ബോക്സിങ് ഡേയിൽ ലെസ്റ്റർ ഇടിയിൽ വീണ് സിറ്റി

- Advertisement -

പ്രീമിയർ ലീഗിൽ മാഞ്ചസ്റ്റർ സിറ്റിക്ക് തുടർച്ചയായ രണ്ടാം തോൽവി. ലെസ്റ്റർ സിറ്റിയാണ് പെപ്പിന്റെ ടീമിനെ 2-1 ന് മറികടന്നത്. ഒരു ഗോളിന് മുന്നിട്ട് നിന്ന ശേഷമായിരുന്നു സിറ്റിയുടെ തകർച്ച. ഇന്നത്തെ തോൽവിയോടെ സിറ്റി കിരീട പോരാട്ടത്തിൽ ലിവർപൂളിന് 7 പോയിന്റ് പിറകിലായി മൂന്നാം സ്ഥാനത്തേക്ക് പിന്തള്ളപ്പെട്ടു. 45 പോയിന്റുള്ള സ്പർസാണ് നിലവിൽ രണ്ടാം സ്ഥാനത്ത്. സിറ്റിക്ക് 44 പോയിന്റാണ് ഉള്ളത്.

ആദ്യ പകുതിയിൽ പതിനാലാം മിനുട്ടിൽ ബെർനാടോ സിൽവയുടെ ഗോളിൽ സിറ്റി ലീഡ് എടുത്തതോടെ പതിവ് പോലെ സിറ്റിയുടെ ജയം പ്രതീക്ഷിച്ച ആരാധകരെ ഞെട്ടിക്കുന്ന തിരിച്ചു വരവാണ് ലെസ്റ്റർ കിംഗ്‌ പവർ സ്റ്റേഡിയത്തിൽ നടത്തിയത്. 19 ആം മിനുട്ടിൽ മാർക് ആൽബ്രയ്ട്ടന്റെ ഗോളിൽ സമനില പിടിച്ച അവർ പിന്നീടും സിറ്റി പ്രതിരോധത്തെ പ്രതിസന്ധിയിലാക്കി.

രണ്ടാം പകുതിയിൽ സിറ്റി ആക്രമണം വർധിപ്പിച്ചെങ്കിലും ലെസ്റ്ററിന്റെ പ്രതിരോധം മറികടക്കാൻ അവർക്കായില്ല. ലെസ്റ്റർ പക്ഷെ ഒരൽപം വൈകിയെങ്കിലും 81 ആം മിനുട്ടിൽ വിജയ ഗോൾ കണ്ടെത്തി. റിക്കാർഡോ പെരേരയാണ് ഗോൾ നേടിയത്. 89 ആം മിനുട്ടിൽ ഫാബിയൻ ഡെൽഫ് ചുവപ്പ് കാർഡ് കണ്ടതുകൂടി ആയതോടെ സിറ്റിയുടെ ബോക്സിങ് ഡേ പതനം പൂർത്തിയായി.

Advertisement