ഇന്ന് കേരള പ്രീമിയർ ലീഗിന്റെ ഫൈനൽ ദിവസമാണ്. കേരള ഫുട്ബോളിലെ വൻ ക്ലബുകളായ കേരള ബ്ലാസ്റ്റേഴ്സും ഗോകുലം കേരള എഫ് സിയും ആണ് ഇന്ന് കോഴിക്കോട് വെച്ച് ഫൈനലിൽ ഏറ്റുമുട്ടുന്നത്. ഗ്രൂപ്പ് എ ചാമ്പ്യന്മാരായി സെമി വരെ എത്തിയ ഗോകുലം, സെമിയിൽ കേരള പോലീസിനെയാണ് പരാജയപ്പെടുത്തിയത്. സെമിയിൽ എതിരില്ലാത്ത നാലു ഗോളുകൾക്കായിരുന്നു ഗോകുലത്തിന്റെ വിജയം.
ഗോകുലത്തിന് ഇത് തുടർച്ചയായി മൂന്നാം കെ പി എൽ ഫൈനലാണ്. രണ്ടാം കിരീടമാകും ഗോകുലം ഇന്ന് ലക്ഷ്യമിടുന്നത്. കേരള ബ്ലാസ്റ്റേഴ്സിന് ഇത് ആദ്യ കെ പി എൽ ഫൈനലാണ്. ഗ്രൂപ്പ് എയിലെ റണ്ണേഴ്സ് അപ്പായിരുന്നു ഗോകുലം. സെമിയിൽ സാറ്റ് തിരൂരിനെ ആണ് കേരള ബ്ലാസ്റ്റേഴ്സ് വീഴ്ത്തിയത്. പെനാൽറ്റി ഷൂട്ടൗട്ടിൽ ആയിരുന്നു വിജയം. ഗ്രൂപ്പ് ഘട്ടത്തിൽ ഗോകുലവും ബ്ലാസ്റ്റേഴ്സും ഏറ്റുമുട്ടിയപ്പോൾ ഗോകുലം ഒരു മത്സരം വിജയിക്കുകയും മറ്റൊരു മത്സരം സമനിലയിൽ ആവുകയുമായിരുന്നു.
ഇന്ന് വൈകിട്ട് 6 മണിക്കാണ് ഫൈനൽ നടക്കുന്നത്. മത്സരം തത്സമയം 24 ന്യൂസ് ചാനലിലും അവരുടെ യൂട്യൂബ് ചാനലിലും കാണാം. സ്റ്റേഡിയത്തിൽ പ്രവേശനം സൗജന്യമാണ്.
