ന്യൂസിലാണ്ട് ഓപ്പണര്‍ സൂസി ബെയ്റ്റ്സിന് പരിക്ക്. ഓസ്ട്രേലിയയ്ക്കെതിരെയുള്ള ആദ്യ ഏകദിനത്തിലെ ഫീല്‍ഡിംഗിനിടെ പരിക്കേറ്റ താരം ഇനിയുള്ള രണ്ട് മത്സരങ്ങളിലും കളിയ്ക്കില്ല എന്നാണ് അറിയുന്നത്. സ്കാനിന് വിധേയായ ശേഷമാണ് താരത്തിന് പരമ്പരയിലെ അവശേഷിക്കുന്ന മത്സരങ്ങള്‍ നഷ്ടമാകുമെന്ന് ഉറപ്പായത്. പരിക്കേറ്റുവെങ്കിലും താരം ടീമിനൊപ്പം തുടരുമെന്നാണ് ബോര്‍ഡ് അറിയിച്ചത്.
ന്യൂസിലാണ്ട് ക്രിക്കറ്റിന്റെ മെഡിക്കല്‍ അഡ്വൈസറര്‍മാരുമായി ആലോചിച്ച ശേഷം താരം ഉചിതമായ തീരുമാനം എടുക്കുമെന്നും റീഹാബ് നടപടികള്‍ ഇപ്പോളത്തേക്ക് ആരംഭിച്ചിട്ടുണ്ടെന്നും ടീമിന്റെ ഫിസിയോതെറാപ്പിസ്റ്റ് സോ റസ്സല്‍ അറിയിച്ചു.
സൂസിയെ നഷ്ടമാകുന്നത് ടീമിന് കനത്ത നഷ്ടമാണെന്നാണ് കോച്ച് ബോബ് കാര്‍ടര്‍ വ്യക്തമാക്കിയത്. 100 ഏകദിനത്തിലധികം മത്സരങ്ങള്‍ കളിച്ചിട്ടുള്ള താരത്തിന്റെ സേവനം നഷ്ടമാകുന്നത് വലിയ തിരിച്ചടിയാണെന്നും ബോബ് അഭിപ്രായപ്പെട്ടു.
