Category: Women Football

വലിയ സമ്മർദ്ദങ്ങൾക്ക് ഒടുവിൽ ആഴ്‌സണൽ വനിത ടീം പരിശീലകൻ ആയ ജൊനാസ് എയിഡവാൾ രാജി വെച്ചു. കഴിഞ്ഞ 3 കൊല്ലമായി ആഴ്‌സണൽ പരിശീലകൻ ആയ ജൊനാസ് ക്ലബിന് 2 തവണ ലീഗ് കപ്പ് കിരീടം നേടി നൽകിയിട്ടുണ്ട്. എന്നാൽ പുതിയ സീസണിൽ വളരെ മോശം തുടക്കം ആണ് ക്ലബിന് ഉണ്ടായത്. ലീഗിൽ കളിച്ച നാലു കളികളിൽ നിന്നു ഒരു ജയം അടക്കം 5 പോയിന്റുകൾ മാത്രം ആണ് നിലവിൽ ആഴ്‌സണലിന് ഉള്ളത്.

ചാമ്പ്യൻസ് ലീഗിൽ ബയേണിനോട് 5-2 ന്റെ കനത്ത പരാജയം ഏറ്റുവാങ്ങിയതും ജൊനാസിന് തിരിച്ചടിയായി. സീസണിൽ ക്ലബ് സൂപ്പർ താരം വിവിയനെ മിയദെമയുടെ കരാർ പുതുക്കേണ്ട എന്ന തീരുമാനം അടക്കം പരിശീലകരിൽ ആരാധകർ തൃപ്തർ അല്ലായിരുന്നു. നിലവിൽ പരിശീലകനു കീഴിൽ കളിക്കാൻ പല ആഴ്‌സണൽ താരങ്ങൾക്കും അതൃപ്തി ഉണ്ടെന്നും റിപ്പോർട്ട് ഉണ്ടായിരുന്നു. നിലവിൽ സഹപരിശീലക റീനെ സ്ലെജേർസ് ആഴ്‌സണലിന്റെ താൽക്കാലിക ചുമതല ഏറ്റെടുക്കും.

വനിത സൂപ്പർ ലീഗ് രണ്ടാം മത്സരത്തിൽ സീസണിലെ ആദ്യ ജയം കുറിച്ച് ആഴ്‌സണൽ വനിതകൾ. മാഞ്ചസ്റ്റർ സിറ്റിയോട് ആദ്യ മത്സരത്തിൽ സമനില വഴങ്ങിയ ആഴ്‌സണൽ ലെസ്റ്റർ സിറ്റിയുടെ മികച്ച പോരാട്ടം അതിജീവിച്ചു ആണ് ഏകപക്ഷീയമായ ഒരു ഗോളിന് ജയം കണ്ടത്.

ആഴ്‌സണൽ ആധിപത്യം കണ്ട മത്സരത്തിൽ രണ്ടാം പകുതിയിൽ ലെസ്റ്റർ സിറ്റിയുടെ പിഴവിൽ നിന്നു അലസിയോ റൂസോ നൽകിയ പാസിൽ നിന്നു 55 മത്തെ മിനിറ്റിൽ ഫ്രിദ മാനം ആണ് ആഴ്‌സണലിന് വിജയഗോൾ സമ്മാനിച്ചത്. ജയത്തോടെ ലീഗിൽ ആഴ്‌സണൽ മൂന്നാം സ്ഥാനത്ത് എത്തി. ആദ്യ 2 കളികളും ജയിച്ച ചെൽസിയും, മാഞ്ചസ്റ്റർ യുണൈറ്റഡും ആണ് ആദ്യ 2 സ്ഥാനങ്ങളിൽ.

കടുത്ത സമ്മർദ്ദങ്ങൾക്ക് ഒടുവിൽ സ്പാനിഷ് ഫുട്‌ബോൾ ഫെഡറേഷൻ പ്രസിഡന്റ് ലൂയിസ് റുബിയാലസ് രാജി വെച്ചു. വനിത ലോകകപ്പ് വിജയത്തിന് ശേഷം സമ്മതം ഇല്ലാതെ സ്പാനിഷ് താരം ജെന്നി ഹെർമോസയെ ചുംബിച്ച റുബിയാലസ് കടുത്ത പ്രതിഷേധം ആണ് നേരിട്ടത്. തുടർന്ന് ഇതിനെ പ്രതിരോധിക്കാൻ റുബിയാലസും സ്പാനിഷ് ഫുട്‌ബോൾ ഫെഡറേഷനും നടത്തിയ ശ്രമങ്ങൾ കടുത്ത നാണക്കേട് ആണ് ഉയർത്തിയത്.

