അന്താരാഷ്ട്ര മത്സരങ്ങളിലേക്ക് പരിക്കില്‍ നിന്ന് മോചിതനായി താന്‍ തിരിച്ചു വരുന്നതിനു വിന്‍ഡീസിനെതിരെയുള്ള ഏകദിന പരമ്പരയില്‍ സാക്ഷ്യം വഹിച്ചേക്കുമെന്ന് അഭിപ്രായപ്പെട്ട് തമീം ഇക്ബാല്‍. ഏഷ്യ കപ്പിന്റെ ആരംഭത്തില്‍ തന്നെ കൈക്കുഴയ്ക്ക് പരിക്കേറ്റ താരം വിന്‍ഡീസ് ടെസ്റ്റ് പരമ്പരയ്ക്കിടെ തിരികെ എത്തുമെന്നാണ് ആദ്യം പ്രതീക്ഷിച്ചിരുന്നത്. എന്നാല്‍ താരത്തിനു പരിശീലനത്തിനിടെ വീണ്ടും ചെറിയ അസ്വാസ്ഥ്യങ്ങള്‍ പ്രകടമായതോടെ തിരിച്ചുവരവ് വീണ്ടും വൈകുകയായിരുന്നു.
ഡിസംബര്‍ 9നു ആരംഭിയ്ക്കുന്ന ഏകദിന പരമ്പരയില്‍ തിരിച്ചെത്തുന്നതിനു മുമ്പ് ഡിസംബര്‍ 6ലെ സന്നാഹ മത്സരത്തില്‍ കളിച്ച് തമീം തന്റെ മാച്ച് ഫിറ്റ്നെസ് തെളിയിക്കേണ്ടതുണ്ട്. എല്ലാം ശരിയായ ദിശയില്‍ നീങ്ങിയാല്‍ താന്‍ ഡിസംബര്‍ 9നു വീണ്ടും അന്താരാഷ്ട്ര ക്രിക്കറ്റിലേക്ക് മടങ്ങിയെത്തുമെന്നാണ് താരം തന്നെ വ്യക്തമാക്കിയത്. സന്നാഹ മത്സരത്തിനുള്ള ബംഗ്ലാദേശ് ക്രിക്കറ്റ് ബോര്‍ഡ് ടീമില്‍ തമീം ഇക്ബാലിനു അവസരം നല്‍കിയിട്ടുണ്ട്.
