ലോകകപ്പ് ഗോൾ വേട്ടയിൽ സാക്ഷാൽ ഡീഗോ മറഡോണയെ മറികടന്നു ലയണൽ മെസ്സി. ഇന്ന് ഓസ്‌ട്രേലിയക്ക് എതിരെ പ്രീ ക്വാർട്ടറിൽ അതിമനോഹരമായ ആദ്യ ഗോൾ നേടിയ മെസ്സി ലോകകപ്പിൽ തന്റെ ഒമ്പതാം ഗോൾ ആണ് നേടിയത്. തന്റെ 1000 മത്തെ മത്സരത്തിൽ അവിസ്മരണീയ പ്രകടനം ആണ് മെസ്സി നടത്തിയത്.
ഗ്രൂപ്പ് ഘട്ടത്തിൽ അല്ലാതെ മെസ്സി ലോകകപ്പിൽ നേടുന്ന ആദ്യ ഗോളും ഇതാണ്. ഈ ഗോളോടെ മെസ്സി അർജന്റീനക്ക് ആയി ലോകകപ്പിൽ ഏറ്റവും കൂടുതൽ ഗോൾ നേടുന്ന രണ്ടാമത്തെ താരമായും മാറി. നിലവിൽ പത്ത് ഗോളുകൾ നേടിയ ഗബ്രിയേൽ ബാറ്റിസ്റ്റൂട്ട മാത്രമാണ് മെസ്സിക്ക് മുന്നിൽ ലോകകപ്പ് ഗോൾ വേട്ടയിൽ മുന്നിലുള്ള താരം.
