ശ്രീകാന്ത് ജാഥവിന്റെയും പ്രശാന്ത് റായിയുടെയും റെയിഡിംഗ് മികവില്‍ ഡല്‍ഹിയെ 38-36 എന്ന സ്കോറിനു കീഴടക്കി യുപി. ഇന്ന് നടന്ന ആവേശകമായ മത്സരത്തില്‍ ഡല്‍ഹിയുടെ കടുത്ത ചെറുത്ത്നില്പിനെ മറികടന്നാണ് ടീമിന്റെ വിജയം. ലീഡ് നില മാറി മറിഞ്ഞ മത്സരത്തില്‍ പകുതി സമയത്ത് 8 പോയിന്റ് ലീഡ് യുപി സ്വന്തമാക്കിയെങ്കിലും ശക്തമായ തിരിച്ചുവരവ് ഡല്‍ഹി നടത്തിയെങ്കിലും ടീമിനു വിജയം പിടിച്ചെടുക്കാന്‍ സാധിച്ചില്ല. ഹാള്‍ ടൈമില്‍ യുപി 25-17നു മുന്നിലായിരുന്നു.
ഡല്‍ഹിയ്ക്കായി നവീന്‍ കുമാര്‍ 13 പോയിന്റ് നേടി മത്സരത്തിലെ ടോപ് സ്കോറര്‍ ആയപ്പോള്‍ ചന്ദ്രന്‍ രഞ്ജിത്ത് 11 പോയിന്റുമായി മികച്ച പിന്തുണ നല്‍കി. യുപി നിരയില്‍ ശ്രീകാന്ത് 12 പോയിന്റും പ്രശാന്ത് റായി 11 പോയിന്റും നേടി. 25-24നു റെയിഡിംഗില്‍ നേരിയ ലീഡ് യുപി സ്വന്തമാക്കിയപ്പോള്‍ 9-8നു പ്രതിരോധ പോയിന്റുകളിലും ടീം മുന്നിട്ട് നിന്നു. രണ്ട് തവണ ഡല്‍ഹി ഓള്‍ഔട്ട് ആയപ്പോള്‍ യുപിയ്ക്ക് ഒരു തവണ കാലിടറി. 2 അധിക പോയിന്റുകള്‍ നേടി ഡല്‍ഹി ആ മേഖലയില്‍ മികച്ച് നിന്നു.
