അര്‍ദ്ധ ശതകങ്ങളുമായി ഫിഞ്ചും വാര്‍ണറും, ഓസ്ട്രേലിയയ്ക്ക് 7 വിക്കറ്റ് വിജയം

- Advertisement -

അഫ്ഗാനിസ്ഥാനെതിരെ 7 വിക്കറ്റ് വിജയം കരസ്ഥമാക്കി ഓസ്ട്രേലിയ. ഇന്ന് നടന്ന മത്സരത്തില്‍ ആദ്യം ബാറ്റ് ചെയ്ത അഫ്ഗാനിസ്ഥാന്‍ 207 റണ്‍സിനു ഓള്‍ഔട്ട് ആയപ്പോള്‍ ഓസ്ട്രേലിയ 34.5  ഓവറില്‍ 3 വിക്കറ്റുകളുടെ നഷ്ടത്തിലാണ് ലക്ഷ്യം മറി കടന്നത്. ആരോണ്‍ ഫിഞ്ചും ഡേവിഡ് വാര്‍ണറും നേടിയ അര്‍ദ്ധ ശതകങ്ങളാണ് ടീമിനു ഉജ്ജ്വല വിജയത്തിലേക്ക് നയിച്ചത്.

49 പന്തില്‍ നിന്ന് 66 റണ്‍സിലേക്ക് കുതിച്ച ഫിഞ്ചിനെയാണ് ഓസ്ട്രേലിയയ്ക്ക് ആദ്യം നഷ്ടമായത്. 6 ഫോറും 4 സിക്സുമായിരുന്നു താരം നേടിയത്. അഫ്ഗാന്‍ നായകന്‍ ഗുല്‍ബാദിന്‍ നൈബ് ആണ് ഫിഞ്ചിന്റെ വിക്കറ്റ് വീഴ്ത്തിയത്. ഫിഞ്ച് പുറത്താകുമ്പോള്‍ 96 റണ്‍സാണ് ഓസ്ട്രേലിയ 16.2 ഓവറില്‍ നിന്ന് നേടിയത്. പിന്നീട് ഡേവിഡ് വാര്‍ണര്‍-ഉസ്മാന്‍ ഖവാജ കൂട്ടുകെട്ട് രണ്ടാം വിക്കറ്റില്‍ 60 റണ്‍സ് നേടി ഓസ്ട്രേലിയയെ മുന്നോട്ട് നയിച്ചു.

ഖവാജയും(15) സ്മിത്തും(18) പുറത്തായെങ്കിലും ഡേവിഡ് വാര്‍ണര്‍ പുറത്താകാതെ 89 റണ്‍സുമായി ഓസ്ട്രേലിയയെ വിജയത്തിലേക്ക് നയിക്കുകയായിരുന്നു.

Advertisement