മാഞ്ചസ്റ്റർ യുണൈറ്റഡ് ക്ലബിന്റെ പുതിയ പരിശീലകനായി സ്‌പോർട്ടിംഗ് ലിസ്ബണിൻ്റെ മുഖ്യ പരിശീലകനായ റൂബൻ അമോറിം എത്തും. ക്ലബ് അമോറിമിന്റെ 10 മില്യൺ യൂറോ (11 മില്യൺ ഡോളർ) റിലീസ് ക്ലോസ് അടക്കാൻ തയ്യാറാണ് എന്നാണ് റിപ്പോർട്ടുകൾ. 39 കാരനായ പരിശീലകനാണ് യുണൈറ്റഡിന്റെ ലിസ്റ്റിൽ ഏറ്റവും മുന്നിൽ ഉണ്ടായിരുന്നത്. ഇപ്പോൾ രണ്ട് ക്ലബുകളും തമ്മിൽ പൂർണ്ണ ധാരണയിൽ എത്തിയതായി ഫബ്രിസിയോ റൊമാനോ റിപ്പോർട്ട് ചെയ്യുന്നു.
പോർച്ചുഗീസ് യുവ കോച്ചിന് മികച്ച റെക്കോർഡ് ആണ് ഇതുവരെയുള്ള കരിയറിൽ ഉള്ളത്. സ്‌പോർട്ടിംഗിനെ രണ്ട് പ്രൈമിറ ലിഗ കിരീടങ്ങളിലേക്കും രണ്ട് ലീഗ് കപ്പുകളിലേക്കും അദ്ദേഹം നയിച്ചു, മുമ്പ് 2020 ൽ ബ്രാഗയ്‌ക്കൊപ്പം ഒരു ലീഗ് കപ്പ് കിരീടവും നേടിയിട്ടുണ്ട്.
മാഞ്ചസ്റ്റർ യുണൈറ്റഡ് ഇന്നലെ ആയിരുന്നു ടെൻ ഹാഗിനെ പുറത്താക്കിയത്. അവർ താൽക്കാലിക പരിശീലകനായി നിസ്റ്റൽ റുയിയെ നിയമിച്ചിട്ടുണ്ട്.
