Category: Olympics

കൊറോണ വൈറസ് മൂലം 2020 ലെ ടോക്കിയോ ഒളിമ്പിക്‌സ് നടത്താൻ എന്തെങ്കിലും തടസം നേരിടുന്നു എങ്കിൽ നടത്താൻ ലണ്ടൻ തയ്യാർ ആണെന്ന് ലണ്ടൻ മേയർ സാദിഖ് അലി ഖാന്റെ സഹായി വ്യക്തമാക്കി. എല്ലാവരും ടോക്കിയോ ഒളിമ്പിക്സിന് ഒരുങ്ങുക ആണെന്ന് പറഞ്ഞ അദ്ദേഹം എന്തെങ്കിലും കാരണവശാൽ ഗെയിംസിന് തടസം നേരിട്ടാൽ ലണ്ടൻ എന്നത്തേയും പോലെ എന്തും നേരിടാൻ തയ്യാർ ആണെന്ന് വ്യക്തമാക്കി. സമീപകാലത്ത് 2012 ലെ ഒളിമ്പിക്‌സ് വിജയകരമായി നടത്തിയ പരിചയവും ലണ്ടന് മുതൽക്കൂട്ടായി ഉണ്ട്. അതേസമയം വിചാരിച്ച പോലെ ഒളിമ്പിക്‌സ് ടോക്കിയോയിൽ നടക്കും എന്ന പ്രതീക്ഷയിൽ തന്നെയാണ് അന്താരാഷ്ട്ര ഒളിമ്പിക്‌സ് അസോസിയേഷൻ. കൊറോണ വൈറസ് കാരണം ചൈനീസ് ഗ്രാന്റ് പ്രീ, ടോക്കിയോ മാരത്തോൺ തുടങ്ങിയ പലതും മാറ്റി വച്ചിരുന്നു.

നിലവിൽ ജപ്പാനിലും കൊറോണ മൂലം മരണങ്ങൾ സ്ഥിരീകരിച്ചിരുന്നു. ഏഷ്യയിൽ പലയിടത്തും കൊറോണക്ക് എതിരെ വലിയ മുന്നറിയിപ്പ് നിലനിൽക്കുന്നത് ആണ് ഒളിമ്പിക്‌സ് നടത്തിപ്പിനെ കുറിച്ച് ആശങ്ക ഉയരാൻ കാരണം. എന്തെങ്കിലും സാഹചര്യത്തിൽ ഒളിമ്പിക്‌സ് നടത്തേണ്ടി വന്നാൽ നടത്താൻ വേണ്ട എല്ലാ സൗകര്യങ്ങളും ലണ്ടനിൽ ഉണ്ടെന്നു മുൻ കായിക മന്ത്രി ആയ ട്രാസി ക്രോച്ചും വ്യക്തമാക്കി. ലണ്ടൻ എന്തിനും സജ്ജമാകണം എന്നു ആവശ്യപ്പെട്ട കൺസർവേറ്റീവ് മേയർ സ്ഥാനാർഥി ഷോൺ ബെയ്ലി വിന്റർ, സമ്മർ ഒളിമ്പിക്‌സുകൾക്ക് ആതിഥ്യം വഹിക്കേണ്ടി വന്നാലും ലണ്ടൻ ഒരുങ്ങി ഇരിക്കണം എന്നും ആവശ്യപ്പെട്ടു. മേയർ ആയി തിരഞ്ഞെടുക്കപ്പെട്ടാൽ ഏറ്റവും മികച്ച ഒളിമ്പിക്‌സ് താൻ ഉറപ്പാക്കും എന്നും അദ്ദേഹം പറഞ്ഞു. അതേസമയം ആശങ്കകൾ വെറുതെ ആവും എന്ന പ്രതീക്ഷയിൽ ആണ് അന്താരാഷ്ട്ര ഒളിമ്പിക് കമ്മിറ്റിയും ടോക്കിയോ അധികൃതരും.

കൊറോണ വൈറസ് കാരണം ഒളിമ്പിക്സ് മത്സരങ്ങൾ നീട്ടി വക്കും, ഒഴിവാക്കും തുടങ്ങിയ അസത്യ പരാമർശങ്ങൾ നടത്തുന്നവർക്ക് എതിരെ രൂക്ഷ വിമർശനവുമായി ടോക്കിയോ ഒളിമ്പിക്‌സ് സി.ഇ. ഒ യോഷിറോ മോരി. കൊറോണ വൈറസിനെ സംബന്ധിച്ച് നിരവധി കള്ള പ്രചരണങ്ങൾ നടക്കുന്നത് ആയി പറഞ്ഞ അദ്ദേഹം ഗെയിംസ് നീട്ടിവക്കുന്നതിനെ പറ്റിയോ ഉപേക്ഷിക്കുന്നതിനെ പറ്റിയോ ഇത് വരെ ആലോചിച്ചു കൂടിയില്ലെന്നും വ്യക്തമാക്കി. ഒളിമ്പിക്‌സ് നടക്കാൻ ഇനി ഏതാണ്ട് 161 ദിവസങ്ങൾ മാത്രം ബാക്കിയുള്ളപ്പോൾ ഇത് പോലുള്ള കള്ള പ്രചാരണങ്ങൾ അനാവശ്യമാണെന്നും അദ്ദേഹം പറഞ്ഞു.

