ഐ ലീഗിൽ വീണ്ടും ഗോകുലം കേരളയ്ക്ക് അനുകൂലമായ ഫലങ്ങൾ. കഴിഞ്ഞ ദിവസം ഒന്നാം സ്ഥാനക്കാരായ റൗണ്ട്ഗ്ലാസ് പഞ്ചാബ് പോയിന്റ് നഷ്ടപ്പെടിത്തിയതിന് പിറകെ ഗോകുലത്തിന്റെ തൊട്ടു പിറകിൽ നാലാം സ്ഥാനത്ത് ഉണ്ടായിരുന്ന ട്രാവു എഫ്സിയും സമനില വഴങ്ങി. ഇന്ന് നടന്ന മത്സരത്തിൽ മൊഹമ്മദൻസുമായി സമനിലയിൽ പിരിയുകയായിരുന്നു അവർ. വിജയിച്ചിരുന്നെങ്കിൽ ഗോകുലത്തെ മറികടന്ന് മൂന്നാം സ്ഥാനത്തേക്ക് കയറാൻ അവർക്കാവുമായിരുന്നു. മുഹമ്മദൻസ് ഒൻപതാം സ്ഥാനത്ത് തുടരുകയാണ്.
എതിർ തട്ടകത്തിൽ മുഹമ്മദൻസിനായിരുന്നു മേധാവിത്വം. എന്നാൽ ആദ്യ പകുതിയിൽ കളഞ്ഞ അവസരങ്ങൾ അവർക്ക് തിരിച്ചടിയായി. മുർസയേവിന്റെയും മാർക്കസ് ജൊസഫിന്റെയും നീക്കത്തിനൊടുവിൽ കീൻ ലൂയിസ് എടുത്ത ഷോട്ട് ദുർബലമായിരുന്നു. പിന്നീട് ഇടത് വിങ്ങിലൂടെ ഓടിക്കയറി കീനിന് ലഭിച്ച അവസരം താരം പൊസിറ്റിന് മുകളിലൂടെ പറത്തി കളഞ്ഞു. മൂന്നോളം അവസരങ്ങൾ ആണ് കീനിന് മാത്രം ആദ്യ പകുതിയിൽ ലഭിച്ചത്.
രണ്ടാം പകുതിയിൽ ട്രാവു കൂടുതൽ മെച്ചപ്പെട്ട നീക്കങ്ങൾ നടത്തിയെങ്കിലും. എൺപതിയോൻപതാം മിനിറ്റിൽ നിക്കോള സ്റ്റോയനോവിച്ചിന് ലഭിച്ച മികച്ചൊരു അവസരത്തിൽ ബോക്സിനുള്ളിൽ നിന്നുള്ള താരത്തിന്റെ ഷോട്ട് പുറത്തേക്ക് പോവുക കൂടി ചെയ്തതോടെ മത്സരം സമനിലയിൽ പിരിയുകയായിരുന്നു.
