അണ്ടര്‍ 19 ലോകകപ്പ് വിജയിച്ച ഇന്ത്യന്‍ ടീമിന് പാരിതോഷികം പ്രഖ്യാപിച്ച് ബിസിസിഐ. ഓരോ താരങ്ങള്‍ക്കും 40 ലക്ഷം വീതവും സപ്പോര്‍ട്ട് സ്റ്റാഫ് അംഗങ്ങളില്‍ ഓരോരുത്തര്‍ക്കും 25 ലക്ഷം രൂപയും ആണ് ഇന്ത്യന്‍ ക്രിക്കറ്റ് ബോര്‍ഡ് പ്രഖ്യാപിച്ചിരിക്കുന്നത്.
ഇന്നലെ ഇംഗ്ലണ്ടിനെ 189 റൺസിന് പുറത്താക്കിയ ശേഷം ആവേശകരമായ മത്സരത്തിൽ ഇന്ത്യ 4 വിക്കറ്റ് വിജയം കരസ്ഥമാക്കുകയായിരുന്നു. രാജ് ബാവയുടെ ഓള്‍റൗണ്ട് പ്രകടനത്തിനൊപ്പം ഷൈഖ് റഷീദും നിശാന്ത് സിന്ധുവും നേടിയ അര്‍ദ്ധ ശതകങ്ങളാണ് ഫൈനല്‍ കടമ്പ കടന്ന് ഇന്ത്യയെ ചാമ്പ്യന്മാരാക്കിയത്.
പ്രാഥമിക റൗണ്ടിൽ കോവിഡ് വെല്ലുവിളിയെ അതിജീവിച്ച് 11 പേര്‍ മാത്രം സ്ക്വാഡിൽ ലഭ്യമായത് പോലെയുള്ള പ്രതിസന്ധി ഘട്ടത്തെ അതിജീവിച്ചാണ് ഇന്ത്യയുടെ അപരാജിത കുതിപ്പ് ടൂര്‍ണ്ണമെന്റിൽ നടന്നത്. ടൂര്‍ണ്ണമെന്റിന്റെ 2020 പതിപ്പിലും ഇന്ത്യ ഫൈനലിലെത്തിയെങ്കിലും ബംഗ്ലാദേശിനോട് തോല്‍വിയായിരുന്നു ഫലം. ഇത് അഞ്ചാം തവണയാണ് ഇന്ത്യ ലോക കിരീടം നേടുന്നത്.
