തമിഴ്നാട് പ്രീമിയര്‍ ലീഗിന്റെ മൂന്നാം സീസണില്‍ അന്യ സംസ്ഥാനങ്ങളില്‍ നിന്നുള്ള താരങ്ങളെ പങ്കെടുപ്പിക്കുവാനുള്ള തമിഴ്നാട് ക്രിക്കറ്റ് അസോസ്സിയേഷന്റെ തീരുമാനത്തിനെതിരെ സുപ്രീംകോടതി നിയമിച്ച കമ്മിറ്റി ഓഫ് അഡ്മിനിസ്ട്രേറ്റേര്‍സ്. ബിസിസിഐ നിയമങ്ങള്‍ ഇത്തരം തീരുമാനങ്ങളെ അനുകൂലിക്കുന്നില്ല എന്നതിനാല്‍ ഇതുമായി തമിഴ്നാട് ബോര്‍ഡ് മുന്നോട്ട് പോയാല്‍ ഈ ടൂര്‍ണ്ണമെന്റിനെ അനുമതിയില്ലാത്ത ടൂര്‍ണ്ണമെന്റായി കണക്കാക്കുമെന്നാണ് സിഒഎയുടെ നയം.
ഇത്തരം കാര്യങ്ങള്‍ക്ക് ഇതുവരെ അനുമതി അസോസ്സിയേഷന്‍ തേടിയിട്ടില്ലെന്നാണ് സിഒഎ സംസ്ഥാനത്തിനു അയയ്ച്ച ഇമെയിലില്‍ സൂചിപ്പിച്ചിരിക്കുന്നത്. ജൂലൈ 11 മുതല്‍ ഓഗസ്റ്റ് 12 വരെയാണ് ടൂര്‍ണ്ണമെന്റിന്റെ മൂന്നാം പതിപ്പ്. അതാത് സംസ്ഥാനങ്ങള്‍ക്കും താരങ്ങളെ ഇത്തരം ടൂര്‍ണ്ണമെന്റില്‍ നിന്ന് പങ്കെടുക്കുന്നതില്‍ നിന്ന് വിലക്കണമെന്നും സിഒഎ അറിയിച്ചിട്ടുണ്ട്.
മലയാളിത്താരം റൈഫി വിന്‍സെന്റുള്‍പ്പെടെ ചില ഇതര സംസ്ഥാന ക്രിക്കറ്റ് താരങ്ങള്‍ ടിഎന്‍പിഎല്‍ 2018ല്‍ പങ്കെടുക്കുവാനൊരുങ്ങുന്നു എന്ന വാര്‍ത്ത നേരത്തെ പുറത്ത് വന്നിരുന്നു.
കൂടുതൽ കായിക വാർത്തകൾക്ക് : www.facebook.com/FanportOfficial