ജപ്പാൻ ഭരണകൂടവുമായി സഹകരിച്ചു തങ്ങൾ ശ്രദ്ധേയോടെ ഒളിമ്പിക്‌സ് ഒരുക്കങ്ങൾ തുടരുകയാണ് എന്നും അദ്ദേഹം കൂട്ടിച്ചേർത്തു. ഇതിനകം തന്നെ ഏഷ്യയിൽ നിരവധി കായിക ഇനങ്ങൾ കൊറോണ ഭീതി മൂലം മാറ്റി വെക്കുകയോ ഉപേക്ഷിക്കുകയോ ചെയ്തിരുന്നു. എന്നാൽ പൂർണസുരക്ഷക്ക് ആവശ്യമായ എല്ലാ മുന്നൊരുക്കങ്ങളും തങ്ങൾ എടുക്കും എന്നാണ് ടോക്കിയോ മേയർ യൂരിക്കോ കോയിക്കെ ഉറപ്പ് നൽകിയത്. ഇതിനകം കൊറോണ മൂലം മരണങ്ങൾ ഒന്നും സംഭവിച്ചില്ല എങ്കിലും ജപ്പാനിൽ 28 പേർക്ക് ആണ് കൊറോണ സ്ഥിരീകരിച്ചത്, ഇവരിൽ 4 പേർ ഇപ്പോഴും ഗുരുതര അവസ്ഥയിലും ആണ്.

കൂടാതെ 174 യാത്രക്കാർ ഉള്ള ജപ്പാൻ ആഡംബര കപ്പലിൽ നിരവധി പേർക്കും കൊറോണ സ്ഥിരീകരിച്ചിരുന്നു, ഇവർ ഇപ്പോഴും കപ്പലിൽ തുടരുകയാണ്. കൊറോണ വൈറസ് ഭീക്ഷണി എന്ന് ഒഴിവാകും എന്ന കാര്യത്തിൽ വ്യക്തത ഇല്ലാത്തതിനാൽ തന്നെ പലരും ഒളിമ്പിക്‌സ് നടത്തിപ്പിൽ ഇതിനകം ആശങ്കകൾ അറിയിക്കുന്നുണ്ട്. എന്നാൽ എല്ലാം നല്ല നിലയിൽ നടക്കും എന്ന പ്രതീക്ഷയിൽ ആണ് ജപ്പാൻ അധികൃതരും ഒളിമ്പിക് കമ്മിറ്റിയും. ചൈനയിൽ നിന്ന് ആരംഭിച്ച കൊറോണ വൈറസ് മൂലം ഇതിനകം തന്നെ ഏതാണ്ട് 1400 മരണങ്ങൾ സ്ഥിരീകരിച്ചു കഴിഞ്ഞു. ഏതാണ്ട് 25 രാജ്യങ്ങളിൽ ആയി ഏതാണ്ട് 60,000 ആളുകളിൽ കൊറോണ വൈറസ് ബാധിച്ചു എന്നാണ് കണക്കുകൾ. കൊറോണ ഒളിമ്പിക്‌സിന്റെ ശോഭ കെടുത്തില്ല എന്ന് തന്നെ നമുക്ക് ഇപ്പോൾ പ്രതീക്ഷിക്കാം.

2020-21 വർഷത്തെ കേന്ദ്രസർക്കാർ ബഡ്ജറ്റിൽ കായികമേഖലക്ക് വലിയ നിരാശ. ടോക്കിയോ ഒളിമ്പിക്സ് ഈ വർഷം നടക്കാൻ ഇരിക്കെ കായികമേഖലക്ക് പ്രത്യേക ഊന്നൽ നിർമല സീതാരാമന്റെ ബഡ്ജറ്റിൽ പ്രതീക്ഷിച്ച കായികമേഖലക്ക് പക്ഷെ നിരാശ ആയിരുന്നു ഫലം. കടുത്ത സാമ്പത്തിക ഞെരുക്കം നേരിടുന്ന രാജ്യത്തിൽ പല മേഖലകളിലും ഫണ്ട് വെട്ടിക്കുറച്ച സർക്കാർ കഴിഞ്ഞ വർഷത്തെക്കാൾ വെറും 50 കോടി മാത്രം ആണ് ഈ വർഷം നീക്കി വച്ചത്. കഴിഞ്ഞ വർഷം 2776.92 കോടി രൂപ കായികമേഖലക്ക് നീക്കി വച്ച സർക്കാർ ഈ വർഷം 2826.92 കോടിയാണ് കായികമേഖലക്ക് ആയി വകയിരുത്തിയത്. എന്നാൽ ഒളിമ്പിക്സ് നടക്കാൻ ഇരിക്കുന്ന വർഷത്തിൽ ഈ വർധന ഒന്നുമല്ല എന്നതാണ് വാസ്തവം.

