ചിറ്റഗോംഗ് വൈക്കിംഗ്സിനെതിരെ 7 വിക്കറ്റ് ജയവുമായി കോമില്ല വിക്ടോറിയന്‍സ്. ആദ്യം ബാറ്റ് ചെയ്ത ചിറ്റഗോംഗിനെ 116 റണ്‍സിനു പിടിച്ചുകെട്ടിയ ശേഷമാണ് മത്സരം 16.4 ഓവറില്‍ 3 വിക്കറ്റ് നഷ്ടത്തില്‍ വിക്ടോറിയന്‍സ് വിജയിച്ചത്. മഴ മൂലം 19 ഓവറായി ചുരുക്കിയ മത്സരത്തില്‍ ഷാഹിദ് അഫ്രീദിയുടെ ബൗളിംഗാണ് ചിറ്റഗോംഗിനെ വരിഞ്ഞു മുറുക്കിയത്.
4 ഓവറില്‍ 10 റണ്‍സിനു രണ്ട് വിക്കറ്റ് വീഴ്ത്തിയ അഫ്രീദിയ്ക്കൊപ്പം മുഹമ്മദ് സൈഫുദ്ദീന്‍, വഹാബ് റിയാസ് എന്നിവര്‍ രണ്ട് വീതം വിക്കറ്റ് നേടി. 25 പന്തില്‍ നിന്ന് 43 റണ്‍സ് നേടിയ മൊസ്ദേക്ക് ഹൊസൈനും 33 റണ്‍സ് നേടിയ മുഹമ്മദ് ഷെഹ്സാദ്ദുമാണ് ചിറ്റഗോംഗ് വൈക്കിംഗ്സിനു വേണ്ടി തിളങ്ങിയത്. 8 വിക്കറ്റ് നഷ്ടത്തിലാണ് 116 റണ്‍സ് ചിറ്റഗോംഗ് നേടിയത്.
മറുപടി ബാറ്റിംഗിനിറങ്ങിയ കോമില്ലയ്ക്ക് വേണ്ടി തമീം ഇക്ബാല്‍ പുറത്താകാതെ 54 റണ്‍സും ഷംസൂര്‍ റഹ്മാന്‍ 36 റണ്‍സും നേടി വിജയം ഉറപ്പാക്കുകയായിരുന്നു. 16.4 ഓവറിലാണ് ടീമിന്റെ വിജയം. വൈക്കിംഗ്സിനു വേണ്ടി അബു ജയേദ് രണ്ട് വിക്കറ്റ് നേടി.
