ഇന്ത്യക്കെതിരായ നിർണ്ണായകമായ മൂന്നാം ടി20യിൽ ഓൾ റൗണ്ടർ ഫാബിയൻ അലൻ കളിക്കില്ല. പരിശീലകൻ ഫിൽ സിമ്മൺസ് ആണ് താരം കളിക്കില്ലെന്ന് വ്യക്തമാക്കിയത്. പൂർണമായും ഫിറ്റ്നസ് വീണ്ടെടുക്കാൻ താരത്തിന് കഴിയാതിരുന്നതോടെയാണ് താരത്തിന് മുംബൈയിൽ നടക്കുന്ന അവസാന ടി20യിൽ പങ്കെടുക്കാൻ കഴിയാതെ പോയത്.
നേരത്തെ ഇന്ത്യയുമായുള്ള ആദ്യ രണ്ട് ടി20 യിലും ഫാബിയൻ അലൻ കളിച്ചിരുന്നില്ല. ലക്‌നൗവിൽ അഫ്ഗാനിസ്ഥാനെതിരെ കളിക്കുന്നതിനിടെയാണ് ഫാബിയൻ അലന് പരിക്കേറ്റത്. തുടർന്ന് ഇന്ത്യയുമായുള്ള മത്സരങ്ങൾക്ക് മുൻപ് തന്നെ പരിക്ക് മാറുമെന്ന് കരുതിയാണ് വെസ്റ്റിൻഡീസ് താരത്തെ ടീമിൽ എത്തിച്ചത്. എന്നാൽ താരത്തിന് ഫിറ്റ്നസ് വീണ്ടെടുക്കാൻ കഴിയാതെ പോയതോടെ താരത്തിന് ഇന്ത്യയുമായുള്ള ടി20 പരമ്പരയിലെ എല്ലാ മത്സരങ്ങളും നഷ്ട്ടപെടുകയായിരുന്നു.
നാളെയാണ് മുംബൈയിൽ വെച്ച് ഇന്ത്യയും വെസ്റ്റിൻഡീസും തമ്മിലുള്ള അവസാന ടി20 മത്സരം. മൂന്ന് മത്സരങ്ങളുള്ള പരമ്പരയിൽ ഇരു ടീമുകളും ഓരോ മത്സരം വീതം ജയിച്ച് പരമ്പര 1-1ന് സമനിലയിലാണ്.