അന്താരാഷ്ട്ര സമ്മർദ്ദത്തിനു പുറമെ വ്യാഴാഴ്ച ഹെർമോസ കേസ് കൂടി നൽകിയതോടെ റുബിയാലസ് രാജി വെക്കാൻ നിർബന്ധിതൻ ആവുക ആയിരുന്നു. യുഫേഫ വൈസ് പ്രസിഡന്റ് സ്ഥാനവും റുബിയാലസ് ഒഴിയും. തന്റെ നിരപരാധിത്വം ഭാവിയിൽ തെളിയിക്കും എന്നും തനിക്ക് ഭാവിയിലും സത്യത്തിലും പ്രതീക്ഷ ഉണ്ട് എന്നുമാണ് രാജിക്ക് പിറകെ റുബിയാലസ് സാമൂഹിക മാധ്യമങ്ങൾ വഴി പ്രതികരിച്ചത്.

സ്പാനിഷ് ഫുട്‌ബോൾ ഫെഡറേഷൻ പ്രസിഡന്റ് ലൂയിസ് റൂബിയാലസിനെ അന്വേഷണ വിധേയനായി ഫിഫ സസ്‌പെന്റ് ചെയ്തു. 90 ദിവസത്തേക്ക് ആണ് ഫിഫ റൂബിയാലസിനെ സസ്‌പെന്റ് ചെയ്തത്. വനിത ലോകകപ്പ് ഫൈനലിന് ശേഷം സ്പാനിഷ് താരം ജെന്നി ഹെർമോസയെ അനുവാദം ഇല്ലാതെ ചുണ്ടിൽ ചുംബിച്ച റൂബിയാലസിന്റെ നടപടി ഫുട്‌ബോൾ ലോകത്ത് വലിയ കോളിളക്കം ആണ് സൃഷ്ടിച്ചത്. താൻ രാജി വെക്കില്ല എന്നു റുബിയാലസ് പ്രഖ്യാപിച്ചതും വിവാദം കടുപ്പിച്ചു. നിലവിൽ റൂബിയാലസിനോട് ഹെർമോസയെ ബന്ധപ്പെടാൻ പാടില്ല എന്നും ഫിഫ പറഞ്ഞിട്ടുണ്ട്.

അതേസമയം എല്ലാവരെയും ഞെട്ടിച്ചു ഹെർമോസക്ക് എതിരെ നിയമ നടപടി സ്വീകരിക്കും എന്നു സ്പാനിഷ് ഫുട്‌ബോൾ ഫെഡറേഷൻ പ്രഖ്യാപിച്ചിട്ടുണ്ട്. നിലവിൽ സ്പാനിഷ് ടീമിൽ റുബിയാലസിനെ മാറ്റുന്നത് വരെ ഇനി കളിക്കില്ലെന്നു ലോകകപ്പ് ജയിച്ച മുഴുവൻ താരങ്ങൾ അടക്കം എല്ലാവരും പ്രഖ്യാപിച്ചിട്ടുണ്ട്. അതേസമയം സ്പാനിഷ് ലോകകപ്പ് ടീമിലെ മുഖ്യ പരിശീലകൻ ഹോർജെ വിൽഡ ഒഴിച്ചു എല്ലാ പരിശീലക അംഗങ്ങളും രാജി വെച്ചത് ആയും റിപ്പോർട്ട് വന്നു. റുബിയാലസിന് എതിരെ ലാ ലീഗ ക്ലബ് സെവിയ്യയും ഔദ്യോഗികമായി രംഗത്ത് വന്നു.

സ്പാനിഷ് ഫുട്‌ബോൾ ഫെഡറേഷൻ പ്രസിഡന്റ് സ്ഥാനത്ത് നിന്ന് ലൂയിസ് റുബിയാലസ് ഒഴിയുന്നത് വരെ ഒരു മത്സരവും കളിക്കില്ലെന്നു ഒരുമിച്ച് തീരുമാനം എടുത്തു ലോകകപ്പ് നേടിയ സ്പാനിഷ് വനിത ടീം. ലോകകപ്പ് നേടിയ 23 അംഗങ്ങൾക്ക് പുറമെ 56 വനിത താരങ്ങളും ഒപ്പിട്ട് പുറത്തിറക്കിയ പത്രക്കുറിപ്പിൽ ആണ് സ്പാനിഷ് വനിത ടീം തങ്ങളുടെ നിലപാട് വ്യക്തമാക്കിയത്. സ്പാനിഷ് താരം ജെന്നി ഹെർമാസോയെ സമ്മതത്തോടെ ആണ് ചുംബിച്ചത്, തനിക്ക് എതിരെ നടക്കുന്ന നീക്കം കപട ഫെമിനിസം ആണ് എന്ന് തുടങ്ങിയ റുബിയാലസിന്റെ വാദങ്ങൾക്ക് എതിരെ ജെന്നി ഹെർമാസോയും രംഗത്ത് വന്നു.

