പുനേരി പള്‍ട്ടനെതിരെ മികച്ച വിജയം നേടി യു മുംബ. ഇന്ന് നടന്ന ആദ്യ മത്സരത്തില്‍ 31-22 എന്ന സ്കോറിനാണ് മുംബൈയുടെ ജയം. പകുതി സമയത്ത് 19-10നു മുംബൈ ലീഡ് ചെയ്യുകയായിരുന്നു. രണ്ടാം പകുതിയില്‍ ഇരു ടീമുകളും 12 വീതം പോയിന്റ് നേടിയെങ്കിലും ആദ്യ പകുതിയുടെ മികവിന്റെ പുറത്ത് ജയം മുംബൈ കരസ്ഥമാക്കി.
അഭിഷേക് സിംഗ് 7 പോയിന്റുമായി മുംബൈയുടെ ടോപ് സ്കോറര്‍ ആയപ്പോള്‍ സുരേന്ദര്‍ സിംഗ്, വിനോദ് കുമാര്‍, ഫസല്‍ അത്രച്ചാലി എന്നിവര്‍ നാല് വീതം പോയിന്റ് നേടി. പൂനെയ്ക്കായി 4 പോയിന്റ് നേടിയ മോറെ ആണ് ടോപ് സ്കോററായത്.
11-7നു റെയിഡിംഗിലും 14-12നു ടാക്കിള്‍ പോയിന്റിലും മുംബൈ ലീഡ് നേടി. രണ്ട് തവണ പൂനെയെ ഓള്‍ഔട്ട് ആക്കിയും മുംബൈ ആധിപത്യം ഉറപ്പിയ്ക്കുകയായിരുന്നു. അധിക പോയിന്റില്‍ 3-2നു പൂനെ ലീഡ് ചെയ്തു.
