽ പതിച്ചു. പിന്നീട് മുഴുവൻ സമയം വരെ ഗോൾ വഴങ്ങാതെ കാത്ത ലിവർപൂൾ ഒടുവിൽ അവസാന ചിരി തങ്ങളുടേതാക്കി.

ആന്റി റോബർട്സന്റെ പരിക്ക് സ്ഥിരീകരിച്ച് ലിവർപൂൾ പരിശീലകൻ ക്ലോപ്പ്. ശനിയാഴ്ച എവർടണുനായുള്ള മത്സരത്തിന് മുന്നോടിയായി പത്രസമ്മേളനത്തിൽ പങ്കെടുക്കവെയാണ് കോച്ച് സ്കോട്ലാന്റ് താരത്തിനെ കുറിച്ച് സംസാരിച്ചത്. നേരത്തെ സ്പെയിനിനെതിരായ യൂറോ ക്വാളിഫയർ മത്സരത്തിലാണ് റോബർട്സണ് പരിക്കേറ്റത്. സ്പാനിഷ് കീപ്പർ ഉനയ് സിമോണുമായി കൂട്ടിയിടിക്കുകയായിരുന്നു താരം. തുടർന്ന് വലത് തോളിന് വേദന അനുഭവപ്പെട്ടത്തോടെ ആദ്യ പകുതിയിൽ തന്നെ കളം വിട്ടു. ഷോൾഡർ ഡിസ്‌ലോകെഷനാണ് താരത്തിന് സംഭവിച്ചിരിക്കുന്നത്.

“റോബർട്സനെ ശസ്ത്രക്രിയക്ക് വിധേയനാക്കാൻ തന്നെയാണ് നിലവിലെ തീരുമാനം”, ക്ലോപ്പ് പറഞ്ഞു, “മറ്റ് വഴികളും തേടിയിരുന്നെങ്കിലും വിദഗ്ധരുമായി ആലോചിച്ച ശേഷം ശസ്ത്രക്രിയ തന്നെയാണ് ഉചിതമായ പരിഹാരം എന്നു തീരുമാനിച്ചു. ദീർഘകാലത്തേക്ക് പരിക്കിനെ മാറ്റി നിർത്താനും അതാണ് നല്ലത്. എന്നാൽ എന്നത്തേക്ക് താരത്തിന് തിരിച്ചു വരാൻ സാധിക്കും എന്ന് തനിക്കും പറയാൻ ആവില്ല”. ലെഫ്റ്റ് ബാക്ക് സ്ഥാനത് സിമികസ് ആണ് ക്ലോപ്പിന് മുന്നിലുള്ള പകരക്കാരൻ. എന്നാൽ ജോ ഗോമസിനും ഈ സ്ഥാനത്ത് ഇറങ്ങാൻ സാധിക്കും എന്നും കൂടുതൽ മത്സരങ്ങൾ മുന്നിലുള്ള സാഹചര്യത്തിൽ ഒന്നിൽ കൂടുതൽ താരങ്ങൾ ഈ സ്ഥാനത്തേക്ക് ടീമിൽ ഉള്ളത് വളരെ ആശ്വാസമാണെന്നും ക്ലോപ്പ് ചൂണ്ടിക്കാണിച്ചു. ഏതായാലും ജനുവരിയോടെ മാത്രമേ റോബർട്സന്റെ തിരിച്ചു വരവ് ഉണ്ടാവുകയുള്ളൂ എന്നാണ് സൂചനകൾ.

ലിവർപൂൾ – ടോട്ടനം മത്സരത്തിലെ റഫറിയിങ്ങിലെ പിഴവ് തീർത്ത അലയൊലികൾ തീരുന്നില്ല. ഈ പ്രശ്‌നത്തിൽ ഏറ്റവും ന്യായമായ പരിഹാരം മത്സരം വീണ്ടും നടത്തുന്നത് ആയിരിക്കുമെന്ന് ക്ലോപ്പ് അഭിപ്രായപ്പെട്ടു. യൂറോപ്പ മത്സരത്തിന് മുന്നോടിയായി വാർത്താ സമ്മേളനത്തിൽ പങ്കെടുക്കുകയായിരുന്നു അദ്ദേഹം. “പലരും എന്നിൽ നിന്നും ഇത് കേൾക്കാൻ ആഗ്രഹിക്കുന്നുണ്ടാവില്ല. എന്നാൽ പരിശീലകൻ എന്ന നിലയിൽ അല്ല, ഒരു സാധാരണ ഫുട്ബോൾ പ്രേമി എന്ന നിലയിൽ പറയുന്നു, ഈ പ്രശ്നത്തിനുള്ള ഏറ്റവും ന്യായമായ പരിഹാരം മത്സരം വീണ്ടും നടത്തുന്നതാണ്. എന്നാൽ അത് സംഭവിക്കാൻ സാധ്യത ഇല്ലെന്ന് തനിക്ക് അറിയാം. കാരണം ഇത് വരെ അങ്ങനെ ഒന്ന് സംഭിച്ചിട്ടില്ല എന്നത് തന്നെ”, ക്ലോപ്പ് പറഞ്ഞു. ഒരു പക്ഷെ അങ്ങനെ ഒരു കീഴ്വഴക്കം തുടങ്ങിയാൽ എല്ലാവരും റീ മാച്ച് ആഹ്വാനവുമായി മുന്നോട്ടു വരും എന്നതും ഒരു കാരണമാണെന്നും ക്ലോപ്പ് അഭിപ്രായപ്പെട്ടു.

