സ്മിത്ത് ഉടന്‍ ഫോമിലേക്ക് എത്തും, ഇന്ത്യയ്ക്ക് മുന്നറിയിപ്പുമായി ആന്‍‍ഡ്രൂ മക്ഡൊണാള്‍ഡ്

സ്റ്റീവന്‍ സ്മിത്ത് ഇന്ത്യയ്ക്കെതിരെയുള്ള പരമ്പരയില്‍ ഉടന്‍ ഫോമിലേക്ക് മടങ്ങിയെത്തുമെന്ന് പറഞ്ഞ് ഓസ്ട്രേലിയയുടെ സഹ പരിശീലകന്‍ ആന്‍ഡ്രൂ മക്ഡൊണാള്‍ഡ്. ഇന്ത്യയ്ക്ക് മാര്‍നസ് ലാബൂഷാനെയെയും സ്റ്റീവ് സ്മിത്തിനെയും അവരുടെ ലെഗ് സൈഡ് തിയറിയിലൂടെ നിയന്ത്രിക്കാനായാതാണ് ഒരു പരിധി വരെ ഓസ്ട്രേലിയന്‍ ബാറ്റിംഗിന്റെ പരാജയത്തിന്റെ കാരണമെന്നും മക്ഡൊണാള്‍ഡ് വ്യക്തമാക്കി.

സ്മിത്ത് ക്രീസില്‍ അധികം സമയം ചെലവഴിക്കുവാന്‍ ശ്രമിക്കുന്നില്ലെന്ന ആക്ഷേപത്തോട് തനിക്ക് അനുകൂലമായ നിലപാടല്ലെന്നും മക്ഡൊണാള്‍ഡ് വ്യക്തമാക്കി. ഇന്ത്യ പ്രത്യേക പദ്ധതികളുമായാണ് ഇവരെ പിടിച്ചുകെട്ടിയതെന്നും എന്നാലും വരുന്ന ടെസ്റ്റില്‍ അതിനെ മറികടന്ന് റണ്‍സ് സ്മിത്ത് കണ്ടെത്തുമെന്നും മക്ഡൊണാള്‍ഡ് സൂചിപ്പിച്ചു.

ഈ രണ്ട് താരങ്ങളും ഇന്ത്യയുടെ ലെഗ് സൈഡ് തിയറിയെ അതിജീവിക്കുവാന്‍ അവരുടെ തന്നെ രീതിയുമായി വരുമെന്നും ഇവരുടെ ഇപ്പോളത്തെ പരാജയത്തിന് ടെക്നിക്കുമായി ഒരു ബന്ധവുമില്ലെന്നും മക്ഡൊണാള്‍ഡ് അഭിപ്രായപ്പെട്ടു. ഇന്ത്യന്‍ ബൗളര്‍മാരുടെയും ക്യാപ്റ്റന്മാരുടെയും തന്ത്രങ്ങളെ ഇവര്‍ എങ്ങനെ മറികടക്കുന്നു എന്നത് മാത്രമാണ് കാത്തിരുന്ന് കാണേണ്ടതെന്നും ഇന്ത്യയ്ക്ക് മുന്നറിയിപ്പെന്ന രീതിയില്‍ മക്ഡൊണാള്‍ഡ് പറഞ്ഞു.