ഇന്ത്യൻ യുവതാരം യശസ്വി ജയ്സ്വാൾ ടെസ്റ്റ് ബാറ്റർമാരുടെ റാങ്കിംഗിൽ ആദ്യ പത്തിൽ എത്തി. ഇന്ന് വന്ന പുതിയ റാങ്കിംഗിൽ രണ്ട് സ്ഥാനങ്ങൾ ഉയർന്ന് കരിയറിൽ ആദ്യമായി അദ്ദേഹം ആദ്യ പത്തിൽ പ്രവേശിച്ചു. ഇംഗ്ലണ്ടിനെതിരായ ടെസ്റ്റ് പരമ്പരയിലെ തകർപ്പൻ പ്രകടനത്തിൻ്റെ പിൻബലത്തിലാണ് ജയ്‌സ്വാളിൻ്റെ മുന്നേറ്റം.
ഈ പരമ്പരയിൽ മിന്നുന്ന ഫോമിലുള്ള ജയ്സ്വാൾ നാല് ടെസ്റ്റ് മത്സരങ്ങളിൽ നിന്ന് 655 റൺസ് നേടിയിട്ടുണ്ട്. ഒരു മാസം മുമ്പ് 29-ാം സ്ഥാനത്തായിരുന്നു ജയ്സ്വാൾ. അവിടെ നിന്നാണ് പത്തിലേക്ക് ഈ പരമ്പരയോടെ എത്തിയത്. ജയ്സ്വാളിനെ കൂടാതെ എട്ടാം റാങ്കിൽ ഉള്ള കോഹ്ലിയാണ് ആദ്യ പത്തിൽ ഉള്ള മറ്റൊരു ഇന്ത്യൻ താരം.
ന്യൂസിലൻഡിൻ്റെ സീനിയർ താരം കെയ്ൻ വില്യംസൺ 870 പോയിൻ്റുമായി ഒന്നാം സ്ഥാനത്തും ജോ റൂട്ട് 799 പോയിന്റുമായി രണ്ടാം സ്ഥാനത്തും, സ്റ്റീവ് സ്മിത്ത് 789 പോയിന്റുമായി മൂന്നാമതും നിൽക്കുന്നു.
