എ എഫ് സി കപ്പിൽ എ ടി കെ മോഹൻ ബഗാൻ ഗ്രൂപ്പ് ചാമ്പ്യന്മാരായി. ഇന്ന് ഗ്രൂപ്പിലെ അവസാന മത്സരത്തിൽ ബസുന്ധര കിങ്സിനെ സമനിലയിൽ തളച്ചതോടെയാണ് മോഹൻ ബഗാൻ ഗ്രൂപ്പ് ചാമ്പ്യന്മാരായത്. ഇതോടെ ഇന്റർ സോൺ സെമി ഫൈനൽ പ്ലേ ഓഫിനും മോഹൻ ബഗാൻ യോഗ്യത നേടി. ഇന്ന് തുടക്കത്തിൽ ഒരു ഗോളിന് പിന്നിൽ പോയ ശേഷം പൊരുതി 1-1 എന്ന സ്കോറിൽ കളി അവസാനിപ്പിക്കാൻ മോഹൻ ബഗാനായി.
ആദ്യ പകുതിയിൽ 26ആം മിനുട്ടിൽ ഫെർണാണ്ടസിലൂടെ ആണ് ബസുന്ധര കിങ്സ് ലീഡ് എടുത്തത്. രണ്ടാം പകുതിയിൽ ഡേവിഡ് വില്യംസിലൂടെ മോഹൻ ബഗാൻ സമനില പിടിച്ചു. ലിസ്റ്റൺ കൊളാസോയുടെ അസിസ്റ്റിൽ നിന്നായിരുന്നു ഡേവിഡ് വില്യംസിന്റെ ഗോൾ. ഈ സമനിലയോടെ ഗ്രൂപ്പ് ഘട്ടം 7 പോയിന്റുമായി ഒന്നാമത് അവസാനിപ്പിക്കാൻ ബഗാനായി. ബസുന്ധര കിംഗ്സ് 5 പോയിന്റുമായി രണ്ടാമത് എത്തി. മോഹൻ ബഗാൻ ആദ്യ മത്സരങ്ങളിൽ ബെംഗളൂരു എഫ് സിയെയും മാസിയയെയും പരാജയപ്പെടുത്തിയിരുന്നു.
ഇനി ഇന്റർ സോൺ സെമി പ്ലേ ഓഫിൽ ഉസ്ബെക്കിസ്ഥാൻ ടീമായ എഫ് സി നസാഫോ തുർക്ക്മെനിസ്താൻ ടീമായ അഹലോ ആകും മോഹൻ ബഗാന്റെ എതിരാളികൾ.
