സ്പാനിഷ് ലാ ലീഗയിൽ സ്‌പെയിനിലെ വമ്പൻ ക്ലബുകളിൽ ഒന്നായ വലൻസിയ അടുത്ത സീസണിൽ ഉണ്ടാവുമോ എന്ന കാര്യം വലിയ സംശയത്തിൽ. ഇന്ന് സെവിയ്യയോട് എതിരില്ലാത്ത 2 ഗോളുകൾക്ക് തോറ്റതോടെ 29 മത്സരങ്ങൾക്ക് ശേഷം 18 സ്ഥാനത്ത് ആണ് അവർ. ജയത്തോടെ സെവിയ്യ 12 സ്ഥാനത്തേക്ക് കയറുകയും ചെയ്തു. കൂടുതൽ നേരം പന്ത് കൈവശം വച്ചതും കൂടുതൽ ഷോട്ടുകൾ ഉതിർത്തതും വലൻസിയ ആയിരുന്നു.
എന്നാൽ ഗോൾ രഹിതമായ ആദ്യ പകുതിക്ക് ശേഷം 55 മത്തെ മിനിറ്റിൽ കോർണറിൽ നിന്നു ലഭിച്ച അവസരം ലക്ഷ്യം കണ്ട ലോയിക് ബേഡ് സെവിയ്യക്ക് മുൻതൂക്കം നൽകി. 75 മത്തെ മിനിറ്റിൽ മോണ്ടിയലിന്റെ മികച്ച നീക്കത്തിന് ഒടുവിൽ ലക്ഷ്യം കണ്ട സുസോ വലൻസിയ പരാജയം ഉറപ്പാക്കുക ആയിരുന്നു. 84 മത്തെ മിനിറ്റിൽ ബ്രയാൻ ഗിലിനെ ഫൗൾ ചെയ്ത ഇലായിക്‌സ് മോറിബ ചുവപ്പ് കാർഡ് കൂടി കണ്ടതോടെ വലൻസിയ പരാജയം പൂർണമായി. ഇനിയുള്ള 9 കളികളിൽ നിന്നു ലീഗിൽ നിലനിൽക്കാനുള്ള പോയിന്റുകൾ നേടുക ആവും വലൻസിയ ശ്രമം.
