ഇംഗ്ലീഷ് പ്രീമിയർ ലീഗിൽ ബ്രന്റ്ഫോർഡിനെ ഒന്നിനെതിരെ രണ്ടു ഗോളുകൾക്ക് തോൽപ്പിച്ചു ലെസ്റ്റർ സിറ്റി. സീസണിൽ തരം താഴ്ത്തൽ ഒഴിവാക്കാൻ പൊരുതുന്ന ബ്രന്റ്ഫോർഡിനെ സുന്ദര ഗോളുകളുടെ മികവിൽ ആണ് ലെസ്റ്റർ മറികടന്നത്. മത്സരത്തിൽ 20 മത്തെ മിനിറ്റിൽ ഹാർവി ബാർൺസിന്റെ പാസിൽ നിന്നു പരിക്കിൽ നിന്നു തിരിച്ചു വന്ന തിമോത്തി കാസ്റ്റാഗ്‌നെ ആണ് ലെസ്റ്ററിന്റെ ആദ്യ ഗോൾ നേടിയത്.
ബോക്സിന് പുറത്ത് നിന്ന് അതുഗ്രൻ ഗോൾ ആയിരുന്നു ഇത്. തുടർന്ന് 33 മത്തെ മിനിറ്റിൽ ലഭിച്ച ഫ്രീകിക്ക് മനോഹരമായി ലക്ഷ്യത്തിൽ എത്തിച്ച ജെയിംസ് മാഡിസൺ ലെസ്റ്ററിന് രണ്ടാം ഗോളും സമ്മാനിച്ചു. രണ്ടാം പകുതിയിൽ അവസാന നിമിഷങ്ങളിൽ വിസ്സയുടെ ബോക്സിന് പുറത്ത് നിന്നുള്ള ഷോട്ടിലൂടെ ഒരു ഗോൾ ബ്രന്റ്ഫോർഡ് തിരിച്ചടിച്ചു എങ്കിലും ലെസ്റ്റർ ജയം പിടിച്ചെടുത്തു. നിലവിൽ ലെസ്റ്റർ ലീഗിൽ പത്താം സ്ഥാനത്തും ബ്രന്റ്ഫോർഡ് പതിനഞ്ചാം സ്ഥാനത്തും ആണ്.
