ഫാബിയോ കാർവലോ അടുത്ത സീസണിൽ ലെപ്സീഗിന് വേണ്ടി പന്തു തട്ടും

ലിവർപൂൾ താരം ഫാബിയോ കാർവലോ ലെപ്സീഗിലേക്ക് തന്നെ എന്നുറപ്പായി. താരത്തെ ഒരു വർഷത്തെ ലോണിലാണ് ലെപ്സീഗ് ടീമിലേക്ക് എത്തിക്കുന്നത്. എന്നാൽ ലോൺ കാലാവധിക്ക് ശേഷം താരത്തെ സ്വന്തമാക്കാൻ ജർമൻ ടീമിന് സാധിക്കില്ലെന്ന് ഫാബ്രിസിയോ റോമാനോ ചൂണ്ടിക്കാണിച്ചു. ഉടൻ ജർമനിയിലേക്ക് തിരിക്കുന്ന താരത്തിന്റെ വൈദ്യ പരിശോധനകൾക്ക് ശേഷം ടീമുകളുടെ ഔദ്യോഗിക പ്രഖ്യാപനം എത്തും.

നേരത്തെ കാർവലോയെ സ്വന്തമാക്കാൻ ആയിരുന്നു ലെപ്സീഗിന്റെ നീക്കം. എന്നാൽ ടീമിന്റെ ഓഫർ ലിവർപൂൾ തുടക്കത്തിൽ തന്നെ തള്ളി. താരത്തെ കൈവിടാൻ ഒരുക്കമല്ലെന്ന് തീർത്തു പറഞ്ഞ ലിവർപൂൾ, എന്നാൽ ലോൺ അടക്കമുള്ള മറ്റു സാധ്യതകൾ പരിഗണിക്കാം എന്നും സൂചിപ്പിച്ചു. ഫുൾഹാമിൽ നിന്നും എത്തിയ ശേഷം ആദ്യ ഘട്ടത്തിൽ അവസരങ്ങൾ ലഭിച്ചെങ്കിലും പിന്നീട് പലപ്പോഴും ബെഞ്ചിൽ തന്നെ ഒതുങ്ങേണ്ടി വന്നിരുന്നു കാർവലോക്ക്. ഇതോടെ താരവും കൂടുതൽ അവസരങ്ങൾക്ക് വേണ്ടിയുള്ള ശ്രമത്തിൽ ആയിരുന്നു. പ്രീമിയർ ലീഗിൽ ആകെ പതിമൂന്ന് മത്സരങ്ങളിൽ മാത്രമാണ് കഴിഞ്ഞ സീസണിൽ കാർവലോക്ക് ബൂട്ടണിയാൻ സാധിച്ചത്. ഏതായാലും ലെപ്സീഗിൽ താരത്തിന്റെ പ്രകടനം കൂടിതൽ മെച്ചപ്പെടുമെന്ന പ്രതീക്ഷയിൽ ആവും ലിവർപൂളും.