കാണികളുടെ എണ്ണത്തിൽ പ്രീമിയർ ലീഗിൽ പുതിയ റെക്കോർഡ്

പ്രീമിയർ ലീഗിൽ ഏറ്റവും കൂടുതൽ കാണികൾ കണ്ട മത്സരത്തിൽ ടോട്ടൻഹാം വീണ്ടും റെക്കോർഡ് ഇട്ടു. ഇന്ന് വെംബ്ലി സ്റ്റേഡിയത്തിൽ നടന്ന നോർത്ത് ലണ്ടൺ ഡെർബിയിലാണ് പ്രീമിയർ ലീഗിലെ പുതിയ റെക്കോർഡ് പിറന്നത്. 83,222 ആളുകളാണ് ഇന്ന് ആഴ്സണൽ ടോട്ടൻഹാം മത്സരം കാണാൻ എത്തിയത്. മത്സരം ടോട്ടൻഹാം എതിരില്ലാത്ത ഒരു ഗോളിന് വിജയിച്ചു.

10 ദിവസം മുമ്പ് വെംബ്ലി സ്റ്റേഡിയത്തിൽ ടോട്ടൻഹാമും മാഞ്ചസ്റ്റർ യുണൈറ്റഡും തമ്മിൽ ഏറ്റുമുട്ടിയപ്പോൾ 81,878 പേർ സ്റ്റേഡിയത്തിൽ എത്തിയിരുന്നു. ആ റെക്കോർഡ് ആണ് ഇന്ന് തകർന്നത്. ടോട്ടൻഹാമിന്റെ ഹോം ഗ്രൗണ്ടായ വൈറ്റ് ഹാർട്ട് ലൈൻ പുതുക്കി പണിയുന്നതിനാലാണ് ടോട്ടൻഹാം ഈ‌ സീസണിൽ വെംബ്ലിയിൽ കളിക്കുന്നത്.

കൂടുതൽ കായിക വാർത്തകൾക്ക് : www.facebook.com/FanportOfficial