എമിറേറ്റ്സിൽ മത്സരം കാണാൻ എത്തിയ വലിയ കാണികൾക്ക് മുന്നിൽ വനിത സൂപ്പർ ലീഗിൽ സീസണിലെ ആദ്യ ജയം കുറിച്ച് ആഴ്സണൽ വനിതകൾ. ആസ്റ്റൺ വില്ലക്ക് എതിരെ ഇഞ്ച്വറി സമയത്ത് നേടിയ രണ്ടു ഗോളുകളുടെ മികവിൽ 2-1 നു ആണ് ആഴ്സണൽ ജയം കുറിച്ചത്. കഴിഞ്ഞ കളിയിൽ മാഞ്ചസ്റ്റർ യുണൈറ്റഡിന് എതിരെ ഇഞ്ച്വറി സമയത്ത് സമനില നേടിയ ആഴ്സണൽ നന്നായി ആണ് മത്സരം തുടങ്ങിയത്. എന്നാൽ 25 മത്തെ മിനിറ്റിൽ ആഴ്സണലിനെ ഞെട്ടിച്ചു സ്റ്റാനിഫോർത്തിന്റെ ക്രോസിൽ നിന്നു ഹെഡറിലൂടെ പച്ചേകോ ഗോൾ നേടി.
രണ്ടാം പകുതിയിൽ ജയിക്കാൻ ആയി ആഴ്സണൽ നിരന്തരം ആക്രമണം നടത്തി. എന്നാൽ വില്ല പ്രതിരോധം ഇതെല്ലാം തടഞ്ഞു. 85 മത്തെ മിനിറ്റിൽ ഏതാണ്ട് ഒരു വർഷത്തിനു ശേഷം എ.സി.എൽ ഇഞ്ച്വറി മാറിയെത്തിയ ബെത്ത് മീഡ് കളത്തിലേക്ക് മടങ്ങിയെത്തി. ഇഞ്ച്വറി സമയത്ത് 92 മത്തെ മിനിറ്റിൽ വിക്ടോറിയ പെലോവയുടെ പാസിൽ നിന്നു ഉഗ്രൻ ഷോട്ടിലൂടെ ഗോൾ നേടിയ കേറ്റി മകെബെ ആഴ്സണലിന് സമനില ഗോൾ സമ്മാനിച്ചു. തുടർന്ന് 2 മിനിറ്റിനുള്ളിൽ മീഡിന്റെ പാസിൽ നിന്നു തന്റെ ലീഗിലെ ആഴ്സണലിന് ആയുള്ള ആദ്യ ഗോൾ നേടിയ അലസിയ റൂസോ ആഴ്സണലിന് സീസണിലെ മൂന്നാം മത്സരത്തിൽ ആദ്യ ജയം സമ്മാനിക്കുക ആയിരുന്നു.