സ്കാനിംഗിനു വിധേയനായി ശങ്കര്‍, കൂടുതല്‍ വിവരങ്ങള്‍ പുറത്ത് വിടാതെ ഇന്ത്യന്‍ മാനേജ്മെന്റ്

പരിശീലനത്തിനിടെ പരിക്കേറ്റ വിജയ് ശങ്കറുടെ പരിക്ക് ഗുരുതരമാണോ അല്ലെയോ എന്നതില്‍ വ്യക്തത നല്‍കാതെ ഇന്ത്യന്‍ ടീം മാനേജ്മെന്റ്. ഇന്നലെ താരം നെറ്റ്സില്‍ വലത് കൈയ്യില്‍ പന്ത് അടിച്ചതിനെത്തുടര്‍ന്ന് പരിശീലനം മതിയാക്കി സ്കാനിംഗിനു വേണ്ടി മടങ്ങുകയായിരുന്നു. എന്നാല്‍ സ്കാനിംഗിനു ശേഷം താരത്തിന്റെ സ്ഥിതിയെക്കുറിച്ച് കൂടുതല്‍ വിവരങ്ങള്‍ ഇന്ത്യന്‍ സംഘം പുറത്ത് വിട്ടിട്ടില്ല.

ഇതോടെ ഇന്ന് നടക്കുന്ന ന്യൂസിലാണ്ടിനെതിരെയുള്ള മത്സരത്തില്‍ വിജയ് ശങ്കര്‍ കളിയ്ക്കില്ലെന്ന് ഏറെക്കുറെ ഉറപ്പായിട്ടുണ്ട്. അതേ സമയം താരം ഇന്ത്യയുടെ ഉദ്ഘാടന മത്സരത്തിനു തയ്യാറായിരിക്കുമോ എന്നതിന്റെ ആശങ്കയിലാണ് ഇന്ത്യന്‍ ആരാധകര്‍. താരത്തിന്റെ ലോകകപ്പ് സാധ്യതകളെ ഈ പരിക്ക് എത്രത്തോളം ബാധിക്കുമെന്നതിലും ഒരു യഥാര്‍ത്ഥ ചിത്രം ഇതുവരെ പുറത്ത് വന്നിട്ടില്ല.