പി എസ് ജിക്ക് ഫ്രഞ്ച് ലീഗിൽ ഇന്ന് വിജയം നേടാൻ കുറച്ച് കഷ്ടപ്പെടേണ്ടി വന്നു. ഇന്ന് ഹോം ഗ്രൗണ്ടിൽ ട്രോയെസിനെ നേരിട്ട പി എസ് ജി രണ്ടു തവണ പിറകിൽ പോയ ശേഷമാണ് വിജയിച്ചു കയറിയത്. അവസാനം 4-3 എന്ന സ്കോറിനായിരുന്നു വിജയം. ഇന്ന് കളി തുടങ്ങി മൂന്നാം മിനുട്ടിൽ തന്നെ പി എസ് ജി പിറകിലായി. ബാൾഡെയുടെ ഒരു വോളിയാണ് സന്ദർശകർക്ക് ലീഡ് നൽകിയത്.
ഈ ഗോളിന് 24ആം മിനുട്ടിൽ സോളർ ആണ് സമനില നൽകിയത്. നെയ്മറിന്റെ പാസ് സ്വീകരിച്ചായിരുന്നു മധ്യനിര താരത്തിന്റെ ഗോൾ. രണ്ടാം പകുതിയിൽ 52ആം മിനുട്ടിൽ വീണ്ടും ബാൾഡെ പി എസ് ജിക്ക് എതിരെ വല കുലുക്കി. സ്കോർ 2-1. ഇത്തവണ മെസ്സിയുടെ ഒരു ഇടം കാലൻ ലോങ് റേഞ്ചർ വേണ്ടി വന്നി പി എസ് ജിക്ക് സമനില നേടാൻ. 55ആം മിനുട്ടിൽ ആയിരുന്നു ഈ ഗോൾ.
62ആം മിനുട്ടിൽ മെസ്സിയുടെ ഒരു ഡിഫൻസ് സ്പ്ലിറ്റിങ് പാസ് നെയ്മറിനെ കണ്ടെത്തി. നെയ്മർ പന്ത് ഗോൾ വലയിൽ എത്തിച്ച് പി എസ് ജിക്ക് ആദ്യമായി ലീഡ് നൽകി. സ്കോർ 3-2. ഇതിനു ശേഷം ഒരു പെനാൾട്ടിയിലൂടെ എമ്പപ്പെ കളി 4-2 എന്നാക്കി. അവസാനം ഒരു ഗോൾ കൂടെ സന്ദർശക ടീം നേടി എങ്കിലും കളി പി എസ് ജി ജയിച്ചു.
ഈ ജയത്തോടെ 35 പോയിന്റുമായി ലീഗിൽ ഒന്നാമത് നിൽക്കുകയാൺ പി എസ് ജി.
