ബംഗ്ലാദേശിന്റെ സ്പിൻ ബൌളിംഗ് കോച്ചായി രംഗന ഹെരാത്ത് എത്തുന്നു. ഇത് സംബന്ധിച്ച തീരുമാനം ഉടനുണ്ടാകുമെന്നാണ് ബിസിബി ക്രിക്കറ്റ് ഓപ്പറേഷൻ ചെയർമാൻ അക്രം ഖാൻ വ്യക്തമാക്കിയത്. ഡാനിയേൽ വെട്ടോറിയ്ക്ക് പകരം ആണ് ഹെരാത്ത് എത്തുന്നത്. ശ്രീലങ്കയ്ക്കെതിരെയുള്ള ടെസ്റ്റ് പരമ്പരയിൽ പ്രാദേശിക സ്പിൻ കോച്ച് സൊഹേൽ ഇസ്ലാമിനെയാണ് ബംഗ്ലാദേശ് ദൌത്യം ഏല്പിച്ചത്.
എന്നാൽ അദ്ദേഹത്തിന് സിംബാബ്വേയിലേക്ക് ടീമിനൊപ്പം യാത്രയാകാനാകില്ലെന്നാണ് ലഭിയ്ക്കുന്ന വിവരം. ഇന്ത്യയുടെ സായിരാജ് ബഹുതുലെ, പാക്കിസ്ഥാന്റെ സയ്യദ് അജ്മൽ എന്നിവരാണ് പട്ടികയിലുള്ള മറ്റ് രണ്ട് താരങ്ങൾ. ഇതിൽ ഹെരാത്തിനാണ് കൂടുതൽ സാധ്യതയെന്നാണ് ഇപ്പോൾ ലഭിയ്ക്കുന്ന വിവരം. ചർച്ചകൾ പുരോഗമിക്കുന്നുണ്ടെന്ന് ഹെരാത്തും സ്ഥിരീകരിച്ചു.