തന്നെ അപ്രതീക്ഷിതമായി സമ്മതം ഇല്ലാതെയാണ് റുബിയാലസ് ചുംബിച്ചത് എന്നു പറഞ്ഞ ഹെർമാസോ ഇത്തരം ന്യായീകരണങ്ങൾ നൽകാൻ ഒരു സ്ത്രീയും നിർബന്ധിത ആവരുത് എന്നും കൂട്ടിച്ചേർത്തു. അതേസമയം സ്പാനിഷ് സർക്കാരിലെ വലിയ വിഭാഗം റുബിയാലസിന് എതിരെ രംഗത്ത് വന്നിരുന്നു. അതോടൊപ്പം റുബിയാലസിന് എതിരായ പ്രതിഷേധം കാരണം ചില സ്പാനിഷ് ഫെഡറേഷൻ അംഗങ്ങൾ രാജിയും വെച്ചിരുന്നു. ഇതിനു പുറമെ ഫിഫയും റുബിയാലസിന് എതിരായ അന്വേഷണവും ശിക്ഷാനടപടിയും തുടങ്ങിയിട്ടുണ്ട്. നിലവിൽ രാജ്യത്തിനു അകത്തും പുറത്തും നടക്കുന്ന ഈ കടുത്ത പ്രതിഷേധങ്ങൾ റുബിയാലസ് അതിജീവിക്കുമോ എന്നത് കണ്ടറിയാം.

സ്പാനിഷ് ഫുട്‌ബോളിനെ വീണ്ടും നാണക്കേടിലേക്ക് തള്ളി വിട്ട് സ്പാനിഷ് ഫുട്‌ബോൾ ഫെഡറേഷൻ പ്രസിഡന്റ് ലൂയിസ് റുബിയാലസ്. സ്‌പെയിൻ വനിതകളുടെ ലോകകപ്പ് വിജയത്തിന് ശേഷം സ്പാനിഷ് താരം ജെന്നി ഹെർമാസോയെ ബലം പ്രയോഗിച്ച് ചുംബിച്ച റുബിയാലസിന് എതിരെ കനത്ത പ്രതിഷേധങ്ങൾ ആണ് ഉയർന്നത്. തുടർന്ന് ഇന്ന് നടക്കുന്ന യോഗത്തിന് ശേഷം റുബിയാലസ് രാജി പ്രഖ്യാപിക്കും എന്നായിരുന്നു വാർത്തകൾ. എന്നാൽ ഫെഡറേഷൻ അംഗങ്ങളെ അഭിസംബോധന ചെയ്തു സംസാരിച്ച റുബിയാലസ് താൻ രാജി വെക്കില്ല എന്നു ആക്രോശിക്കുക ആയിരുന്നു.

ഹെർമാസോയുടെ സമ്മതത്തോടെ താരം മുൻ കൈ എടുത്താണ് താൻ താരത്തെ ചുംബിച്ചത് എന്നു പറഞ്ഞ റുബിയാലസ് അത് വലിയ ചുംബനം അല്ല എന്നും കപട ഫെമിനിസ്റ്റുകൾ ആണ് പ്രശ്നം ഉണ്ടാക്കുന്നത് എന്നും ആരോപിച്ചു. ഒപ്പം വനിത ഫുട്‌ബോൾ പരിശീലകൻ ഹോർഹെ വിൽഡക്ക് 2 മില്യൺ യൂറോ വാർഷിക വരുമാനത്തിൽ നാലു വർഷത്തെ കരാറും റുബിയാലസ് പരസ്യമായി ഓഫർ ചെയ്തു. താൻ രാജി വെക്കില്ല എന്നു റുബിയാലസ് പ്രഖ്യാപിക്കുമ്പോൾ സ്പാനിഷ് പുരുഷ, വനിത പരിശീലകർ അടക്കമുള്ള ഭൂരിഭാഗം അംഗങ്ങളും കയ്യടിക്കുക ആണ് എന്നത് സ്‌പെയിനിന് വലിയ നാണക്കേട് ഉണ്ടാക്കി.

സ്‌പെയിനിന്റെ വനിത ലോകകപ്പ് ഫൈനൽ വിജയത്തിന് ശേഷം മെഡൽ നൽകുന്ന ചടങ്ങിൽ സ്പാനിഷ് താരം ജെന്നി ഹെർമോസയുടെ ചുണ്ടിൽ അനുവാദം കൂടാതെ ചുംബനം നൽകിയ സ്പാനിഷ് ഫുട്‌ബോൾ അസോസിയേഷൻ പ്രസിഡന്റ് ലൂയിസ് റുബിയാലസ് നാളെ സ്ഥാനം ഒഴിഞ്ഞേക്കും എന്നു റിപ്പോർട്ട്. ലോകകപ്പ് വിജയത്തിന് ശേഷം സ്പാനിഷ് മാഹാരാജ്ഞിയും രാജകുമാരിയും അടുത്ത് നിൽക്കുമ്പോൾ ലോകം മൊത്തം കാണുമ്പോൾ ആണ് റുബിയാലസ് ഈ പ്രവർത്തനം നടത്തിയത്. ഡ്രസിങ് റൂമിലും തുടർന്ന് അദ്ദേഹം നടത്തിയ പരാമർശങ്ങളും വിമർശനം നേരിട്ടിരുന്നു.

