ക്ലിംഗര്‍ ബിഗ് ബാഷില്‍ നിന്ന് റിട്ടയര്‍ ചെയ്യാനൊരുങ്ങുന്നു

- Advertisement -

പെര്‍ത്ത് സ്കോര്‍ച്ചേര്‍സിന്റെ മൈക്കല്‍ ക്ലിംഗര്‍ ബിഗ് ബാഷ് ഈ സീസണ്‍ അവസാനത്തോടെ കളി മതിയാക്കുവാന്‍ ഒരുങ്ങുന്നു. ഇന്നലെയാണ് താരം ഈ പ്രഖ്യാപനം നടത്തിയത്. ടൂര്‍ണ്ണമെന്റിന്റെ ചരിത്രത്തില്‍ ഏറ്റവും അധികം റണ്‍സ് നേടിയ രണ്ടാമത്തെ താരമാണ് മൈക്കല്‍ ക്ലിംഗര്‍. കഴിഞ്ഞ ദിവസം മാത്രമാണ് താരത്തിന്റെ പേരിലായിരുന്നു ഒന്നാം സ്ഥാനം ക്രിസ് ലിന്‍ സ്വന്തം പേരിലാക്കിയത്.

ബിഗ് ബാഷില്‍ മികച്ച പ്രകടനം പുറത്തെടുത്തുവെങ്കിലും താരത്തിനു ഓസ്ട്രേലിയയ്ക്ക് വേണ്ടി മൂന്ന് മത്സരങ്ങളില്‍ മാത്രമേ കളിക്കാനായിട്ടുള്ളു. അതും ഫെബ്രുവരിയില്‍ ഓസ്ട്രേലിയ ശ്രീലങ്കയ്ക്കെതിരെ രണ്ടാം നിര ടീമിനെ ഇറക്കിയപ്പോള്‍ മാത്രം. ഈ സീസണില്‍ ഏറ്റവും മോശം ഫോമിലുള്ള താരത്തിനു 9 ഇന്നിംഗ്സുകളില്‍ നിന്ന് 115 റണ്‍സ് മാത്രമേ നേടാനായിട്ടുള്ളു.

ടീമിനൊപ്പം ചെലവഴിച്ച നിമിഷങ്ങളെ മനോഹരമെന്ന് വിശേഷിപ്പിച്ച ക്ലിംഗര്‍ ഈ സീസണ്‍ തനിക്കും ടീമിനും ഓര്‍ത്തുവയ്ക്കുവാന്‍ പറ്റുന്നതല്ലെന്ന് പറഞ്ഞു. അടുത്ത സീസണില്‍ ടീം ശക്തമായ തിരിച്ചുവരവ് നടത്തുമെന്നും താരം പ്രത്യാശ പ്രകടിപ്പിച്ചു.

Advertisement