കളിക്കാർക്ക് ആയുള്ള ബോണസുകൾ ഒക്കെ 111 കോടിയിൽ നിന്ന് 70 കൊടിയിലേക്ക് ആണ് സർക്കാർ കുറച്ചത്. അതേസമയം ദേശീയ കായിക ഫെഡറേഷനായി കഴിഞ്ഞ വർഷത്തെക്കാൾ 55 കോടി രൂപ കുറച്ച് ആണ് ബഡ്ജറ്റിൽ നീക്കി വച്ചത്‌. ഇന്ത്യൻ കായിക മേഖലയിലെ ഏറ്റവും നിർണായകമായ സായിക്കുള്ള ധനസഹായം ആവട്ടെ കഴിഞ്ഞ വർഷത്തെ 615 കോടിയിൽ നിന്ന് 500 കോടി ആയും കുറച്ചു. കായിക വികസനത്തിനായിട്ടുള്ള ധനസഹായം 77.15 കോടിയിൽ നിന്ന് 50 കോടി ആയും സർക്കാർ കുറച്ചു. അതേസമയം ഈ സർക്കാർ ഏറ്റവും വലിയ ആഘോഷമായി നടത്തുന്ന ഖേലോ ഇന്ത്യക്ക് ആയി 291.42 കോടിയാണ് മാറ്റി വച്ചത്‌. സ്‌കൂൾ തല, കോളേജ് തല വികസനം നല്ലത് ആണെങ്കിലും കായിക രംഗത്തെ ഏറ്റവും നിർണായകമായ ഒളിമ്പിക്‌സിന്റെ വർഷത്തിൽ കായികമേഖലക്ക് വലിയ പരിഗണന നൽകാത്ത ബഡ്ജറ്റ് വലിയ നിരാശയാണ് കായികലോകത്തിന് നൽകിയത്.

2032ലെ ഒളിമ്പിക്സിന് ആതിഥ്യം വഹിക്കാനായി ഇന്തോനേഷ്യ ഔദ്യോഗികമായി അപേക്ഷ നൽകി. കഴിഞ്ഞ വർഷം ഏഷ്യൻ ഗെയിംസ് നടത്തി വിജയിച്ചതാണ് ഒളിമ്പിക്സിന് അപേക്ഷ നൽകാൻ ഇന്തോനേഷ്യയെ പ്രേരിപ്പിച്ചത്. ഇന്ത്യയും ഒപ്പം രണ്ട് കൊറിയകൾ സംയുക്തമായും 2032 ഒളിമ്പിക്സിന് വേണ്ടി അപേക്ഷ കൊടുത്തിട്ടുണ്ട്. 2025ൽ മാത്രമെ ആര് ആതിഥ്യം വഹിക്കുമെന്ന് അന്തിമ തീരുമാനം ആവുകയുള്ളൂ.

2020ൽ ടോക്കിയോയും, 2024 പാരീസും, 2028ൽ ലോസ് ഏഞ്ചൽസും ആകും ഒളിമ്പിക്സിനായി ആതിഥ്യം വഹിക്കുന്നത്. 2032 ഒളിമ്പിക്സ് നടത്താൻ ഇന്ത്യക്ക് അവസരം കിട്ടുമെന്ന പ്രതീക്ഷയിൽ ഇന്ത്യ നേരത്തെ തന്നെ അപേക്ഷ നൽകിയിരുന്നു.

2032 ഒളിമ്പിക്സ് വേദി സ്വന്തമാക്കാൻ ഇരു കൊറിയകളും കൈകോർക്കുന്നു. നോർത്ത് കൊറിയയും സൗത്ത് കൊറിയയും സംയുകതമായാണ് ഒളിമ്പിക്സ് വേദിക്കായി ശ്രമിക്കുന്നത്. 2032ഒളിമ്പിക്സ് വേദിക്കായി ഇന്തോനേഷ്യയും ഇന്ത്യയും ശ്രമിക്കുന്നുണ്ട്.

2020 ടോക്കിയോ സമ്മർ ഗെയിംസിൽ സംയുക്ത ടീമുകളെ അയക്കാനും നോർത്ത് -സൗത്ത് കൊറിയൻ പ്രസിഡന്റുമാരുടെ യോഗത്തിൽ തീരുമാനമായിട്ടുണ്ട്. വിന്റർ ഒളിമ്പിക്സ് നടന്നപ്പോൾ ഇരുരാജ്യങ്ങളിലെയും താരങ്ങൾ ഒന്നിച്ചായിരുന്നു മാർച്ച് പാസ്റ്റിൽ പങ്കെടുത്തത്.