ഇംഗ്ലീഷ് പ്രീമിയർ ലീഗിൽ അഞ്ചാമത്തെ മത്സരത്തിലും ജയിക്കാൻ ആവാതെ ഫ്രാങ്ക് ലമ്പാർഡിന്റെ എവർട്ടൺ. ആദ്യം മുന്നിലെത്തിയ ശേഷം ഇത്തവണ അവർ ലീഡ്സ് യുണൈറ്റഡിനോട് സമനില വഴങ്ങി. സ്വന്തം മൈതാനത്ത് ലീഡ്സ് ആധിപത്യം ആണ് മത്സരത്തിൽ കാണാൻ ആയത്. 17 മത്തെ മിനിറ്റിൽ മത്സരത്തിന്റെ ഗതിക്ക് വിരുദ്ധമായി അലക്‌സ് ഇയോബിയുടെ പാസിൽ നിന്നു ആന്റണി ഗോർഡൺ എവർട്ടണിനു ആദ്യ ഗോൾ സമ്മാനിച്ചു.
ലീഡ്സിന്റെ നിരന്തര ആക്രമണങ്ങൾ എവർട്ടൺ പ്രതിരോധം തടയുന്നത് ആണ് പിന്നീട് കാണാൻ ആയത്. എന്നാൽ രണ്ടാം പകുതിയിൽ ലീഡ്സ് അർഹിച്ച ഗോൾ കണ്ടത്തി. ബ്രണ്ടൻ ആരോൺസന്റെ പാസിൽ നിന്നു മികച്ച ഒരു ഷോട്ടിലൂടെ കൊളംബിയൻ താരം ലൂയിസ് സിനിസ്റ്റെറ ലീഡ്സിന് സമനില ഗോൾ കണ്ടത്തി. അവസാന നിമിഷങ്ങളിൽ മത്സരം കൂടുതൽ ചൂട് പിടിച്ചു എങ്കിലും വിജയഗോൾ മാത്രം പിറന്നില്ല. അഞ്ചു മത്സരങ്ങളിൽ ഒന്നിലും ജയിക്കാൻ ആവാത്തത് ലമ്പാർഡിനു മേൽ കനത്ത സമ്മർദ്ദം ആണ് നൽകുക.