ഡിയാസിന്റെ ഗോൾ “വാർ” പരിശോധനക്ക് ശേഷവും ഓഫ്സൈഡ് ആയി തുടരുന്നതാണ് വിവാദമായത്. എന്നാൽ ഈ കാര്യത്തിൽ റഫറി അടക്കമുള്ളവർ അറിഞ്ഞു കൊണ്ട് വരുത്തിയ പിഴവ് അല്ല ഇതെന്ന് ക്ലോപ്പ് ചൂണ്ടിക്കാണിച്ചു. പക്ഷെ ഇത്തരം പ്രശ്‌നങ്ങൾക്ക് ഭാവിയിൽ പരിഹാരം കാണേണ്ടതുണ്ടെന്നും അദ്ദേഹം അഭിപ്രായപ്പെട്ടു. റഫറിമാരുടേതായി പുറത്തു വിട്ട ഓഡിയോ ക്ലിപ്പും സ്ഥിതിയിൽ യാതൊരു മാറ്റവും വരുത്താൻ പോന്നതല്ലെന്ന് ക്ലോപ്പ് കൂട്ടിച്ചേർത്തു. ഈ വിഷയത്തിൽ തനിക്ക് ആർക്കു നേരെയും ദേഷ്യമില്ലെന്നും, പിഴവ് വരുത്തിയവർക്ക് വലിയ കുറ്റബോധമുണ്ടെന്ന് തനിക്കുറപ്പാണെന്നും ഇതിന്റെ പേരിൽ ഇനി ആരെങ്കിലും ശിക്ഷ ഏൽക്കേണ്ടി വരരുതെന്നും ക്ലോപ്പ് പറഞ്ഞു.

പ്രീ സീസണിൽ രണ്ടാം സന്നാഹ മത്സരത്തിന് ഇറങ്ങിയ ലിവർപൂളിന് സമനില. എട്ടു ഗോളുകൾ കണ്ട മത്സരത്തിൽ 89ആം മിനിറ്റിൽ സല രക്ഷകനായി അവതരിച്ചപ്പോൾ ക്ലോപ്പും സംഘവും ബുണ്ടസ്ലീഗ രണ്ടാം ഡിവിഷൻ ടീമായ ഗ്ര്യൂത്തർ ഫുർതിനോട് തോൽവി ഒഴിവാക്കുകയായിരുന്നു. ഇംഗ്ലീഷ് ടീമിന്റെ രണ്ടാം പ്രീ സീസൺ മത്സരമായിരുന്നു ഇത്. സല, ലൂയിസ് ഡിയാസ് എന്നിവർ ഓരോ ഗോളുകൾ നേടിയപ്പോൾ ഡാർവിൻ ന്യൂനസ് രണ്ടു തവണ വല കുലുക്കി. തുടർന്നുള്ള പ്രീ സീസൺ ഒരുക്കങ്ങൾക്ക് വേണ്ടി ലിവർപൂൾ സിംഗപ്പൂരിലേക്ക് തിരിക്കും.

പരിക്ക് മൂലം പുതിയ താരം ഡൊമിനിക് സോബോസ്ലായി ഇല്ലാതെയാണ് ലിവർപൂൾ ഇറങ്ങിയത്. അർനോൾഡ് മധ്യനിരയിൽ ഇടം കണ്ടെത്തിയപ്പോൾ ഗാക്പോ, ജോട്ട, ഡിയാസ്, വാൻ ഡൈക്ക്, റോബിൻസൻ, അലിസൻ എന്നിവരും ആദ്യ ഇലവനിൽ തന്നെ എത്തി. 22ആം മിനിറ്റിൽ ഡ്രിബ്ബിൾ ചെയ്തു ബോക്സിലേക്ക് കയറി വല കുലുക്കിയ ഡിയാസിലൂടെ ലിവർപൂൾ ആണ് ആദ്യം ഗോൾ നേടിയത്.

രണ്ടാം പകുതിയുടെ തുടക്കത്തിൽ പകരക്കാരൻ കീപ്പർ അഡ്രിയന്റെ പിഴവിൽ ജർമൻ ടീം സമനില നേടി. എന്നാൽ 50ആം മിനിറ്റിൽ ന്യൂനസ് ടീമിന്റെ ലീഡ് തിരിച്ചു പിടിച്ചു. സലയാണ് അസിസ്റ്റ് നൽകിയത്. പിന്നീട് ഒരിക്കൽ കൂടി സല ഉയർത്തി നൽകിയ ബോൾ പിടിച്ചെടുത്തത് കുതിച്ച് ന്യൂനസ് ലിവർപൂളിന്റെ മൂന്നാം ഗോളും കണ്ടെത്തി. എന്നാൽ പിന്നീട് ഫുർത്ത് തുടർച്ചായി തിരിച്ചടിക്കുന്നതാണ് കണ്ടത്. വെറും ഒൻപത് മിനിറ്റുകൾക്കുള്ളിൽ അവർ മൂന്ന് ഗോളുകൾ ലിവർപൂൾ വലയിൽ നിക്ഷേപിച്ചു. ലൂക്കാസ് പെറ്റ്കോവ് ഒരു ഗോൾ നേടിയപ്പോൾ അർമിന്റോ സിയെബ് രണ്ടു തവണ വല കുലുക്കി സ്വന്തം ടീമിന് ലീഡും സമ്മാനിച്ചു. 89ആം മിനിറ്റിൽ ഇടത് വിങ്ങിൽ നിന്നും ന്യൂനസ് നൽകിയ ബോൾ അനായാസം വലയിൽ എത്തിച്ച് സല ലിവർപൂളിനെ തോൽവിയിൽ നിന്നും കരകയറ്റി.