ഡെന്നിസിന്റെ ഗോളിൽ ജെറാർഡിന്റെ വില്ലയെ വീഴ്ത്തി റോയ് ഹഡ്സന് വാട്ഫോർഡിൽ ആദ്യ ജയം

മാസങ്ങൾക്ക് ശേഷം പ്രീമിയർ ലീഗിൽ ഒരു മത്സരം ജയിച്ചു വാട്ഫോർഡ്. സ്റ്റീഫൻ ജെറാർഡിന്റെ ആസ്റ്റൺ വില്ലയെ എതിരില്ലാത്ത ഒരു ഗോളിന് വീഴ്ത്തിയാണ് പന്ത്രണ്ട് പ്രീമിയർ ലീഗ് മത്സരങ്ങൾക്ക് ശേഷം വാട്ഫോർഡ് ഒരു ജയം കണ്ടത്തിയത്. പരിശീലകൻ റോയ് ഹഡ്സന്റെ വാട്ഫോർഡിലെ ആദ്യ ജയം ആണ് ഇത്. മത്സരത്തിൽ പന്ത് കൈവശം വക്കുന്നതിൽ വില്ല ആധിപത്യം കാണിച്ചു എങ്കിലും വലിയ അവസരം ഒന്നും അവർ തുറന്നില്ല.

ഇടക്ക് വില്ല ശ്രമം പോസ്റ്റിൽ തട്ടി മടങ്ങുകയും ചെയ്തു. രണ്ടാം പകുതിയിൽ 78 മത്തെ മിനിറ്റിൽ ഇസ്മായില സാറിന്റെ ക്രോസിൽ നിന്നു ഹെഡറിലൂടെ ഗോൾ കണ്ടത്തിയ ഇമ്മാനുവൽ ഡെന്നിസ് വാട്ഫോർഡിനു ജയം സമ്മാനിക്കുക ആയിരുന്നു. താരത്തിന്റെ സീസണിലെ ഒമ്പതാം ലീഗ് ഗോൾ ആയിരുന്നു ഇത്. നിലവിൽ ജയം കണ്ടെങ്കിലും അവസാന മൂന്നിൽ തന്നെയാണ് വാട്ഫോർഡ്. എങ്കിലും ജയം അവർക്ക് വലിയ പ്രതീക്ഷ നൽകും എന്നുറപ്പാണ്. അതേസമയം ലീഗിൽ പത്രണ്ടാം സ്ഥാനത്ത് ആണ് വില്ല ഇപ്പോൾ.