ഇന്ത്യക്ക് ഇന്ന് മറ്റൊരു നിരാശാജനകമായ ദിവസമായി. ഇന്ത്യൻ ക്രിക്കറ്റ് ടീമിന്റെ ഐസിസി കിരീടം തേടിയുള്ള ശ്രമം വീണ്ടും പരാജയപ്പെട്ടു. ഇന്നത്തെ പരാജയത്തോടെ തുടർച്ചയായ ഒമ്പത് ഐസിസി ടൂർണമെന്റുകളിൽ കിരീടം നേടാതെ മടങ്ങിയിരിക്കുകയാണ് ഇന്ത്യ. ഓവലിൽ നടന്ന ലോക ടെസ്റ്റ് ചാമ്പ്യൻഷിപ്പ് (ഡബ്ല്യുടിസി) ഫൈനലിൽ ഓസ്ട്രേലിയ വലിയ വിജയം തന്നെ സ്വന്തമാക്കി.
2013-ലെ ചാമ്പ്യൻസ് ട്രോഫിയിലെ ആവേശകരമായ വിജയം മുതൽ, ഐസിസി ഇവന്റുകളിലെ ഇന്ത്യയുടെ യാത്ര ഏതാണ്ടെല്ലാം നിരാശയിലാണ് അവസാനിച്ചത്. 2014ൽ ശ്രീലങ്കയ്ക്കെതിരായ ടി20 ലോകകപ്പ് ഫൈനലിൽ ഇന്ത്യ തോറ്റതോടെയാണ് നിരാശയുടെ പരമ്പര ആരംഭിച്ചത്. 2015 ലോകകപ്പിലെ സെമി ഫൈനൽ, 2016 ലോകകപ്പ് ടി20യിലെ സെമി ഫൈനൽ, 2017 ചാമ്പ്യൻസ് ട്രോഫി ഫൈനലിൽ പാക്കിസ്ഥാനെതിരായ തോൽവി എന്നിവയിൽ ഈ നിരാശ തുടർന്നു.
ന്യൂസിലൻഡിനെതിരായ സെമിഫൈനലിൽ പരാജയപ്പെട്ടതിനാൽ 2019 ലോകകപ്പ് യാത്രയും ഇന്ത്യൻ ടീമിന് ഹൃദയഭേദകമായി. 2021ലെ ആദ്യ ലോക ടെസ്റ്റ് ചാമ്പ്യൻഷിപ്പ് ഫൈനലിൽ ഇന്ത്യ ന്യൂസിലൻഡിനെതിരെ പരാജയപ്പെട്ടതും മറക്കാൻ ശ്രമിക്കുകയാണ് ഇന്ത്യൻ ക്രിക്കറ്റ്.
2021 ലോകകപ്പ് ടി20യിൽ ഇന്ത്യയുടെ പോരാട്ടം ഗ്രൂപ്പ് ഘട്ടത്തിൽ തന്നെ തന്നെ അവസാനിച്ചു. 2022ലെ ടി20 ലോകകപ്പിൽ ശക്തമായ തിരിച്ചുവരവ് നടത്തിയെങ്കിലും സെമിഫൈനലിൽ ഇന്ത്യയുടെ യാത്ര മുടങ്ങി. ഇപ്പോൾ ഡബ്ല്യുടിസി ഫൈനലിലും പരാജയം ആവർത്തിച്ചു. ഇനി ഇന്ത്യയിൽ നടക്കാൻ പോകുന്ന ലോകകപ്പിൽ കിരീടത്തിൽ മുത്തമിടാം എന്ന പ്രതീക്ഷയാകും ഇന്ത്യയെ നയിക്കുക.
