ദുബായ് ടെസ്റ്റിന്റെ രണ്ടാം ദിവസം ന്യൂസിലാണ്ട് ബൗളര്‍മാര്‍ വിക്കറ്റുകള്‍ നേടുവാന്‍ സാധിക്കാതെ ബുദ്ധിമുട്ടിയപ്പോള്‍ മെല്ലെയെങ്കിലും മികച്ച സ്കോറിലേക്ക് നീങ്ങി പാക്കിസ്ഥാന്‍. ഹാരിസ് സൊഹൈലും ബാബര്‍ അസവും ശതകങ്ങള്‍ പൂര്‍ത്തിയാക്കിയ മത്സരത്തില്‍ ഒരു വിക്കറ്റാണ് രണ്ടാം ദിവസം വീണത്. 147 റണ്‍സ് നേടിയ ഹാരിസ് സൊഹൈലിനെയാണ് പാക്കിസ്ഥാനു നഷ്ടമായത്. ട്രെന്റ് ബോള്‍ട്ടിനായിരുന്നു വിക്കറ്റ്.
ബാബര്‍ അസവും(127*) ക്യാപ്റ്റന്‍ സര്‍ഫ്രാസ് അഹമ്മദും(30*) ചേര്‍ന്ന് പാക്കിസ്ഥാന്‍ സ്കോര്‍ 418/5 എന്ന നിലയില്‍ എത്തി നില്‍ക്കെ ഡിക്ലയറേഷന്‍ ടീം പ്രഖ്യാപിക്കുകയായിരുന്നു. രണ്ടാം ദിവസം ന്യൂസിലാണ്ട് ഇന്നിംഗ്സില്‍ 9 ഓവറുകള്‍ എറിഞ്ഞപ്പോള്‍ ടീം വിക്കറ്റ് നഷ്ടമില്ലാതെ 24 റണ്‍സാണ് നേടിയത്. 17 റണ്‍സ് നേടിയ ജീത്ത് റാവലും 5 റണ്‍സുമായി ടോം ലാഥവുമാണ് ന്യൂസിലാണ്ടിനായി ക്രീസില്‍ നില്‍ക്കുന്നത്.
