ശിഖര്‍ ധവാന്റെ ടി20യിലെ ഓപ്പണിംഗ് സ്ഥാനത്തിന് ഉറപ്പില്ലെന്ന് അഭിപ്രായപ്പെട്ട് സഞ്ജയ് മഞ്ജരേക്കര്‍

Shikhardhawan
- Advertisement -

ഇഷാന്‍ കിഷന്റെ അരങ്ങേറ്റത്തിലെ പ്രകടനത്തോടെ ശിഖര്‍ ധവാന്റെ ടി20യിലെ ഓപ്പണിംഗ് സ്ഥാനത്തിന് ഇനി വലിയ ഉറപ്പില്ലെന്ന് അഭിപ്രായപ്പെട്ട് സഞ്ജയ് മഞ്ജരേക്കര്‍. പരമ്പരയിലെ ആദ്യ മത്സരത്തില്‍ 12 പന്തില്‍ നിന്ന് 4 റണ്‍സ് മാത്രം നേടി ധവാന് പകരമാണ് രണ്ടാം മത്സരത്തില്‍ ഇന്ത്യ ഇഷാന്‍ കിഷന് അവസരം നല്‍കിയത്. ഇഷാനാകാട്ടേ അവസരം മുതലാക്കി 32 പന്തില്‍ നിന്ന് 56 റണ്‍സ് നേടി മാന്‍ ഓഫ് ദി മാച്ച് പട്ടവും സ്വന്തമാക്കി.

രോഹിത് ശര്‍മ്മ തീര്‍ച്ചയായും ഓപ്പണിംഗിലേക്ക് മടങ്ങിയെത്തുമെന്നും പിന്നീടുള്ള ഒരു സ്ഥാനത്തിനായി ശിഖര്‍ ധവാനും കെഎല്‍ രാഹുലുമായിരുന്നു മുന്‍ഗണനയിലുണ്ടായിരുന്നതെങ്കിലും ഇഷാന്‍ കിഷന്റെ വരവോട് കൂടി ധവാന്‍ മൂന്നാം സ്ഥാനക്കാരനായി മാറിയെന്നും സഞ്ജയ് മഞ്ജരേക്കര്‍ വ്യക്തമാക്കി.

അതേ സമയം കെഎല്‍ രാഹുല്‍ തനിക്ക് പരമ്പരയില്‍ ലഭിച്ച രണ്ട് മത്സരങ്ങളിലും പരാജയമായിരുന്നു. ഇന്ന് മൂന്നാം മത്സരത്തിന് ഇന്ത്യ ഇറങ്ങുമ്പോള്‍ രാഹുലിന് പകരം ധവാന് അവസരം ലഭിയ്ക്കുമോ എന്നാണ് ഏവരും ഉറ്റുനോക്കുന്നത്.

Advertisement