ടോട്ടനം മുന്നേറ്റ താരം ബ്രയാൻ ഗിൽ വീണ്ടും വലൻസിയയിലേക്കെത്തുന്നു. കഴിഞ്ഞ ജനുവരി മുതൽ വലൻസിയക്ക് വേണ്ടി തന്നെ ലോണിൽ കളിക്കുകയായിരുന്ന സ്പാനിഷ് താരത്തെ വീണ്ടും അവിടേക്ക് തന്നെ ലോണിൽ നൽകാൻ ടോട്ടനം തീരുമാനിക്കുകയായിരുന്നു. ഒരു വർഷത്തെക്കാണ് താരം ലോണിൽ എത്തുന്നത്. നേരത്തെ ലോ സെൽസോ, എൻഡോമ്പലെ എന്നിവരെയും ടോട്ടനം ലോണിൽ കൈമാറിയിരുന്നു. ഒരു പിടി പുതിയ താരങ്ങൾ ടീമിലേക്ക് എത്തിയ ഈ ട്രാൻസ്ഫർ വിൻഡോയിൽ കോച്ച് കോന്റെയുടെ പദ്ധതിയിൽ ഇടമില്ലാത്ത താരങ്ങളെ ഒഴിവാക്കാൻ കൂടിയുള്ള ശ്രമത്തിലാണ് ടോട്ടനം.
ഇരു വിങ്ങുകളിലും ഒരു പോലെ തിളങ്ങാൻ സാധിക്കുന്ന ഗിൽ സെവിയ്യയിൽ നിന്ന് കഴിഞ്ഞ സീസണിന്റെ തുടക്കത്തിലാണ് ടോട്ടനത്തിലേക്ക് എത്തുന്നത്. സ്‌പെയിനിലെ ഏറ്റവും പ്രതിഭാധനരായ യുവതറങ്ങളിൽ ഒരാളായി കണക്ക് കൂട്ടിയിരുന്ന താരമായിരുന്നു ഗിൽ. 2019ൽ സെവിയ്യയിൽ എത്തി. ടീമിനായി പതിനാല് മത്സരങ്ങൾ കളിച്ചിട്ടുണ്ട്.
തുടർന്ന് ലീഗൻസ്, ഐബർ ടീമുകൾക്ക് വേണ്ടി ലോണിൽ കളിച്ചു. താരത്തിന്റെ മികവ് കണ്ട് ടോട്ടനം ടീമിൽ എത്തിച്ചെങ്കിലും കാര്യമായ പ്രകടനം അവടെ കാഴ്ച്ച വെക്കാൻ ആയില്ല. തുടർന്ന് വലൻസിയയിലേക്ക് ലോണിൽ കൈമാറി. ശേഷം ടോട്ടനത്തിലേക്ക് മടങ്ങി എത്തിയെങ്കിലും അവസരങ്ങൾ കുറവാകുമെന്ന് ഉറപ്പായതോടെ ടീം വിടാനുള്ള ശ്രമത്തിൽ ആയിരുന്നു. താരത്തെ വീണ്ടും ലോണിൽ എത്തിക്കാൻ ശ്രമിച്ച വലൻസിയക്ക് കാര്യങ്ങൾ എളുപ്പമായി. ലോണിന്റെ അവസാനം താരത്തെ സ്വന്തമാക്കാൻ വലൻസിയക്കാവില്ല.
