പ്രൊകബഡി ലീഗില്‍ ഇന്ന് നടന്ന രണ്ടാം മത്സരത്തില്‍ ജയം സ്വന്തമാക്കി പുനേരി പള്‍ട്ടന്‍. ഒരു പോയിന്റിന്റെ വ്യത്യാസത്തിലാണ് പൂനെ യു മുംബയെ വീഴ്ത്തിയത്. 17-12 എന്ന സ്കോറിനു 5 പോയിന്റ് ലീഡ് പൂനെയ്ക്ക് ആദ്യ പകുതിയില്‍ നേടാനായെങ്കിലും അധികം വൈകാതെ മുംബൈ മത്സരത്തിലേക്ക് ശക്തമായ തിരിച്ചുവരവ് നടത്തുകയായിരുന്നു. മത്സരം അവസാനിക്കുവാന്‍ രണ്ട് മിനുട്ടുള്ളപ്പോള്‍ 31-31 എന്ന സ്കോറില്‍ ടീമുകളെത്തിയെങ്കിലും 33-32നു വിജയം പൂനെ സ്വന്തമാക്കി.
നിതിന്‍ തോമര്‍ 13 പോയിന്റുമായി പൂനെയ്ക്കായി തിളങ്ങിയപ്പോള്‍ 15 പോയിന്റ് നേടിയ മുംബൈ താരം സിദ്ധാര്‍ത്ഥ് ദേശായി ആണ് മത്സരത്തിലെ ടോപ് സ്കോറര്‍. 21-19നു റെയിഡിംഗില്‍ മുംബൈയ്ക്കായിരുന്നു നേരിയ മുന്‍തൂക്കം. പ്രതിരോധത്തില്‍ ഇരു ടീമുകളും എട്ട് പോയിന്റ് നേടി ഒപ്പം നിന്നു. ഇരു ടീമുകളും ഓരോ തവണ ഓള്‍ഔട്ട് ആയപ്പോള്‍ 4-1നു പൂനെ അധിക പോയിന്റുകളില്‍ മുന്നിട്ട് നിന്നു.