തന്റെ അനുവാദം ഇല്ലാതെയാണ് റുബിയാലസ് തന്നെ ചുംബിച്ചത് എന്നു അപ്പോൾ തന്നെ തുറന്നു പറഞ്ഞ ഹെർമോസ തന്റെ പ്രതിഷേധം അറിയിച്ചിരുന്നു. നേരത്തെ രാജ്യത്തിനു അപമാനം ഉണ്ടാക്കിയ റുബിയാലസ് സ്ഥാനം ഒഴിയണം എന്നു ഗെറ്റഫെ, റയൽ സോസിദാഡ്, ഒസാസുന, അത്ലറ്റികോ മാഡ്രിഡ് എന്നീ നാലു സ്പാനിഷ് ക്ലബുകളും പരസ്യമായി ആവശ്യപ്പെട്ടിരുന്നു. കാഡിസും അവരുടെ പ്രതിഷേധം അറിയിച്ചിരുന്നു. തുടർന്ന് ഫിഫ ഔദ്യോഗികമായി റുബിയാലസിന് എതിരെയുള്ള നടപടികൾ സ്വീകരിക്കാനും തുടങ്ങിയിരുന്നു. ഇതിനു ഇടയിൽ ആണ് നാളെ നടക്കുന്ന പ്രത്യേക ഫുട്‌ബോൾ അസോസിയേഷൻ മീറ്റിങിൽ റുബിയാലസ് തന്റെ രാജി പ്രഖ്യാപിക്കും എന്ന വാർത്ത റുബിയാലസും ആയി അടുത്ത വൃത്തങ്ങളെ ഉദ്ധരിച്ച് സ്പാനിഷ് മാധ്യമങ്ങൾ റിപ്പോർട്ട് ചെയ്യുന്നത്. സ്പാനിഷ് ഫുട്‌ബോളിനും രാജ്യത്തിനു ഒട്ടാകെയും ഈ സംഭവം വലിയ നാണക്കേട് തന്നെയാണ് ഉണ്ടാക്കിയത്.

സ്‌പെയിൻ തങ്ങളുടെ പ്രഥമ വനിത ലോകകപ്പ് നേടിയതിനു പിന്നാലെ സങ്കടകരമായ വാർത്ത പുറത്ത് വിട്ടു സ്പാനിഷ് ഫുട്‌ബോൾ ഫെഡറേഷൻ. ലോകകപ്പ് ഫൈനലിൽ ഇംഗ്ലണ്ടിന് എതിരെ ഏക ഗോൾ നേടിയ ക്യാപ്റ്റൻ ഓൽഗ കാർമോണയുടെ അച്ഛന്റെ മരണ വാർത്തയാണ് അവർ പുറത്ത് വിട്ടത്. ലോകകപ്പ് ഫൈനലിന് മുമ്പ് താരത്തിന്റെ അച്ഛൻ മരിച്ചിരുന്നു എങ്കിലും താരം ഈ വാർത്ത അറിയുന്നത് ഫൈനലിന് ശേഷം ആയിരുന്നു.

ഈ ദുഖകരമായ നിമിഷത്തിൽ ഓൽഗക്കും കുടുംബത്തിനും ഒപ്പം നിൽക്കുന്നു എന്നു പറഞ്ഞ സ്പാനിഷ് ഫെഡറേഷൻ എല്ലാവരും താരത്തിന് ഒപ്പം ആണെന്നും ഓൽഗ സ്പാനിഷ് ചരിത്രത്തിന്റെ ഭാഗം ആണെന്നും കൂട്ടിച്ചേർത്തു. ലോകകപ്പ് ഫൈനലിൽ താൻ നേടിയ ഗോൾ ഈ അടുത്ത് തന്റെ അമ്മയെ നഷ്ടമായ തന്റെ ഏറ്റവും അടുത്ത സുഹൃത്തിന് ആയിരുന്നു ഓൽഗ സമർപ്പിച്ചത്. ജേഴ്‌സി ഉയർത്തി ആയിരുന്നു റയൽ മാഡ്രിഡ് താരമായ ഓൽഗ അത് പ്രകടിപ്പിച്ചത്.