അര്‍ജന്റീനയെ കീഴടക്കി ആറാം റഗ്ബി കിരീടം ഉയര്‍ത്തി ന്യൂസിലാണ്ട്. തുടര്‍ച്ചയായ മൂന്നാം കിരീടമാണ് ന്യൂസിലാണ്ട് ഈ നേടുന്നത്. എസ്റ്റാഡിയോ ജോസ് അമാല്‍ഫിറ്റാനിയില്‍ നടന്ന മത്സരത്തില്‍ 35-17 എന്ന സ്കോറിനായിരുന്നു ന്യൂസിലാണ്ടിന്റെ ജയം. ഓസ്ട്രേലിയയെ കീഴടക്കിയെത്തിയ അര്‍ജന്റീനയ്ക്ക് എന്നാല്‍ സ്വന്തം നാട്ടിലെ കാഴ്ചക്കാരുടെ മുമ്പില്‍ മെച്ചപ്പെട്ട പ്രകടനം പുറത്തെടുക്കുവാനാകാതെ വന്നപ്പോള്‍ ന്യൂസിലാണ്ട് അനായാസം തങ്ങളുടെ കിരീടം ഉറപ്പാക്കി.
മെച്ചപ്പെട്ട് വരുന്ന ടീമായ അര്‍ജന്റീനയ്ക്കെതിരെ തങ്ങളുടെ അപരാജിത റെക്കോര്‍ഡ് നിലനിര്‍ത്തുവാനും ഇതോടെ ന്യൂസിലാണ്ടിനു സാധിച്ചു. അടുത്താഴ്ച പ്രിട്ടോറിയയില്‍ അവസാന റൗണ്ട് മത്സരത്തിനു മുമ്പ് തന്നെ ന്യൂസിലാണ്ട് കിരീടം ഉറപ്പാക്കി കഴിഞ്ഞുവെന്നതും ടീമിന്റെ ശക്തി വ്യക്തമാക്കുന്നു. 34-36 എന്ന സ്കോറിനു ദക്ഷിണാഫ്രിക്കയ്ക്കെതിരെ നേരത്തെ ന്യൂസിലാണ്ടിനു നാട്ടില്‍ അപ്രതീക്ഷിത തോല്‍വിയേറ്റു വാങ്ങേണ്ടി വന്നിരുന്നു.
