ലോക്ക്ഡൗണ്‍ മെയ് 3 വരെ നീട്ടുന്നതായുള്ള പ്രധാന മന്ത്രിയുടെ പ്രഖ്യാപനം വന്നതോടെ ഐപിഎല്‍ ഉപേക്ഷിക്കുകയല്ലാതെ വഴിയില്ലെന്ന തീരുമാനത്തിലെത്തി ബിസിസിഐ. ഈ അടുത്തൊന്നും ഐപിഎല്‍ നടത്താനാകില്ലെന്ന് ഉറപ്പായതോടെയാണ് ബിസിസിഐ തങ്ങളുടെ ഈ തീരുമാനം അനൗദ്യോഗികമായി ഐപിഎല്‍ ഫ്രാഞ്ചൈസികളെ അറിയിച്ചുവെന്ന് മനസ്സിലാക്കുന്നത്.
ഒരറിയിപ്പുണ്ടാകുന്നത് വരെയാണ് ഈ തീരുമാനമെങ്കിലും ഔദ്യോഗികമായ തീരുമാനം ഇതുവരെ ബിസിസിഐ എടുത്തിട്ടില്ല. വരും ദിവസങ്ങളില്‍ ആ പ്രഖ്യാപനം വരുമ്പോള്‍ മാത്രമേ ഐപിഎല്‍ ഈ വര്‍ഷം ഉപേക്ഷിക്കുകയാണോ അതോ ഐപിഎല്‍ സെപ്റ്റംബര്‍-ഒക്ടോബര്‍ മാസത്തില്‍ നടത്തുവാന്‍ തീരുമാനിച്ചുവോ എന്നുള്ളത് അറിയുവാന്‍ സാധിക്കുള്ളു.
നിലവില്‍ ഐപിഎല്‍ ഉപേക്ഷിച്ചിട്ടില്ല പക്ഷേ ടൂര്‍ണ്ണമെന്റ് തല്‍ക്കാലം മാറ്റുകയാണെന്നാണ് ബിസിസിഐയുടെ അനൗദ്യോഗികമായ അറിയിപ്പ്. ഇത് ഫ്രാഞ്ചൈസികളുടെ അടുത്ത വൃത്തങ്ങളില്‍ നിന്ന് അറിയുവാന്‍ കഴിഞ്ഞ കാര്യമാണെന്നും പല മാധ്യമങ്ങള്‍ റിപ്പോര്‍ട്ട് ചെയ്യുന്നുണ്ട്. ഏപ്രില്‍ – മെയ് എന്ന പൊതുവേയുള്ള ഐപിഎല്‍ ജാലകത്തില്‍ ഇത്തവണ ഇനി ടൂര്‍ണ്ണമെന്റു്ണ്ടാകില്ലെന്ന് ഇതോടെ ഉറപ്പായി.
