മുംബൈ സിറ്റി എഫ്‌സിയുടെ യുവതാരം ഗുർകിരത് സിംഗിനെ ചെന്നൈയിൻ സ്വന്തമാക്കുന്നു. പുതിയ സീസണു മുന്നോടുയായി 20കാരനുമായി ചെന്നൈയിൻ കരാറിൽ എത്തിയതായാണ് റിപ്പോർട്ടുകൾ. ഗുർകിരതിന് മുംബൈ സിറ്റിയിൽ അധികം അവസരങ്ങൾ ലഭിക്കുന്നുണ്ടായിരുന്നില്ല. ഇതാണ് താരം ക്ലബ് വിടുന്നത് ആലോചിക്കാനുള്ള കാരണം.
ഇന്ത്യൻ ആരോസിൽ നിന്നാണ് 2021 താരം മുംബൈയിൽ എത്തുന്നത്. ഇതുവരെ ആകെ 3 സീസണിലായി 28 മത്സരങ്ങൾ മാത്രമെ ഐ എസ് എല്ലിൽ ഗുർകിരത് കളിച്ചിട്ടുള്ളൂ. ഈ സീസണിൽ 11 മത്സരങ്ങൾ കളിച്ച താരം ഒരു ഗോൾ അടിച്ചിരുന്നു.
ചണ്ഡിഗഡ് ഫുട്ബോൾ അക്കാദമിയിലൂടെ വളർന്നു വന്ന താരമാണ്. ഫോർവേഡ് ആയും ഇടത് വിങ്ങറായും താരത്തിന് കളിക്കാൻ കഴിയും. പഞ്ചാബിൽ ജനിച്ച താരം ഐ ലീഗിൽ മൂന്ന് സീസണിൽ ഇന്ത്യൻ ആരോസിനൊപ്പം ഉണ്ടായിരുന്നു. 2020-21 സീസണിൽ 11 മത്സരങ്ങളിൽ പങ്കെടുക്കുകയും ഒരു ഗോൾ നേടുകയും ചെയ്യാൻ ഗുർകിരതിനായി.
