ചാമ്പ്യൻസ് ലീഗ് ഗ്രൂപ്പ് നറുക്കെടുപ്പും മത്സര ക്രമവും എത്തിയപ്പോൾ ലിവർപൂളിനെ കാത്തിരിക്കുന്നത് കടുത്ത പോരാട്ടങ്ങൾ. സെപ്റ്റംബർ പകുതി മുതൽ ലിവർപൂളിന് എതിരാളികൾ യൂറോപ്പിലെ തന്നെ വമ്പൻ ക്ലബ്ബ്കൾ. ലിവർപൂളിന്റെ സീസണിലെ ഫലം തന്നെ നിർണയിക്കുന്ന നിർണായക മത്സരങ്ങളാണ് ഇവയെല്ലാം.
ചാമ്പ്യൻസ് ലീഗിൽ പി എസ് ജി യും നാപോളിയും അടങ്ങുന്ന മരണ ഗ്രൂപ്പിൽ പെട്ട ക്ളോപ്പിന്റെ ടീമിന് സെപ്റ്റംബർ 25 ന് പ്രീമിയർ ലീഗിൽ ടോട്ടൻഹാമിനെതിരെ എവേ മത്സരമുണ്ട്. സെപ്റ്റംബർ 18 ന് ചാമ്പ്യൻസ് ലീഗിൽ പി എസ് ജി യെ ആൻഫീൽഡിലാണ് അവർക്ക് നേരിടാനുള്ളത്. 22 ന് സൗതാംപ്ടനെ എവേ മത്സരത്തിൽ നേരിടുന്ന അവർക്ക് പിന്നീട് വരുന്നത് ചെൽസിക്കെതിരെ തുടർച്ചയായി 2 മത്സരങ്ങളാണ്.
ലീഗ് കപ്പ് രണ്ടാം റൗണ്ടിൽ സെപ്റ്റംബർ 25 നോ 26 നോ അവർക്ക് ആൻഫീൽഡിൽ ചെൽസിയെ നേരിടേണ്ടി വരും. 3 ദിവസങ്ങൾക്ക് അപ്പുറം സ്റ്റാംഫോഡ് ബ്രിഡ്ജിൽ പ്രീമിയർ ലീഗ് മത്സരം. ഒക്ടോബർ 3 ന് നാപോളിയെ അവരുടെ മൈതാനത്ത് നേരിടുന്ന ക്ളോപ്പിനും സംഘത്തിനും പിന്നീട് 7 ആം തിയതി കളിക്കേണ്ടത് മാഞ്ചസ്റ്റർ സിറ്റിക്കെതിരെ ആൻഫീൽഡിൽ !!.
ഈ കാലയളവിൽ 3 പ്രധാന ടൂർണമെന്റുകളിലെ ലിവർപൂളിന്റെ ഭാവി തീരുമാനമാകും. പ്രീമിയർ ലീഗിൽ ഏറെ സാധ്യത കൽപ്പിക്കപ്പെടുന്ന ടീമിന് ഇത്രയും മത്സരങ്ങളിലെ പ്രകടനം നിർണായകമാകും.
