ജംഷദ്പൂരിനോട് സമനില വഴങ്ങി മുംബൈ സിറ്റി

ഇന്ത്യൻ സൂപ്പർ ലീഗിൽ മുംബൈ സിറ്റിക്ക് ജംഷദ്പൂരിനോട് സമനില. ഇന്ന് നടന്ന മത്സരത്തിൽ ജംഷഡ്പൂരിന്റെ ഹോം ഗ്രൗണ്ടിൽ വച്ച് 1-1 എന്ന സമനിലയാണ് മുംബൈ സിറ്റി വഴങ്ങിയത്. അവസാന 10 മിനിറ്റുകളോളം ജംഷഡ്പൂർ 10 പേരുമായി ആണ് കളിച്ചത് എങ്കിലും പരാജയം ഒഴിവാക്കാൻ അവർക്ക് ആയി.

ഇന്നത്തെ സമനില കൊണ്ട് മുംബൈ സിറ്റിക്ക് ലീഗിൽ ഒന്നാമത് എത്താൻ ആയി. ഇന്ന് രണ്ടാം പകുതിയിലാണ് രണ്ടു ഗോളുകളും പിറന്നത്. ആദ്യം അറുപതാം മിനിറ്റിൽ സിവേറിയോ ആണ് ജംഷദ്പൂരന് ലീഡ് നൽകിയത്‌. ഇതിനു മറുപടിയായി 74ആം മിനിറ്റിൽ യുവതാരം ചാങ്തെ സമനില ഗോൾ നേടി‌.

82ആം മിനിറ്റിൽ രണ്ടാം മഞ്ഞക്കാർഡ് വാങ്ങി ചിമ ചുക്വ പുറത്തുപോയി. എന്നിട്ടും സമനിലയിൽ പിടിച്ചുനിൽക്കാൻ ജംഷദ്പൂരിനായി. ഈ സമനിലയോടെ 36 പോയിന്റുമായി മുംബൈ സിറ്റി ലീഗിൽ ഒന്നാമത് നിൽക്കുകയാണ്. 21 പോയിന്റുമായി ജംഷഡ്പൂർ ആറാം സ്ഥാനത്തേക്കും എത്തി.